الشاعر حمود بن عقرب في الشيخ ناصر ابن قريع وم

[معلومات العضو كنسل مواعيدك]

ياطيب حكام نجد وطيب مجناها/
قدامهم والجزيره مالها والي&
من فضل حكامنااللي ماجحدناها/
من عهد عبدالعزيز الخير متوالي&
ثبت جذور الصلاح وشيد ابناها/
ثم قال من ذمتي في ذمة عيالي&
واغلى الجوايز لنامشعل تبناها/
بسم الموسس ووصل احبال بحبالي&
هاجت بحور القصيد وجت من اقصاها/
غطا على كل موجٍ موجها العالي&
مشاعرٍ يبطي الهاجس ما غناها/
نوادر الفكر غناها وغنالي&
مادام ناصر وريث الجود منصاها/
والله لااراهن على العليا ولا ابالي&
شيخٍ يعسف الصعايب ويتحداها/
من خلق عينه للاول يقمح التالي&
حوّل بسوق البكار الوضح واغلاها/
واهل الملايين حطّم سوقها المالي&
حفاظت القرش جاب المال واغراها/
قال احفظوها ريالٍ ينطح ريالي&
يعيش شيخٍ على عينه تنقاها/
ماقال بقعد مثل غيري ويشرالي&
شبه الجزيره نوادرها خذيناها/
حتى رجح كيلنا عن كل مكيالي&
واكبر ميادين لامنا حضرناها/
مع المطاليق نشرب كل فنجالي&
ببل الدواسر من اقصاها الى ادناها/
يقول ناصر مهيب لشخصي لحالي&
لولا كبار المواقف ماشريناها/
يقولها ابن قريع ذرب الافعالي&
بعض النشاما لها حظٍ من اسماها/
من حكمت مبدل الاجيال بجيالي&
نكحل عيون الخصيم ونسحن ادواها/
على النقا مابها عمي ولا خالي &
كم هقوتٍ فوق راعيها قصفناها/
طبع لنا من عصر رجلي وخيالي&
اذا بطشنا بقومٍ مارحمناها/
يضرب بنا اعظم مثل لرموز الامثالي&
فينا شموخ الجبال وهيبت حماها/
ومن غيضنا الارض مايركد لها جالي&*
ولارفعنا البيارق غير سقناها/
ايلين نفني احلال وننصر احلالي&
سيوفنا حدها ماهوب لخباها/
للعدل مبدا وللجهال جهالي&
ارواحنايكرم الخلاق مثواها/
في ساعةٍ ماش غير اضلاله اضلالي&
وصف المغاتير مايمديني انساها/
تنقاد فيها القريحه فرد واجمالي&
تعين اوصافها وشلون اببداها/
ارمي شماغي صطر واطوّح اعقالي&
اببذل اقصار جهدي واتحراها/
واطلق خيالي معا سمحات الاقبالي&
وضحٍ لاتضفي عليها البشت غطاها/
فيها قرا الطرقي اللي مزهبه خالي&
خشومها الي تقول اقواس لذناها/
وظهورها كل وحده راس هيالي&
سند الغوارب تقول اتجر رجلاها/
على طربها الحق الموال موالي&
مثل قنوف السحاب ادنا مزاياها/
واعظم مزايا بعلم الخالق الوالي&
ان اقبلت كل زينٍ في محياها/
وان دبّرت قلت صيدٍ في الخلا الخالي&
فيها كرمنا ولا افضل من سجاياها/
انظر لها كيف خلقت مثل ماقالي&
سبحان من نزل السورة ومعناها/*
من فوق سابع سما استقبال الارسالي&
تبقى على الله مجريها ومرساها/
من لاخشى هيبته مافاله بفالي&
لا انشت مزون الربيع ونثرت ماها/
سقنا المغاتير فيها دق واجلالي&
الله على ساعةٍ في العمر محلاها/
معا النشاما وجوٍ *يشرح البالي&

* (( حمود بن عبيد ال بريك ))
خاص وحصري لمنتدى قبيله الدواسر

 

 

 

 

[معلومات العضو شافي بن راشد النتيفات]

ارحب يابوفيصل وصح الله لسانك والسان بن عقرب
شاعر كبير وغني عن التعريف
ويستاااهل بن قريع ماقيل فيه

 

 

 

 

[معلومات العضو كنسل مواعيدك]

صح بدنك يالغالي للامانه وهذا الكلام نابع من القلب انت ياراشد من شاعر علم ودرع وحزام وجبل وحربه قبيله الدواسر وشهادتي فيك مجروحه ولاهنت ولاخلا ولاعدم

 

 

 

 

[معلومات العضو راشد المسعري]

كنسل مواعيدك

ارحب تراحيب المطر ، حيه وحي ماجاب

صح لسان الشاعر المبدع حمود بن عبيد بن عقرب

ويستاهل المدح راع المدايح الشيخ ناصر بن قريع

وماقيل فيه قليل في حقه أبو مبارك

وانت ياغالي وافي ولا تجيب إلا الجزل الوافي

وشكراً لك من وادي الدواسر إلى الدوحة ،،،

 

 

 

 

[معلومات العضو كنسل مواعيدك]

هلا وغلا يالله انك تعيني علي راشد ابن محسن تاج علي الراس وغالي لوبعدد كل كلمه طيبه وكل صفه حسنه وكل علمً له ماقدرت احصيه
عزيز وغالي جعل ربي يطول عمرك يابومحسن يعجز لسان عن التعبير ويجف القلم مهما كتبت في حقكك ماقدر اوفيك ولكن لك كل احترامي وتقديري يا أخي العزيز الغالي كما يقال القلوب شواهد ولكن لنقل ان مانعبر سوا كان بالكتابه او مانحس به تجاهك ياراشد فهو والله جزء صغير جدا لما في قلوبنا من حب وتقدير لك
انا هذه المره سمحت لي الفرصه لاعبر بما كان مكبوت في خاطري من مشاعر واحاسيس اشكرك بكل ود وتقدير

 

 

 

 

[معلومات العضو الكاتم]

مشاعرٍ يبطي الهاجس ما غناها/
نوادر الفكر غناها وغنالي&
مادام ناصر وريث الجود منصاها/
والله لااراهن على العليا ولا ابالي&
شيخٍ يعسف الصعايب ويتحداها/
من خلق عينه للاول يقمح التالي&



كفوووو يابن قريع وصح لسان حمود بن عبيد

 

 

 

 

[معلومات العضو خالد المشاويه]

صح الله لسان حمود بن بن عبيد بن عقرب

وابن قريع يستاهل ماقيل فيه


جزيل الشكر والتقدير

 

 

 

 

[معلومات العضو عبدالرحمن بن فلاح آل بريك]

صح لسان الشاعر حمود ابن عقرب ويستاهل ابن قريع ما قيل فيه . ولا هنت أبو فيصل على النقل المميز .