قصائد رائعه لاتفوتكم

**معلومات** **العضو** · 26-03-2009, 03:24 PM

يسعدني ان اضع بين يديكم مساجلات اعجبتني واتمنى ان تعجبكم وهي بين شعراء كبار وغنيين عن التعريف
هذه القصيده للشاعر لافي حمود الغيداني ردا على مجاراة الشاعر غازي بن عون
لاحدى قصائده:

غردي يالقريحه فالبيوت تغريد= وطوعي عاصي المعنى العنيد الشرود
كل ماضمأ الشعر كوني ونعم العضيد = ورديني على صافي قراح العدود
واطلعيبي على شمخ جبال القصيد= مايحب النزول اللي يحب الصعود
شعر ابن عون حرك ساكنن مستهيد= مثل ماتحرك الريح امهات الرعود
لاتكلم ماقال ألا الكلام المفيد = واعذب الشعر مايحرك داخلك الركود
شعري الجامد الخامد صحا من جديد= مثل مايصحي البركان عقب الخمود
استفزه شعر غازي رويداً رويد = لين طالت زماليقه على عود عود
اثمرت واينعت مثل امهات الجريد= يوم مع طلعت المرزم نماها يجود
جات غيداء تضم من اجمل الغيد غيد= واشغلتني وانا حتى بوضع السجود
اتخيل شكل نظم العقود الفريد =واتمعن بجوهر مبهمات السدود
قيدن عن سواهن مهرة الفكر قيد =وايقظن فكري الغافي ايقاظ الرقود
لين خلن مابين الهايده والمهيد = مثل مابين روح الموقده والوقود
شردن مايضويهن خيال البليد = ولايتحمل عنا ترويضها الصعب كود
شاعرن مثل شاعرهن عديد شديد = عنهن وفيهن وفيهن وعنهن يذود
ندره من يويق اعماقها يستفيد = كنها وصفة علاجن لمرضى الكبود
بالهديه ومضمون الهديه سعيد =دامها جات من غازي عريب الجدود
روحها في بنات انتاج فكري يشيد =بوح رمزن من رموز القصيد معدود
شاعرن في بنوك الشعر يملك رصيد= مثل ماتملك اصحاب النقود النقود
الشهاده منه والله عليه شهيد = مكرمه من كريمن مالفضله حدود
يوم احدد اهمية صداها تحديد= كنها فيض مكرمة من آل السعود
تاج لعاج من هداج تيماء التليد =والله اني عليها من الكثير محسود
جوهره نالها محظوظ من كف سيد = سيد من ضمن سادات القصيد الاسود
شعر ابن عون مثل الحر بين العبيد = يوم بالشعر بيض ويوم بالشعر سود
خلده في عقول أهل العقول تخليد =وافضل الشعر مايحضى منه بالخلود
له اسموع البشر تقول هل من مزيد = كل ماطلق عنان المفرده للوجود
وزبدة الهرج والهرج الصحيح المفيد= شاعرن ماهو بحاجة شهادة شهود
كثر ماتغرد طيور الصباح تغريد =له تحياتن اجمل من عبير الورود

هذه القصيده جواب من الشاعر غازي ابن عون على الشاعر لافي الغيداني
عندما اجتمعوا في مناسبه عند مطلق الحويقل حسب ماتضح من القصيده:-

-

صارلي عقب عيدين السنه زود عيد= جعل يوم جمعنا بالنشامى يعود
في محل تشد إله النضا من بعيد = شامخ تدهله من كل صوب الوفود
بيت مطلق ولد سمي ولد الوليد = الحويقل لبيت الجود مثل العمود
شاده الجد الأول وأخره للحفيد = ولاتهاون حفيده زاد مبناه زود
شيّد البيت زايد واعتنابه يزيد =ولاسلك مسلك اللي ينقضون العهود
يشاطرونه خوانه مااشتقابه وحيد =كل منهم بفعل الطيب يرقى سنود
والدليل ان هاك اليوم عيد سعيد =يوم واجهتبه قاعد ولافي حمود
السمر غردت بلابله بالنشيد = ومن عبير الشعر شميت ذعذاع نود
ذقت تمر الخلاص اللي طلاعه نضيد = در ديدالمشاعر مثل در الصعود
من بعد ماجلبنا الشعر صرنا مديد =يوم شفنا عيون الشعر مثل العقود
اشهد انه حصلي ماتمنى وأريد = والمشاعر على الفرهود مثل الورود
وعقبها قام فيلم الذاكره يستعيد= ساهيات العيون موردات الخدود
متعبات المحايل شايعات الوديد = ضامرات الخواصر ناقضات الجعود
منافسات الضبى بعيون وبطول جيد = ساحرات المسامع فارعات القدود
وصار فكر الشقي بين الغواني شريد =بين هيفاء وريم وناديه والعنود
ومن فضولي مسكت زمام هيفاء بالايد = ومن غرامي بها جاريتها في نجود
ويوم جت لافي بن حمود عبر البريد = احتضنها وتوج رأسها بالردود
لاح براق شعره فالخيال السديد =وخصني بالنصوب اللي مطرها حشود
منبع الجود من جوده بمدحي يزيد = بالمدايح كساني بالثنا ثوب جود
حطني بالبلاغه في مقام العميد =وحط شعري فريق وشعر غيري جنود
واشكر الطيب اللي للبلاغه يجيد =ورايعاته على شعار واجد تكود
ولاقنص في قفر صيد الفكر مايصيد= غير صيد يثمن مثل صيد الفهود
ولافي لعزوته فالطيب صرح مشيد =هم هل الجود وانصار الوفا بالوعود
جودهم فالملا ماهوب توه وليد =حرب تاريخهم من عصر عاد وثمود
عن مرب العشاير يبعدون الضديد= وهم هل الجود واهل المجد واهل الصمود
وعقب ختم القوافي للبدايه نعيد =جعل يوم جمعنا بالنشامى يعود

وهذه القصيده رد ومجاراه من الشاعر مطلق الحويقل لقصيدة غازي بن عون السابقه:-

هاض صدري وفكري وابتداء من جديد= وقمت أتابع وأحايل كل بيت شرود
ودي آخذ خيار وودي آخذ مفيد = والمجارى لشعار البلاغه يكود
ماتطيع القوافي عقب راحت بديد = عقب غازي ولافي وش بقى من ردود
كل بيتٍ رفيع وساس بنيه جويد =احتموه النشامى والصحيح معدود
مابقى غير أدوّر للغفل بالرويد = النوادر خذوها طيبين الجدود
وابن عون الحقيقه ماش دونه محيد= عقب وردت حيامه ماش عنها صدود
فزت الها المشاعر بالقبال الحميد = مثل فزت مود شاف منهو يرود
ويوم جتني حيامه بالكلام الوكيد = ماتعوّد وهي تشكي عطاش الكبود
قدمها الجم صافي والضوامي تعيد =لين حتى تصّدر عقب صارت ورود
من قراحٍ حلاته مع عروق الوريد = ينعش السمع والافكار ولها يعود
النشاط الحقيقي والخيال الفريد = عقب جاته هدايا الجود ياجب يجود
عقب جاته هدايا من كلامه رشيد =سابك البني والمعنى وسيع البنود
شايع الصيت بين الناس بيت القصيد= دايم(ن) للنودار والغزايز يقود
يعتني بالجزيل ولايحب الزهيد= والزهيده ماهي من طرح كل محمود
دايمٍ(ن) يابن عون لكل جزله تفيد = ولاش نعم ٍ يحصّل مابذل به جهود
امتطيت الجواد لكل فعلٍ مجيد = والروايع من انتاجك فري قود قود
وعقب ماخصّني من فيض مدحك مديد= وصرت أنا بالمدايح فوق قيس الحدود
واجب إنا نبادلك الثنا مانحيد = وفي قليلٍ من امجادك نعد ونشود
ياعزيزٍ مع أهل المجد مشيك فديد= وللعوارف تشارك في رفيع الحيود
ولايهوم المعالي كود رجّال حيد = ماش خبلٍ كسب له في حياته وجود
والنشامى تنافس بالبذر والحصيد= ومن عطاه المهيمن مال مده لدود
مايسوق المواهب غير رب العبيد = جلّ شأنه عظيم الشان خير معبود
والتعارف أمرنا فيه محيي الهميد= عرف روس الرجال ولاوجيه القرود
والحقيقه معرفة كل رجلٍ سديد =وصفوها النشامى طيب عنبر وعود