قصيدة معبره وهادفه للشاعر ............

[معلومات العضو صالح الجعيدي]

الشاعر الكبير بدر الحويفي له قصيدة معبره وهادفه ياليت الجميع يتمعن بابياته :-

الناس لو حاولت تكسب رضاهم = لا أرضيت واحد زعل منك عشرين
اما تجاملهم وتتبع هواهم = والا تجنبهم يقولون مسكين
هذا وأنا مالي مقاصد وراهم = مهما سمعت وشفت بمجرد العين
مالي ورا عقالهم واسفهاهم = لعلهم مني يكونون راضين
واقدّر الوافين وادمح خطاهم = وابعد محاضيبي عن المنطق الشين
واطلب عسى رب العباد يهداهم = واسعى لهم بالصلح لاشفت مخطين
والناس قدر اعقولهم مستواهم = وعند العوارف ماتميل الموازين
عند الرجال اللي بعيدٍ مداهم = يمشون مع سلم العرب والقوانين
نقل النقيلي ما يكدر صفاهم = أهل العقول بكل حاله حكيمين
يردهم عن كل زله حياهم = خوفٍ على السعمه ولاهم غبيين
الله على طيب المكارم قداهم = في منهج الدنيا وفي منهج الدين
تبين اشارات الوفاء من نباهم = قواعد الشيمه عليها حريصين
كرام السبال اللي يذري ذارهم = لعلهم دايم على العز حيين
اذكر مكارمهم ولا أنكر جزاهم = لو كان عن مدح الحويفي غنيين
أهل الوفاء والطيب يذكر ثناهم = واضعاف الأنفس مالهم بالفخر شين
والناس يعرف طيبهم من رداهم = للشمس نور وللحقايق براهين
والله خلقهم من تراب وبناهم = وخلق لهم من كل الأنواع زوجين
وارزاقهم من عند خالق سماهم = فقيرهم واللي رصيده ملايين
الدايم الله والفناء منتهاهم = وكلٍ وما حصل من الشين والزين
عالم سرايرهم وعالم خفاهم = يحكم ولا تحكم عليه السلاطين
شكّل طبايعهم ونوّع لغاهم = وانشأ لهم فوق البسيطة عناوين
ومن فيض جوده وامتنانه عطاهم = وسخر لهم صم الصخر والحياوين
لاهو بحاجتهم ولا في رجاهم = وعنده حساب المهتدي والمضلين
بلغّهم احكامه بهدي انبياهم = المهتدي واللي عن الحق عاصين
ربٍ ليا نادوه يسمع نادهم = الواحد الفرد الصمد منزل الدين
ويعلم تواضعهم ويعلم قساهم = واللي على هدي النبي مستقيمين
وعصاة خلق الله جهلهم عماهم = اعقولهم تلعب عليها الشياطين
ينسون خوف الله وهو مانساهم = رب الفلق منزل تبارك وياسين
ندعي لهم بهداية الله عساهم = يهديهم اللي كوّن آدم من الطين
اللي لمرضاته رسوله دعاهم= وصلوا على الهادي شفيع المصلين

وسلامتكم ،، وعسى أن تنال رضاكم ،، وتقبلوا خالص التحيات ،،،

 

 

 

 

[معلومات العضو دغش البطي انتقل الى رحمة الله مساء الاثنين الموافق 8-1-2007 رحمه الله واسكنه فسيح جناته]

المشرف الراقي : صالح الجعيدي

تسلم يمينك يالقرم على نقل هذه الرائعة للشاعر الكبير بدر الحويفي

إختيار موفق كالعادة لاعدمناك

فصح الله لسانك ولسان الحويفي

والله لايحرمنا منك ولامن المطاليق شرواك

تقبل ودي وتقديري وتحياتي الخالصة

محبك ومحب الجميع

 

 

 

 

[معلومات العضو ابن وتيد السباعي]

المشرف الراقي : صالح الجعيدي

تسلم يمينك يالقرم على نقل هذه الرائعة للشاعر الكبير بدر الحويفي

بيض الله وجهك على ما تقدم من قصائد رائعه وهادفه

لك اجمل وارق تحيه

من اخوك/ ابن وتيد المسعري

 

 

 

 

[معلومات العضو عبدالرحمن الشرافي]

المبدع


ابن العم الغالي / صالح الجعيدي


الله لا يهينك على نقل هذه القصيدة الجزله

وهي والله من أفضل ما قرأت من قصايد الحكم والنصح



وصح الله لسان الشاعر / بدر الحويفي


على هذه القصيدة الجزله

ولاتحرمنا من أمثال هذه القصيدة



ولك مني فائق التحية والتقدير

 

 

 

 

[معلومات العضو ابن عمير]

E]المشرف الراقي : صالح الجعيدي

تسلم يمينك يالقرم على نقل هذه الرائعة للشاعر الكبير بدر الحويفي


فصح الله لسانك ولسان الحويفي

والله لايحرمنا منك ولامن المطاليق شرواك

تقبل ودي وتقديري وتحياتي الخالصة

اخوك ابن عمير الحقباني

 

 

 

 

[معلومات العضو سالم الغريري]

احسنت وبارك الله فيك وجعل يمناك ما يجيها العطب يا صالح

على الاختيارات الرائعه والذوق الرفيع


مشكور

وعساك على القوة دايم الدوم

 

 

 

 

[معلومات العضو صالح الجعيدي]

الإخوان الغاليين/ دغش البطي ،، ابن وتيد ،، عبدالرحمن الشرافى ،، ابن عمير ،، سالم الغريري
مرحبا والله ومسهلا ،،
أولاً أبارك لكم الشهر الفضيل عسى أن يجعلنا الله وأياكم من صوامه وقوامه ،،
مواضيعي بدون مروركم ومن دون المطاليق شرواكم مــا يسوى شيء ،، أتشرف بمروركم دائماً وابدا ،،
صح ابدانكم ،،، واعتلا شآنكم ،،، و لا هنتم على مروركم الطيب.
وتقبلوا خالص التحيات من أخوكم/ صالح الجعيدي