لا يا بعد من باع دينه بدنياه من قصائد ابن مسلم في الشيخ ابن حفيظ

[معلومات العضو عازف شجن]

لا يا بعد من باع دينه بدنياه
قصيده وجهها الشاعر للشيخ حفيظ بن عجب آل حفيظ الدوسري
يا الله يا معبود يالله ياالله**** يا واحد(ن) عالي على كل عالي
ياالله بليل(ن) مدلهم(ن) نثر ماه****غيث(ن) من القبله حقوق الخيالي
يسقي الديار الممحلات المخلاه**** بلاقع(ن) دهر(ن) من أول وتالي
يرخي على الارض الوسيعه رفاياه**بمتونه البراق يشعل اشعالي
والصبح تلقون الخباري املاه****وكل(ن) يقول ان اسفل العرق سالي
وابشر اللي جعل الانذال تفداه**** حفيظ لا عدو زحول الرجالي
راعي معاميل(ن) على النار مركاه**** ونجر(ن) اليا دقوا بهاره يلالي
في مجلس(ن) منضاق صدره تنصاه**** فيه العلوم الطيبات الجزالي
وراعي مجاهيم(ن) ازيان(ن) منقاه****فنس الخشوم وضافيات السبالي
عسم اليدين أم العظام المساواه**** اكبار الفقار اللي زهتها الحبالي
وافحولها من خيرة البل مصفاه ****كنها على الارض البسيطة اجبالي
وان زرفل اغريبان يازين ممشاه**** صوره وخالقها عظيم الجلالي
يا زينها لا بكر الوسم زيناه**** تقطف زماليق الخزامى شمالي
في مرتع(ن) قفر(ن) خلا ما احد(ن) جاه**** متوسط(ن) بين الوعر والسهالي
في ضف شيخ(ن) تفعل الطيب يمناه**** معطي سحاجيج البكار الغوالي
شيخ(ن) ولد شيخ(ن) طروقه مخلاه****ما بين جدان وعمام او خوالي
ماهيب شيخة عمدة(ن) يسحب ارداه**** رزوه ربعه فالسنين التوالي
قالوا تراك انت البطل فالملاقاه**** ومالك حد(ن) وسط الجزيرة يحالي
جعله فدا لحفيظ مثله وشرواه**** الفرق واضح يا فطين العيالي
يا حفيظ يا شوق الهنوف المخباه**** بنت الرجال امتعبين الدلالي
قوم(ن) لهم في قمة المجد مركاه**** فكاكة القالة ازحول الرجالي
أنت الهلال اللي تبين وشفناه**** نور الدجى في مظلمات الليالي
أسراج آل عجب اللي حميده سجاياه****في طاعة الله ماشي(ن) بالعدالي
يم الجهاد امهاجرات(ن) مطاياه**** يرجي ثواب الله عظيم الجلالي
لا يا بعد من باع دينه بدنياه**** ما ينعرف ماله حرام اوحلالي
منفق رياله يوم رب الملا أعطاه**** لا يا بعد من يكنزون الريالي
شعر شايع بن مسلم الخضراني

 

 

 

 

[معلومات العضو ابومبخوت الدوسري]

صح لسان الشاعر / شايع بن مسلم الخضراني

على هذه القصيده الجزله والوافيه .

وبيض الله وجهك ياذيبان على نقل هذه الرايعه للشاعر
ابن مسلم ونتطلع للمزيد من مواضيعك الشيقه
خصوصاً في هذا الفضاء .


تقبل تحياتي وتقديري

 

 

 

 

[معلومات العضو ناصر بن فهد]

صح لسان الشاعرُ وصح لسانك على النقلُ
ولاهنت يا القرم

 

 

 

 

[معلومات العضو مبارك بن الجوير]

صح الله لساااااااان الشاعر شايع بن مسلم
وعز الله انها جزلة" من جزل
ولاهان منطووووقه والممدوح يستحق ان شاء الله
ويسلم ذووووقك واختياارك المميز
اللي ينم عن سمو ذائقتك اخوووي
عازف شجن
اسعد الله ايااامك
كما اسعدتنا بهذه المشاركة الجميلة
تقبل مروري لاهنت..

 

 

 

 

[معلومات العضو عازف شجن]

شكرا لكم على الاطلالة الطيبة