|
|||||||
06-11-2007, 04:28 PM
|
#1 | ||||||
|
من روائع الشاعر ( خالد مدعث )
بسم الله الرحمن الرحيم
السلام عليكم ورحمة الله وبركاته .................. الشاعر / خالد بن مدعث بن نفل الخرفاني الدوسري شاعر بعيد جدا ً عن الإعلام .. وقصائده قريبه جدا ً جدا ً من قلوبنا .. ان سوف استعرض لكم ما اعرفه من قصائده ، واتمنى من الاخوان مساعدتي بوضع مايعرفون من قصائد هذا المبدع .. صلووو عــ النبي .. (( طلبتك يا إلهي ))
طلبتك يا إلهي وانت مجري الريح بالهمّال = طلبتك مزنة ٍ من تحت عين العرش همّاله أغثنا مع هبوب الغيث غيث ٍ صيّب ٍ وبّال = مشى وانشى بربان ٍ غشى البيداء تعزّا له مزون ٍ من كثر ماها غدن اثقال فوق اثقال = تدّّلى كن كف الأرض يجتّره ويرقى له قراح ٍ من مزابير تزبـّر كنهن اجبال = دفعه الغرب والشرقي يهب ويردع اجفاله سحاب ٍ في مقاديمه نصوب ٍ كنهن اشيال = تزاحم كنها جيوش الزناتي يوم تبرا له تضاحك في مقاديمه بروق ٍ يشعلن اشعال = ثمان ٍ في ثغر غرو ٍ تلألأ من ورا شاله ومواخير ٍ تهل ادموعها عذب ٍ قراح ازلال = شخاتير ٍ مثل ضرب المشوّك صوت وبـّاله إليا من زل ّ عقب سهيل خمسين وثلاث ليال = طلع نجم السويبع وأعلن الوسمي ومدخاله طلع نجم ٍ يبشر بالحيا بدو ٍ لهم ترحال = جذبهم بارق ٍ ليله سرى في عارض اخياله بداوين ٍ على الخبت المربـّع حطـّو المنزال = مصاليـح ٍ تبوج البيد شاويـّه و وبـّاله عسى جرد الفيافي من عقب طول الدهور تسال = يزينها كريم المد ّ من حاله .. الى حاله يزف ّ الروض زملوق ٍ نواويره بكل أشكال = تمايل مثل سنبوك ٍ يطق ّ الموج في جاله غصون ٍ تنثني لا نسنس الغربي يمين شمال = تثني خفرة ٍ غنى لها عشرين طبـّاله تلوّى فوق بعض ٍ مثل ديبان ٍ بعود آثال = وتحت ظل ّ الغصون يحصّل العصفور مقياله فياض ٍ من زهرها الطير يركع له ركوع اذلال = جمال ٍ من بعد شوفه نسى اللجّه وتجواله زهور الروض خلّت لـــ أم سالم فالعَصيَر اهبال = تجرّ الصوت بالمنكوس ( يالاله .. ويالاله ) تخاتيـخ ٍ خلاها للحباري والضبا مدهال = مرابيعه هل الذيدان ماتقدر تعنـّا له يرودونه قوانيص ٍ خذو مع سجته تجوال = وعلى طرد الولع مايقبلون هروج عذّاله تسـّلو فالحياة وخلوّ الدنيا وجمع المال = مادام الموت في طلق الرقاب ملوّي احباله غرامي .. نقلت القرناس ، ومرافق زحول رجال = مناعير ٍ تسد ّ النايبات وتحمي القاله معاهم لذّة الدنيا مزوح ، ودله ، وفنجال = على نار ٍ عليل الروح منها ينشرح باله وعلى كفي عديم ٍ مخلبه مايرحم الحفـّـال = عطيب ٍ مثل حد ّ مصقل ٍ بـأيدين قتـّـاله تلى فوقه صقاقير ٍ وراه يدورن ريال = وحش فرخ ٍ مواكيره هضاب ايران واجباله نحره ابيض وراسه كاشف وصافي وريشه خال = معرّى جسمه وزيّن وصوفه باقي افعاله عريض الصدر مفهوق ٍ جناحه والعظام اجلال = وطول وعرض والنادر من النارد تسلساله قصير كراعه وساقه عليه مضفره سروال = احلي به على اردون الملوك بطول سرواله طويل العنق واعيونه عليها تضرب الأمثال = يوصف به راعبيب ٍ على الأرواح نشّاله اليا منه رفع راسه على طلع ٍ بعيد امحال = مثل داب ٍ تعلاّ فوقه الصيد .. وتعلوى له يوكد لو طلع بـأرض ٍ تطارد به سراب اللال = ولا قد تل ّ مسباقه على شي ٍ يورّى له يشادي فالركاده .. عابد ٍ خاشع لــ آذن ( ابلال ) = والى من زاع .. كنّ الارض من تحته تطوّى له والى حوّل .. مثل نجم ٍ من علو ّ السما منهال = والى منه ضرب بالكفّ .. فال الله ولا فاله نهب قلبي غلاه وصار حبّه فالضلوع لحال = غدى له فالحشا وكر وعروق فوادي احباله ذراعي من تحته وكل فال ٍ يقتفيه اعقال = حشمته لين طال اللي كثير الناس ما طاله ليال ِ النقل و اهدود الوحش منوة عليل البال = غرام اللي شقى الدنيا وطول القيظ غرباله وابسوق القدم في مهمه ٍ خال ٍ من الأنذال = بعيد من بعض ناس ٍ وجوده فالزمن عاله مع ارجال سوالفهم مهيب اهروج قيل وقال = طاطيـح ٍ ثقيل الحمل تبرك له وتشتاله واسلي من صواديف الليالي قلبي الشغال = واقول : اعوذ بأسم لله من شيطان واعياله ::::::::::::::::::: (( لذة المقناص ))
أنا ليا ضاق صدري واشتعل جاشي = داويت نفسي من هموم تناهشها ضربت لي طرقة تصعب على اللاشي = وسريت رجلي ومسرى الليل ينعشها ونحرت جوٍّ خلي يوحش أوحاشي = صحاصح البيد طبّ اللي يعايشها خالي جنابه من العالم والأدباشي = قفرٍّ مرب الوحوش ومأمن اوحشها عشبه سواة الحمى مهوب يناشي = لا راعي البل ولا الشاوي بنايشها ما يقطعن فرجته حرار الابواشي = الضمّر اللي وصوف الريم تلكشها ما يسهجه غير جيب يطرب الماشي = مع واعر الارض ولا مع مفارشها جيب يبعد عن معشاي مغباشي = اللي يقص الدروب اليا تناوشها ما يسمع من المكينه غير وشواشي = ماكنها إلا الحيايا في توشوشها لا فـر من دوس رجلي صابه خراشي = فرة قطاة دوي الملح خارشها يطيش من طيش سواقه ليا طاشي = نوب ٍ يخمّ الخطوط ونوب يقرشها أبيه لابان نجم ونجم متلاشي = وشفت السويبع مع خوانه مداقشها في ليلة وبلها هتان ورشاشي = وقلايد الوسم مرخيتن مراهشها اليا ظمرن الفحول وجاهن طياشي = والارض في بطنها قرت هوايشها وراع ِ الولع عقب موته له تنعواشي = طيره على الكف والدنيا مطنشها ما عاد يطري له الا برق الارياشي = اللي على شانها البيداء يفتشها وانا معي عاري ٍ مهوب بخياشي = لاتل سيره على المقفي تفرشها عديم واسمه عديم ما اسمه شلاشي = زرق الشوش لا لحقها علق شوشها ومن لا عرف لذة المقناص ما عاشي = ولعه بليا طماعه مير عايشها يسلا بها الخاطر اليا ضاق وانداشي = وترتاح في النوم عيني يوم اغلمشها ما تسمع اذني صدى لجلاج وهواشي = الا السواري مع الظلما تخترشها يا لايمي خلني أصد وانحاشي = عن شوف ناس مغير تلوي خششها والله إن يبطي مع المقناص مطراشي = لين المنيه اقابل وجه طارشها هذا الدواء اللي يداوي حدب هشاشي = من هاجس لاتحرك قام يجرشها ::::::::::::::::::: (( الشاص ))
ياغانم أشتر من جديد المواطيـر = شاصاً على كيف الغريب الخــلاوي لونه مع الأصباح كنه نحر طيـر = ولونه مع أتلا الليل نجــم سمـاوي خطه مع الجنبين ياهيه ما غيــر = شفة هنوف من سقا التــوت راوي أليا مشا كنه ولـد شيخ امغيــر = مصطور صفقه صفق سيل النحـاوي ولافز تسمعله مع القاع تصفيــر = صر السواني فوق بير قصـــاوي ولاوقف ماله من الوصف تصـوير = ألا كما وصف العديـم النـــداوي صوت كفراته لونسة شلعت القيـر = كنه أعوا ذيب من الجوع طــاوي وجلد التواير يجلد الحيد والعيــر = رعاد مزن والبرد منـه هـــاوي وحس المكينه لااستوت فزة السيـر = حس الهنوف المترفـي السحــاوي ورفارف يشقابها الفكر ويحيــر = كنه ردايف لا بسـاة الغطــــاوي له مقدم كنـه يقـود الطـوابيـر = أو مثل قبع العسكري الفــــداوي ماخذبه أعيال الجحلط مشاويــر = ولا حملوا حوضه بجحٍ حســـاوي ما ساقه ألا محتميــن المعاشيـر = أهل العزاوي مخلفين الهقــــاوي هو علة ألي مابراسه صعاطيــر = وهو طب من يونس على الكبد لاوي هو منوة أقلوب الزحول المناعير = لكـــم دونه يقصـرن المنـــاوي يازين فوقه لمشينابه اعصيــر = مـــع خايع ماداج فيها الشــواوي وسهيل بان وطلعته مقدم الخيـر= نجم مـع الغيث المغيث أمتخـــاوي والوسم جاله مع أدخوله تباشيـر = وذكـــر الحياء جتله أعلوم وحراوي يا الله بهمال بصوب المزابيــر = نـــون سنا برقه مع الغرب ضاوي يسقي الديار الممحلاة المداهيــر = ألـــي ثراها فوقها العــود ذاوي وبل وصوته لسقا القاع تكبيــر = شهرين والما حاير في المحـــاوي حتى غداء روس الزبيدي مشاهير = فوق الثراء يعمي العيون ويــداوي كنه أنهود قطعــن الأزاريــر = يضيع معهن مدعيــن الفتـــاوي قفر تعانقبه أغصــون الناويـر = الـــــريح طيب ولـ أم سالم غناوي والروض بطرافه تحن المغاتيـر = وحيرانهن يبـــرلهن بالخطــاوي وقفة فحلهن بينهن كنه النيــر = ولا عقيـــد دون داره حـمــاوي ذي جنـة الدنيا والأيام تعبيــر = ولا زينها ألا مقتفيهــا بـــلاوي لو مانسج الرجل في الخبة ونسير= معاد نلقا للوناســـه حــــراوي أقنوص والارايحين مسايـيــر = صوب الرجال أمزبنين الجـــلاوي ربع لهم حشمه وقيمه وتقديــر = مجلاسهــم ماهوب مجلس قهـــاوي العود الأزرق والدلال المباهيـر = ودثر الشحم فوق الصحون أمتسـاوي دواسر يوم الحــرايب بواتيـر = ويوم الرخا حبلً متين رهــــاوي أصغارهم يثنون عند المضاهيـر = ستر العذارا والــدبش والعــزاوي وكبارهم مثل الوحوش الهواميـر = أسيوفهم بين النحــر والكــلاوي وباقي القبايل نعم من غير تقصير = وكلً ًعلى فعله يعــد الحكـــاوي غير النشاما ما يبي القلب تدويـر = في شوفهم يسلا العلــيل الشقـاوي أسج معهم والليالــي مقاديــر = والعمر مره يالخفـــوق السنــاوي وش خانة الدنيا وجمع الدنانيـر = وحنــا علينا نازع الــروح نـاوي ::::::::::::::::::: (( لا يـع البعد ))
و قلبي اللي لايع البعد لايعه = قلب ٍ خذت سود الليالي بضايعه اليا زهم عيني بغالي دموعها = جاته عيوني بـ أزرق الدمع فايعه قلب ٍ همومه كل يوم ٍ مغيره = صكت على عرشه وهدت قلايعه جت له مثل ، سرب الجراد التهامي = تشرب معاليقه ، وتآكل زرايعه و كنّ الحشى من حرّ مابه ، يمزّع = بسيوف هند ٍ تودع الروح زايعه و لا ، بـ نيبان السباع الموحشه = ضواري ٍ من ستة أيام جايعه ذا حال من حاله تربت وصارت = ما تقبل الا من فوايد ذرايعه الذل .. ما يحتاج طرد وتعني = و العز .. عسر ٍ مهلكات ٍ وقايعه ولا فيه عز ٍ .. ما تداوى جروحه = ولا فيه ذل ٍ .. قد تداوت وجايعه الله واكبر يا زمااان تغير = شريت فرخ البوم ، و الحرّ بايعه وقت ٍ على الأنذال .. ستر ٍ مضفّى = ولا على الأجواد .. تظهر فجايعه عام ٍ مضى ما كنّي إلا مجلى = أشوف من صكات وقتي روايعه متنقل ٍ مابين ديره و ديره = رجلي على حكم المقادير طايعه أقوي اعزومي بنفسي و أسوقها = في دبرة اللي ما يضيع ودايعه بس اتفكر ، و اتذكر ، و اهوجس = و استرجع ايام ٍ على القلب رايعه ماعاد باقي غير تالي رسومها = عهد محت سود الليالي طبايعه حطّوه في قبر ٍ عليه النصيبه = واقفى مثل ، شمس ٍ من الليل مايعه لو بـ أشتكي ما سرّت القلب شكواي !! = شكوى ٍ لغير الله يا ( فهيد ) ضايعه من أول ٍ مابين ربعي و ديرتي = و اليوم قلبي لا يع البعد لايعه ::::::::::::::::::: (( ما كل بيضه بـ شحمه ))
و قلبي اللي من زمانٍ فات ماخوذ سبي = سبي الحناشل من مراح راعي ابله وغنمه الليل يسري بالدبش والذيب والحايف يبي = والبدو ماينهب دبشها الا الليال المظلمه الحايف ايحوف الضعن والذيب لضان يحبي = والراعي المسكين عن غيب القدر من علمه امسى غني يلبس العمه وتزهاه العبي = واصبح فقيراٍ مايحصل لقمة تملا فمه واللي جراله قد جرالي ياحمد وانا صبي = قلبي من الاضلاع منهوب بدمه ولحمه اتلا العهد بالقلب يوم انا مابين امي وابي = اثره على الحب انفطم قدام لاامه تفطمه محدن بكى ولاشكى سواة ناري وحطبي = ولابه مثل ساقي تعنا واتعبه سير اقدمه بصبر واكابر دامني بالحب غبرت اشنبي = قال المثل (( من لايغبر شاربه ما دسمه )) بس اتحرى وارتجي يخلف لي الله اتعبي = واقول عذري فالهوى (( ماكل بيضه بشحمه )) القلب مدهال الهوى واصعب هوى حب اجنبي = وطبع العرب كلٍ يعيي دون مرباه ودمه وانا على ليت و لعل ، احط وانقل مزهبي = ومن فوق عش العنكبوت ابني الرجا ثم اهدمه طال المدى وانا اتقلب بين ناري واحطبي = اموت واحيا والغضي يكوي الضلوع بميسمه لولاك ياعذب اللما عين الوحش عنق الضبي = ماكان تامرني وتنهاني بضحك وسلهمه لولاك الهوى ماكان تملك راس حرّ ٍ يعربي = خلاك خوان الرجال بدون حربا تحكمه الله يبيحك واستبح عمري ودمي وذهبي = حللت لك كل الثلاث اللي علي محرمه دوجي بريضان الحشا واكلي ربيعي واشربي = الله عطاك من الحشا بيره وتمره وعجمه وسويت بي مالا رضاه الله ولادين النبي = ملكتني ملكة نصارى والديانه مسلمه واليوم ياعذب اللما عين الوحش عنق الضبي = حقٍ عليك اليا خضع لك صاحبك لاتظلمه ::::::::::::::::::: (( أغلى الدموع ))
على كثر الدموع اللي تحول من عيـون النـاس = أحد صادق , وأحد كاذب , وأحد دمعه علـى كيفـه لقيت ( أغلى الدموع ) اللي لها بين العبايـر سـاس = ( دموع أم ٍ ) علـى فرقـى ولدهـا حسهـا خيفـه بكت من لوعـه التوديـع عيـن ٍ مالهـا حبـاس = يحبس الدمع جفن ٍ مـا شكـى فرقـى مواليفـه لتس الله .. وانتي أغلى من مشى فوق التراب وداس = دموعتس عندي أقسى من زمان ٍ مرهـف سيفـه ألا يا بعد من شم الهوى .. عوذي مـن الوسـواس = ولدتس أن يسـر الله عانـق العـز ومشاريفـه يقولون العرب : ثوب الثنـى والعـز والنومـاس = خلقـه الله ورا بــاب عطيـبـات مراهيـفـه مادام انتس سقيتيني من حليب مطوعين الباس = ورى ما اركض مع السرحان واهورف مهاريفه !؟ عشى نابه بمخلابه ويوم اكل ٍ .. ويوم افلاس = يجوووع الذيب وان حده زمانه .. ما كلا جيفه !! يشوف العز ، والتقدر .. رجال ٍ صليب الراس = جنيه ٍ من ذهب له حكة ٍ تغلي مصاريفه ويشوف الذل ، والحقران .. رجال ٍ بليد احساس = رمادة جمرة ٍ من نار ٍ اول ساسها ليفه عجايب ناس ٍ ، ودنيا عجايبها بدون اقياس = سحاب فالسماء يعسف على البيداء عواصيفه من المرتاح ؟ والإنسان من يخلق وهو عسّاس = ليا زانت مرابيعه .. نهبها من يده صيفه !! نمووت من التعب ، لكن في طرد السبب لاباس = ثقيل الحمل اعده مع ثقيل الهم .. تخفيفه مادام البعد عـز ٍ للفتـى .. بعـده ستـر والبـاس = ولا قـرب ٍ هبـوب الـذل تلعـب فـي نفانيفـه صحيح ان الغريب اعروق قلبه من هله يبّاس = يسليه القمر .. واليا سلى عجل ٍ مناكيفه شقي ٍ حط له بين النجوم الساريه مجلاس = نظر عينه على ديرة حشاشة جوفه وريفه يغيب الليل والنجوم السماء ,, ماغيّب الهوجاس = ويبين الصبح ,, لا علم ٍ لقاه ولا حصل شيفه عذابه فالضحى من نايحات الورق والنسناس = لا غنّت ناااح ، والنسناس يصلاه بهفاهيفه غريب ٍ حده لتركة بلاده وقته المنحاس = عصَى ، مير الزمان الشين ما تعِصَى صواديفه تبي الايام .. صملات ومناعير ٍ وسيف وطاس = (( حياة اعزاز ولا موت ٍ تشرف مواقيفه )) ::::::::::::::::::: (( عمر الأيام ))
كل يوم .. يزل ّ عمره عقبه ايام ٍ تتالا = وكل عمر .. يحلّ يومه عقبه أيام ٍ نصايب لو نعمر !! ما لحقنا عمر الايام الطوالا = لكن أيام العمر توخذ من ايدينا نهايب السحاب يقول : عطني ، والبحور تقول : لا لا = كن ما خلقت لنا شمس ٍ ولاهبت هبايب !! لو يميل الجدي صوب اسهيل ما مال الشمالا = من تخلا عن محله مانعده غير غايب مابقى شي ٍ بأقوله غير شي ٍ ما يقالا = والله ان الصمت حكمه ,, مير راع ِ الحق صايب ان كتمته !؟ قامت اضلوعي من الغيره تصالا = وان حكيته !؟ مل ّ قلب ٍ مايبي فرقى الحبايب قلت : بالله يا ( زماني ) اركد اشوي ٍ تمالا = قال : توووك وان عطاك الله عمر شفت الغرايب بعد ما قفّى تلفّت قال : يا ( خالد ) تعالا = قلت : بس اقبل ( زماني ) وانتهى وقت الطلايب قال : أخذ مني نصايح يوم شفت العهد طالا = لاتحسب ان كل عجّه مقتفي ثرها سحايب !! ومن يبي عينه تحلوى النوم واجروحه تشالا ؟ = عن تخاتيخ المحبه يعقل ايدين الركايب آآه .. أنا اللي لو تضيع جرتي حمر الرمالا = باستخير من الطرد واعود من البيد تايب يا وليفي .. لا تدورني ويتعبك السؤالا = كيف تلقاني ؟ وانا اللي في حلاة الملح ذايب (( ما يخاف من النهار الا الذي ماله ظلالا = ولا يخاف من الظلام الا الذي ماله قرايب )) ::::::::::::::::::: (( يقول خالد ))
يقول ( خالد ) : فالهوى شاف ما شاف = شاف المناكر كلها فالهوى شوف أنا احسب ان الحب وقفه ومنكاف = اثره مثل ضرب الخناجر على الجوف ! يا كم صيحه صحتها فوق مشراف = صحية جلاوي مونس ٍ ديرة الخوف حب ٍ يا ( ابو مدعث ) على ماااش ينعاف = هاذي ثلاث سنين والقلب مخطوف ياما صبرنا والصبر سم ٍ ازعاف = يالله عسى صبر ٍ صبرناه مخلوف لو كنت في دنياك تسعى وتطّاف = تجيب لك عجلات الايام صادوف ترى المثل قد قال : الأيام زلاّف = ( والعمر ينقص وآخر الوقت ملفوف ) والي بتاخذ معك في قبرك الحاف = ولا ينفعك دمع ٍ على الخد مذروف نبغى مع الجواد سجّه و محراف = اللي هواهم مودع القلب معسوف اليا ذكرته .. يخطف القلب خطّاف = واليا نسيته .. صرت لا اسمع ولا اشوف حبه حكم قلبي مثل حكم ( الاشراف ) = مامنه لا رحمه ,, ولامنه معروف يا مسندي جاني من الشوق خفخاف = خفخف بقلبي خف واصبحت مخفوف ابوجديل ٍ .. منثني فوق الأكتاف = والعنق .. عنق ابنية ٍ قادت اخشوف والخد .. براق ٍ سرى الليل كشّاف = ضوح القمر من لمعة الخد مكسوووف !! ومبيسم ٍ .. فيه البَرَد بيض وارهاف = كن العسل بين المراهيف مغروف والعين .. نجلاء ، والهدب .. سود عكّاف = كن العيون بوسطها ارماح واسيوف والخشم .. خنجر هند في ضربه اسراف = ومقرن حجاجينه .. بها الموت مردوف !! متعزل ٍ صدره وخصره والارداف = مليان عوده ظامر الخصر ملهوف زين النبا مايوصفه كل وصّاف = ( الله لا يظهره لعيون ملقووووف ) :::::::::::::::::::::::: (( نجد العذيه ))
يـاهــبــايــب كـــــــان مـــرواحــــك عـــلــــى نـــجــــد الــعـــذيـــه = ودي عـلـوم الغـريـب وهـاتـي عـلـوم الـرفـاقـه عـــــدي ( الـطــايــف ) وخــمـّــي الـبــيــد شـــــرق مـــــن ( الـحــويــه ) = لاتحـيـري عـنـد غـيـري مـالـك بغـيـري عـلاقـه واخـــــذي اجــــــري يـاهـبــايــب واحــفــظــي مـــنـــي وصـــيـــه = لـويـقـولـون : الـوصـايــا مـاتـضــوي راس نــاقـــه لاوصـــلـــتـــي نــــجـــــد ردي عــــنـــــي لـــنـــجـــد الــتــحــيـــه = مـن ضميـر لاحقـه مـن لـوعـة الفـرقـا لحـاقـه عـلــمــيــه ان كـــــــان طـــــــال الــبــعـــد لايــــزعــــل عــلـــيـــه = والله انــي فــي حيـاتـي ماشكـيـت .. الا فـراااقــه الــــعــــرب قــــالــــوا : تــــــــرى مــــــــا لــلـــخـــوي الا خــــويــــه =وانـت يا نجـد المسمـى ماخـذ ٍ روحـي عشاقـه مـــــن غـــــلاك ان هـــــب مــــــن صـــوبـــك ذعـــاذيـــع نـــديـــه = قمت افتح في ضلوعي طاقة فـي جنـب طاقـه الــعـــروق الــلـــي تــنــســم مــــــن هــــــواك اتــصــيــر حـــيـــه = مـن بعدكـم كنهـن يبـرن علـى مـوس الحلاقـه مـــــع هــبــوبــك ريـــحـــة اهــــــل الـــعـــز ورجــــــال الـحـمــيــه = ربـع ٍ لعيـنـا ثــراك الـمـوت يـردونــه شـفـاقـه مـحـتـمـيــنــك بــالــهــنــادي مــــــــن الـــعـــصـــور الـجــاهــلــيــه = رمـلـك احـمـر لــون دم ٍ مـرهـف الحـديـن راقــه غــــيــــر هــــــــذا يــدهـــلـــك يــانـــجـــد وضــــــــاح الــثــنــيـــه = جـادل ٍ خــلا الـعـيـون المـبـصـره فـيـهـا حـمـاقـه !! مــــــن ولــعــنــا مــانــبــي عــــــن ديـــرتـــه روحــــــه وجـــيــــه = قمـت احـس بسحـر بابـل فالمعالـيـق اندفـاقـه مـاتـشـكــى مـــــن ســمـــوم الـقــيــض عـــــود وســـــط فـــيـــه = كيف يضمى وازرق الماء يزعـج الساقـي زراقـه !؟ لاوقــــــفت صـــاحـــب فــخــامــه .. وان مـــشـــت بـــنـــت الـعـبــيــه = وان تـثـنـت خـيـزرانــه لـيـنــه غــــض ٍ دقــاقــه نـاهـديــنــه فـــــــوق صـــــــدره روحـــــــت خـــصــــره ضــحــيـــه ! = واشتكى الساق الردايف .. واشتكت لـ أقدام ساقه !! والــجــســد ريـــحـــة فـــيــــاض وســمــهـــا ســـيــــل بـــرديــــه = والـزبـادي مــن عرقـهـا مـاخــذ ٍ ريـحــه سـراقــه !! مـاعــلــيــنــا فـــــــــي هــــواهـــــا لا مـــــــــلام ولا خـــطـــيــــه = العـسـل لـوذنـب اذوقــه ! ذنـبـه بحـلـوة مـذاقــه مـــيــــر روحـــــــي يـاهــبــايــب وانـــحــــري نـــجــــد الــعــذيـــه = هـاذي عـلـوم الغـريـب وبـاقـي عـلـوم الرفـاقـه ::::::::::::::::: (( حلو الايام ))
يا هبايب ردّي العلم عني وش بقى !!؟ = مابقى الا عرق ينبض و قلب ٍ منتحي كان ما جيتي وقلتي لي : أبشر باللقا = لا تجيني خايبه في محلتس امرحي السهر والهجر دافيك يا قلب الشقى = و عان ذي بقى تفرّك مثل فرّ الرحي جعل يوم ٍ فيه قلبي توعّى ما سقى = صحته الأيام يا ليت قلبي ما صحي ليت قلبي للمحبه تهايق و اتقى = كان ما زينت لـ اجنود عينه مذبحي من ضحك بالمبتلى راح يلقى ما لقى = يوم كنت اضحك على اهل الهوى والصالحي صرت انا والسهر والحزن والهم أصدقا = قمت الحفهم معايه بطارف مشلحي لا نزل واحد من اصحابي الثاني رقى = صاحبوني جعل صحبة هذولا تنمحي من معه حيله حيل ، من معه هقوه هقى = بس والله مايصير الشنب تحت اللحي !؟ الكرامه ( عز ّ ) ، ودنيا بلا ( عز ّ ) امحقى = ليه جبنا قولة : الله يعين المستحي ولو تجيني حلو الايام عندي وش بقى !!؟ = ما بقى عرق ينبض و قلب ٍ منتحي ::::::::::::::::::: (( سلم جداني )) .. عرضه
طلبت الله قبـل مبـدأ القصيـده غافـر الزلـه = رفيع العـرش عـلام الغيـوب أمدبـر الأفـلاك ألا يالله يامطـلـوب ثبتـنـي عـلـى المـلـه = بقولة لا الـه الا أنـت ربـي مامعـاك أشـراك أنا امنـت بـك واللـي بديـن الحـق مرسلـه = أنا عبدك وابن عبدك وادور طاعتـك ورضـاك أبي ضلـك بيـوم فيـه غيـرك مانبـي ضلـه = بيـوم الحشـر يـارب العبـاد أبلتجـي بحمـاك وأنـا ماقـول هـذا كـبـر لله والكـبـر لـ الله = تعودنا نعز النفـس عـن ذولـى وعـن ذولاك تعودنـا علـى بيـت الشعـر والنـار والـدلـه = وتعودنـا نقـول أهـلا هـلا ياضيفنـا حيـاك وتعودنا على الجيره نصون الجار عـزا له = وعلى الخوه خوي الجنب ماياطى على الاشـواك وتعودنـا وتربينـا علـى سلـم العـرب كـلـه = على العفه على الشيمه على الحشمه على الادراك مواريـث الجـدود اللـي تـورد للعـدا عـلـه = ألا ياسلمنـا ياسلـم جدانـي حـلـو مـحـلاك ألا ياسلمنـا ماجـاك مـن شيـن الدهـر خلـه = ألا ياسلمنـا ياعزنـا لا عـاش مـن خــلاك ::::: ابيات .. ..
أنا ولد (( مدعث )) على الطيبه طبت = ما ألد ّ عيني في بنات الرفاقه من طيب (ابوي) وطيب (عمي) تعربت = ومن طيب (خالي) مالحقني لحاقه ..
الحـق الدنيـا مشـي !! وتطردنـي الدنيـا عـدي !!؟=أطول عمر ، عمر الدهر .. وأقصر عمر ، عمر البشر !! و أنا بشر .. عبد ٍ ضعيـف ولا درى ويـن يغـدي !!=ينحاش من ظلمة بطن .. ويطيح في ظلمـة قبـر !!!!؟ ..
كلمتين ٍ كايده من يحصلها ارتوووى = قولة : ( أحبك ) .. وقول النشامى : ( والنعمّ )
__________________ __________ سامحوني عـ الإطالة والقصووور واعدكم في مواضيع قادمه ان اطرح المزيد من القصائد لشعراء ( الدواسر ) الشباب من دون استثناء مع تمنياتي لهم بالتوفيق اخوكم // ولد زايد وسيع البنايد
|
||||||
|
|
|
|
06-11-2007, 06:39 PM
|
#2 | ||||||||
|
رد: من روائع الشاعر ( خالد مدعث )
تسلم يا ولد زايد وسيع البنايد على هذه القصائد الجميلة
آخر تعديل لين يوم 06-11-2007 في
06:50 PM.
|
||||||||
|
|
|
|
06-11-2007, 10:31 PM
|
#3 | ||||||||
|
رد: من روائع الشاعر ( خالد مدعث )
السلام عليكم ورحمة الله وبركاته
حقيقتا لم استطع إختيار بيت واحد للتعبير عن تأثري بهذا القصايد الرائعه صح لسانك يابن مدعث أنا أشهد إنك شاعر يهز المشاعر بقيفانه الجزله والنقيه من هز ......... وصف شعري من صقار متمكن ووداع حار الله عليك.... وسلم الله لسانك أخي ولد زايد وسيع البنايد أشكرك جزيل الشكر على هذا النقل المستمر لهذا الشاعر المييز
|
||||||||
|
|
|
مظلوم في العالم المتوحش 
|
06-11-2007, 10:42 PM
|
#4 | ||||||
|
رد: من روائع الشاعر ( خالد مدعث )
تسلم يا ولد زايد وسيع البنايد على هذه القصائد الجميلة
|
||||||
|
|
|
|
06-11-2007, 10:54 PM
|
#5 | ||||
|
رد: من روائع الشاعر ( خالد مدعث )
تسل أخوي على الموضوع الجميل
|
||||
|
|
|
|
21-08-2008, 04:53 PM
|
#6 | ||||||
|
رد: من روائع الشاعر ( خالد مدعث )
الف شكر للجميع على هذا المرور الطيب والرد الوااافي
|
||||||
|
|
|
|
27-02-2009, 10:23 PM
|
#7 | ||||
|
رد: من روائع الشاعر ( خالد مدعث )
صح لسانك ياولد عمي ابن مدعث وافتخر انك منا وفينا واشكر ولد زايد على هذا الانجاز الطيب
|
||||
|
|
|
|
25-03-2009, 12:41 PM
|
#8 | ||||||||
|
رد: من روائع الشاعر ( خالد مدعث )
بيض الله وجهك
|
||||||||
|
|
|
|
25-03-2009, 01:36 PM
|
#9 | ||||
|
رد: من روائع الشاعر ( خالد مدعث )
بيض الله وجهك اخوووووووي وتسلم ولا هنت تقبل مروري
|
||||
|
|
|
|
27-03-2009, 04:43 AM
|
#10 | |||||||
|
رد: من روائع الشاعر ( خالد مدعث )
|
|||||||
|
|
|
|
30-03-2009, 11:38 PM
|
#11 | ||||
|
رد: من روائع الشاعر ( خالد مدعث )
الله لايهينك ياوسيع البنايد
|
||||
|
|
|
 |
«
الموضوع السابق
|
الموضوع التالي
»
| الذين يشاهدون محتوى الموضوع الآن : 53 ( الأعضاء 0 والزوار 53) | |
العرض العادي
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| القرآن لا يغيِّب البسمة ! | أبوبندر الحطيم | :: قسم المـواضيع الـعامــة :: | 2 | 09-11-2010 06:01 PM |
| الدراسة التفصيلية الكاملة لشعر المحاورة | عقاب بن هذال ال بريك | :: قسم المــحــاورة والألــغـاز:: | 8 | 09-10-2010 08:54 PM |
| سيرة الملك خالد بن عبدالعزيز رحمه الله | عبدالله الحافر الغييثي | :: القسم الـتاريخــي الــعام :: | 16 | 30-09-2010 10:24 AM |
| القران الكريم بصوت الشيخ ناصر القحطاني mp3 | صادق الود | :: قسم الصوتيات والمرئيات والصور بما يوافق الشريعة الاسلامية :: | 8 | 02-09-2010 07:20 AM |
|
|
|
إعلانات نصية |
| منتديات صحيفة وادي الدواسر الالكترونية | |||
الساعة الآن 04:18 AM
