[ لله ثم للتاريخ ] يا دواسر

[معلومات العضو نايف بن مسرع]

أخواني الفضلاء:
المحبوب الدوسري: لاهنت طال عمرك على الإطراء ولك الشكر على المرور والتعليق.
جمعاني _ غييثي: صح بدنك وبيض الله وجهك ولك مني خالص الامتنان على التكرم بالمرور.
أبوهلا1: يا هلا وغلا يا بو هلا والشكر لك طال عمرك على مرورك الجميل.
مسفر المصارير: صح بدنك يامسفر ولي الشرف في أنك وشرواك من المتابعين لما أكتب فتقبل محبتي وخالص تقديري.
حنيان بن مبارك: ألبستني أجمل الحلل وشرفت مقطوعتي المتواضعة بمرورك الرائع وجمال التعليق اللي يدل على أدبك الجم وقلمك الرائع.
فلكم جميعاً خالص محبة وتقدير
أخوكم ( نايف )

 

 

 

 

[معلومات العضو خاطر محمد الخاطر]

الشاعر الكبير نايف ابن مسرع الدوسري

صح الله لسانك على الأبيات الراائعه والجزله ونعم والله بالدواسر ويستاهلون كل ماقيل فيهم

ويستاهل اخوي الغالي ابومبارك جعله المعزه المدح فبومبارك اهل له

وسجل اعجابي اخوي نايف بقصايدك الجزله واشكرك على قصيدتك في الرسول صلى الله عليه وسلم والتي سمعتها عن طريق اخوي هايف وجزاك الله خير عنا وعن الأمة الاسلامية

تحياتي

 

 

 

 

[معلومات العضو محمد الغريري]

نايف بن مسرع


صح الله لسانك ملايين يالشاعر الفحل وهذه القصيدة لها مغازي كثيرة

أتمنى لمن هي موجهه لهم فهم مغزاها ..

والوقوف عن زرع الفتن بين ابناء العمومة ..

وعز الله انك قصيدتك تبري الخاطر يابو عبدالمحسن فبيض الله وجهك


اخوك في الله

محمد الغريري

 

 

 

 

[معلومات العضو أحمد الجردان]

	رااااااااااااااائعة وبيض الله وجهك ورفع قدرك وزادك من فضله الروعة يا ابن العم تكمن في هذا الحضور المتميز منكَ ومن أمثالك من شعرائنا الذين تعتز بهم سعدت بهذه الرائعة فشكرا لك

 

 

 

 

[معلومات العضو تركي ال فنيس]

وبيض الله وجهك

ويستاهلون ابو مبارك وابو عبدالرحمن الثناء والمدح على جهودهم لقبيلتهم

 

 

 

 

[معلومات العضو دوسري نت]

بيض الله وجهك

أتمنى لمن هي موجهه له فهم مغزاها ..

والوقوف عن زرع الفتن بين ابناء العمومة ..

وعز الله ان قصيدتك تبري الخاطر يابو عبدالمحسن فبيض الله وجهك

 

 

 

 

[معلومات العضو أبوفهيد الودعاني]

صح لسانك يـا نايف بن مسرع على هذه الجزلة ويستاهلون الطيب الدواسر كافة ولاهوب غريب عليك ذكر ربعك ومدحهم بما يستحقون ويستاهل اللي خصيتهم الإخوين العزيزين ( أحمد البليهي وهايف العماني ) دون قصور في باقي الإخوان أعضاء مجلس الإدارة فكلنا مكمل للآخر من أجل هذا الصرح الشامخ ولك وللجميع المودة والتقدير

 

 

 

 

[معلومات العضو مـحـمـد بـوفـرسـن]

صح السانك يابن مسرع

قصيدة جزلة وجزيل الشكر لك

أخوك

بو شاعر الودعاني

 

 

 

 

[معلومات العضو العماني]

الشاعر الكبير واخي الغالي نايف

بيض الله وجهك وصح لسانك واعتلا شانك على هذه الملحمة والتي تستحق ان تكتب بماء الذهب

وسلمت واسأل الله العظيم ان يطول بعمرك ويعطيك الصحه والعافية ويجعلك ذخرا للقبيلة

تقبل تحياتي،،

 

 

 

 

[معلومات العضو محمد الحضيري]

نايف صح لسانك وبيض الله وجهك

قصيد جزل من رجال جزل

اخوك:

محمد الحضيري

 

 

 

 

[معلومات العضو الذيال]

المشاركة الأصلية كتبت بواسطة نايف بن مسرع

الإهـــداء: لقبيلة الدواسر العريقة عامة
ولأمراء ووجهاء وأعيان وشعراء القبيلة على وجه الخصوص

ـــــــ ((((( لله ثم للتاريخ ))))) ـــــــ

**********
********
******
****
**
*
*
*
*

هواجسي نوادرك صفيها=ولامن طلبت اخيارها هاتيها
واياك ثم اياك غير الجزلة=ترى الهزيلة حالف(ن) مابيها
أبغى كلام(ن) ما يمله سامع=قصيدة(ن) يفخر بها ملقيها
ويطرب لها اللي للنوادر عاشق=واهل المعرفة لازم(ن) توحيها
قصيدة(ن) ما وجهت للتاجر=ولا رجيته حاجتي يقضيها
ولانيب أوجهها لراعي منصب=من شان كسب ارضاه في تاليها
وارفع قصيدي واحشمه واعزه=عن مدح ناس(ن) كان فيها.. فيها
نخيت هاجوس القصيد وجاني=وجهزتنا له دلة(ن) مركيها
جلست أنا وياه جلسة عاشق=اللي نديمه مهرة(ن) يغليها
وسريت ليل الشعر لين أصبحنا=وهواجسي عرفت وش حاديها !
ناديتنا لعيال جدي زايد=اللي حوت الامجاد فعل ايديها
أهل الفخر والمجد وأهل الشيخة=لا زعزع الملطوم جا واديها
وناديتنا لاهل المفاخر تغلب=أهل الظفر والعز من ماضيها
وأهل الكرم وأهل الجناب الطيب=واهل الفعول إلى دعا داعيها
دواسر(ن) وافعالنا مكتوبة=في صفحة التاريخ يا قاريها
دواسر(ن) وحدودنا معروفة=والسيف دون حدودها حاميها
دواسر(ن) دار الغناة اديارنا=ياما نواها طامع(ن) يبغيها
يهيم فيها طامع(ن) في خيرها=ولامن لقانا تاب من طاريها
دواسر(ن) وقفاتهم مشهودة=دون الدخيل إلى لفا ناصيها
ياما انطحوا دونه شيوخ ودولة=وقايع(ن) ما شك في راويها
نجلب نفوس العز دون وجيهنا=ونبيعها لامن حضر شاريها
دواسر(ن) للضيف يرخص مالنا=وذبح السمينة عادة(ن) نصخيها
وجيراننا تبطي وهي تذكرنا=بسلومنا اللي ماحدن يعطيها
ناسم عصا الجيران وسم(ن) بيّن=ويصير ضيف الدار هو راعيها
مع هل الطالات ناخذ حقنا=واهل الحقوق احقوقها نديها
ذكرت نقطة من محيط أمجادنا=من شان أذكّر واحد(ن) ناسيها !
ياعزوتي يالابتي يادوسر=في خاطري لي كلمة(ن) بابديها
بعد هدوء العاصفة يا ربعي=نار الفتن بيدينـّا نطفيها
وبعد خذا الشعار كلن قسمه=عندي شهادة حق يا باغيها
لا ثوّر الفتنة قليل الدبرة=اللي يصوّب يمّها ويخطيها
اللي يثوّر في خباه سلاحه=يبي يجيب علوم ويوديها
من بعد عام 2000 جانا فازع=بكراسته واقلامه يبرّيها !
يحكم على هذا.. ويدني هذا=وصار الخصم في المحكمة قاضيها
يرسم على كيفه ويرضي نفسه=نفس(ن) جهل شيطانها مغويها
وطويق ثابت والرياح اتدفه=والفرقدين بعيد... ياناويها !
الزايدي والتغلبي يا هذا=صفحة شرف بارواحنا نفديها
الزايدي والتغلبي من قبلك=صوارم(ن) تاريخها يكفيها
الزايدي والتغلبي حضارة=سادت وقو اعزومها مرسيها
العز جاهم كابر(ن) من كابر=ملاحم(ن) تبطي العدا تطريها
وباقي القبايل حقهم بالوافي=أهل الفعول فعولها تنبيها
محدن يحوش الطيب له بلحاله=أهل المكارم حقها نعطيها
وختامها.. باقول كلمة مخلص=به كلمة(ن) في خاطري مخفيها
إن العماني والعماني هايف=يستاهل البيضا وله نعليها
وإن البليهي أحمد الضيف الله=كلمة نعم له واجب(ن) نسديها
ربع(ن) توحد صفنا ماتثلمه=وافعالهم الايام ما تمحيها
ياما أتعبوا الاقدام شرق وقبلة=والمجد لاهله سكة(ن) تمشيها
والمدح ماهو حصر للي قلته=باقي النشاما طيبها كاسيها
هذي بيوت(ن) قلتها من هاجس=سريت به مع ليلة(ن) ساريها
أبي يقال: الله يبيض وجهه=من سامع(ن) لاقال: من راعيها ؟
خمسين بيت(ن) قالها ابن مسرع=وعلى الرجال الطايلة مهديها
فيا الله عساها في نظرهم جزلة=لأن الهزيلة حالف(ن) مابيها

((( وسلامة الجميع ))))

صح الله لسانك يا بن مسرع وبيض الله وجهك

رجالٍ كفو من رياجيل كفو

لا أزيد على من سبقني سوى بقول: الله يحفظك ويرحم والديك ويحرم وجهك على النار

ودمت ودام إبداعك

 

 

 

 

[معلومات العضو خالد الحقباني]

كفو وبيض الله وجهك

التغلبي والزايدي او الزايدي والتغلبي اخوان

 

 

 

 

[معلومات العضو ابو زابن المسعري]

الشاعر الكبير نايف ابن مسرع الدوسري

صح الله لسانك على الأبيات الراائعه والجزله

وبيض الله وجهك وجعل ايامك اسنين يالقرم

 

 

 

 

[معلومات العضو نايف بن مسرع]

الغالين على قلبي:

** راشد المسعري: صح بدنك وطال عمرك ولا هنت على المرور

** ابو زابن المسعري: مشكور ياطويل العمر على التكرم بالمرور والثناء

** الجابر: صح بدنك وماعليك زود يالسنافي

** سعد بن صهيب: صح بدنك وطال عمرك

** عبدالرحمن الشرافي: ماعليك زود يابوسالم وعسى الله يوفقنا لإرضاء ذائقتك والرياجيل اللي شرواك وتقبل أجمل التحايا ،،،


ولكم جميعاً خالص الشكر والامتنان
أخوكم ( نايف )

 

 

 

 

[معلومات العضو مسعر الزمامي]

صح لسانك يابن مسرع عزالله

كفيت ووفيت