انا اول كلامي بذكر الرحمن = علاّم مايخفى على الانسان
ومن بعده اصلّي واسلّم على النبي= شفيع امّته لانصّب الميزان
يقول ابن ذيب(ن) كلام بالمثل = في وسط صدره تقرع القيفان
هاضت هجوس الشعر وانساح خاطري = وبدع المثايل للعريمي زان
وانا الى منّي تهيّضت بالغنا = تجي المعاني كنّها الودّان
تمطر على فكر(ن) كما مخصب الثرى= وينبت زهور(ن) زاهية الالوان
واعاف من بين المعاني هزيلها =وانقى من اللي ندّر وسمان
يالله يالمطلوب ياجزل العطا = يالواحد المعبود يالمنّان
طالبك عاوني على بدع المثل = واجعل جنى غرّ المثايل دان
يالله عسى دعوة نبيّك تنوبني = اللي بها ساق المثل حسّان
ويارب هوّن كلّ ماكان كايد = ودنّ البعيده وافتح البيبان
والهمني القول السديد وقدّني = يامفهّم(ن) داوود وسليمان
الوذ بك من كلّ هم وضيقه = حيثك دليل التايه الحيران
ياماحلا في تالي الليل سجده = اغسل بها نفسى من الادران
واطرح بها ذنب(ن) على الكتف هازعه= واملى بها روحي من الايمان
اعزّ لحظاتي الى انزلت جبهتي = لله في جوّ(ن) من الجيّان
خضوع(ن) لمن هو لااله(ن) غيره = الواحد المعبود والديّان
اللي خلقنا من مجرّد نطفه = سبحان من لاراد بامر(ن) كان
هدانا الى التوحيد واللّي غيرنا = يمسي ويصبح في وحل الاوثان
وانزل علينا افضل الكتب كلّها = محفوظ من زود(ن) ومن نقصان
وارسل لنا خير البرايا محمد = اخير من يمشي من انس وجان
وشرع لنا خير الشرايع واتمّها = واظهر لنا دينه على الاديان
وسقانا من العدّ القراح الصافي = واللي سوانا مجدب(ن) ظميان
وغذانا من الزاد الصحيح وغيرنا = يمسي ويصبح طاوي(ن) جوعان
وكسانا بفضله من عرانا له الثنا = والغير جنبه كاشف(ن) عريان
وانعام ربي من شكره له يزيدها = ومن قال انا قارون ذلّ وهان
فلك الحمد ياربّي مع الشكر والثنا = عداد خلقك ياعظيم الشان
ولك الحمد وزن العرش وارضا نفسك = ومداد كلماتك وما قد كان
مالي من الاعمال وانت ابخص بي = فالسرّ عندك كنّه الاعلان
يكون كلمة لااله الاّ الله = وحبّك وتعظيمك من الوجدان
احبّك واحبّ اللي اصطفيته من البشر = ثم اجتبيته من نسل عدنان
الطاهر اللي عظّم الله مكانته = احبّه واحب اّله مع الاخوان
واحب الصحابه واتفاخر بحبّهم = غمّ(ن) على اهل الرفض والبهتان
صدّيق الامّه هو مع فاروقها = جيرة محمد حازها الشيخان
والثالث اللي جهّز الجيش وحده = الله يجازي بالثنا عثمان
والرابع اللي طيّب الله حظّه = زوج البتول وفارس الفرسان
وابو عبيده عامر مع سعد = مع الزبير وعابدالرحمن
وسعيد مع طلحه وذولا عشره = العشرة اللي بشّروا بجنان
وباقي الصحابه ماننزل قدرهم = خصّ(ن) اهالي بيعة الرضوان
واصحاب بدر اللي محى الله ذنبهم = اللي ثبتوا يوم التقى الجمعان
وياكاتب اكتب لا تناسى تكفى = اللي تبووا الدار والايمان
الانصار انصار الرسول وفزعته = هم درعه الضافي على الامتان
الانصار جعل اللي ينزّل قدرهم = يحشر نهار الحشر مع هامان
سلّوا سيوف الهند من دون النبي = وحموا جنابه والعدو مهان
اهتزّ عرش الله لموتة اميرهم = انا اشهد انه راجح الميزان
وعلامة الايمان في الرجل حبّهم = حيث انهم للدين هم عنوان
وعلامة النفاق في الرجل بغضهم = حيث انهم للمرجفه عدوان
الانصار من يقدر يضحّي مثلهم = وقت الخصاصه لا غلت الاثمان
الانصار من يقدر يسوّي سواتهم = الى عبس وجه الزمان وشان
الانصار من يمسك شبا السيف مثلهم = لاكلّحت الانياب في الميدان
الانصار من يقدر يعدّد فضلهم = ايمان واسلام وتقى واحسان
في يوم بدر(ن) يوم هبّت مكه = على عماها ساقها الشيطان
الف(ن) من الفرسان تعداد جيشهم = ومن لاغزى جهّز فرس وحصان
وحول المدينه صاح في الناس النبي = ياعصبة التوحيد ردّ الشان
اما نقابل خصمنا ونردّهم = ولاّ نعوّد كن ماشن كان
فلبّوا له الانصار والصوت مرتفع = حنّا فدى لك من عنا الزمان
حنّا فدى لك يارسول الرحمه = ولا خير في قول(ن) بلا برهان
ماهي بكلمة من زهمهم موسى = اذهب وربّك قاتلوا العدوان
والله لو تبغي بنا خوض البحر = خضناه مايطري حد(ن) نكفان
ان راده الله شفت بالعين فعلنا = فحنّا رجال في اللقا صبران
وحنين للانصار يشهد بالفخر = والله ايتكلّم لوّ فيه لسان
لكنّ ياتاريخ لا تجحدها = وياليل حدّث واحك يازمان
غارت هوازن وانفرا ثوب العزى= وعجّ الرمك ثوّر كما الدخان
وكلّ(ن) شرد يبغي النجاة لنفسه = يوم اعجبتهم كثرة الاخوان
ثم صوّت العباس للناس فانثنت = كتايب الانصار كالعقبان
قوم(ن) تناحي خيل الانصار بالقنا = ماهيب والله والشبب باقران
فمالوا عليهم ميلة(ن) تعجب النظر = وبان الذهب الاصفر وغيره بان
وجابوا الغنايم والغنايم واجد = غنايم(ن) زادت على الحسبان
ثم وزّعت بين القبايل كلّها = عمّت حضرهم واغنت البدوان
الانصار من روس العدا تنثر الدما = وفيض الغنايم راح للعربان
فاخذوا بخاطّرهم على قسمتها = ولو كان مايقصد بها حقران
فدرى الرسول وقام فيهم خاطب = وقال ما معناه: يالظفران
وش كلمة(ن) تطرى وجتني منكم = وماغاب من شيّ(ن) علينا بان
ماجيتكم ضلاّل ثم اصبحتوا = عبّاد لله من بعد الاوثان
ماجيتكم متناحرين وصرتوا = عقب التناحر بي هل(ن) واخوان
قالوا بلى ياخير من نقتدي به = ماعاش من يجزاك بالجحدان
ثم قال لو تبغون قلتوا كلمه = فيها صدقتوا والصدوق معان
لفيت من مكّه طريد(ن) زابن = وحنّا وقفنا لك كما الضلعان
ولفيت من قوم(ن) تكذّب دعوتك = وحنّا قبلناها بلا نكران
ونصرناك بالروح العزيزه وبالولد= وبالسيف الاملح والشبا والزان
قالوا لك المعروف اول وتالي = والدمع منهم تنثره الاعيان
ثم قال ماترضون بي قسمتكم = والناس تذهب بالغنم والضان
قالوا رضينا بك وحنّا لنا الشرف = انت الغنيمه واي كل شن فان
فدعا لهم بالدعوة المشهوره = يارب تجزاهم رضا وغفران
هذي مواقفهم وهذي فعولهم = نجم(ن) يشعشع في سما السهران
الله يرزقنا بجيل(ن) مثلهم = يبدل لنا عسر الزمن ليان
وانا اقول طيب الجيل يرجع للنسا = يطيب منهن وان تردّن هان
والبيض مايصلح بدون امّاته = والبيت مايبنى بلا عمدان
وقد قالها الشاعر وهو باخص(ن) بها = يضرب على معناه بالنيشان
الام مدرسة(ن) اذا اعددتها = اعددت شعب(ن) طيّب الجدّان
من شان هذا القول عندي كلمه = لك ياصليب الراس يابن فلان
لاتاخذ العذرا على شان زينها = الزين ظلّ(ن) مايل(ن) فتّان
ولاتاخذ العذرا على شان مالها = المال يفنى والزمن خوّان
ولاتاخذ العذرا تبي الجاه والحسب = كم عزّة(ن) يقفى لها هوان
لاتاخذ الا من يسرّك دينها = الدين راس المال للانسان
اللي تسرّك في وجودك عندها = وفي غيبتك حفظ ونقى وامان
البيت جنّتها وجنّة زوجها = لاهوب لا سجن(ن) ولا سجّان
سلامي على اللي ماتعرف الموضه = موضة هل التلمود والصلبان
شوف الفتاة بدارهم كيف صارت = سلعة زبون(ن) بارخص الاثمان
هذا على المسرح يجرجر بضاعته = وهذا بصورتها على الاعلان
وسلامي على اللي ماتبيّن وجهها = يرفض حياها مبدأ الهوان
اللي سقت بالدين نبت الحشمه = واثمر ثمرها في طرف الاغصان
وسلامي على اللي ماتحزم الشيله = في الراس مثل الشايب الوجعان
ولا علّقت عباتها بكتوفها = ولا قصّرت من تحتها الفستان
وخلاف ذا عندي بعد نصايح = وتراها على ماقيل بالمجّان
تجمّل بتاج الصمت في كل مجلس = ولا تظهر الكلمه بلا ميزان
ترى لسانك حيّة(ن) في جحرها = لايلدغك يابن ادم الثعبان
تبني من اعمال الصلاح مباني = طوال(ن) وهو يهدم لك البنيان
والعين لاراغت وزاغت عن الهدى = فاخير من راع البصر عميان
ياويل قاضي الارض من قاضي السما= وياويل راع الدين م الديّان
وياويل من ينفق بالايمان سلعته = وهو عند ربّي كاذب الايمان
هو مادرى ان التاجر الصادق الوفي = مع الانبيا له صحبة ومكان
ومن باع بالدنيا على الناس دينه = فيبشر على ماقيل بالخسران
ياشن قريب وكن ماهو بحاصل = نضحك على انفسنا خفا وبيان
الحيّ ياقربه من الموت والذي = ياتي قريب وتكشف الغطيان
وين القلوب اللي تذوب من الكمد = لادنّس العفّه هل الطغيان
وين العيون اللي تهامل بدمعها = لا شاهدت طفل(ن) وهو حيران
وين الثياب اللي تضايق على البدن = الى نهب سرّاقها اليتمان
وين الضمير اللي يعذّب صاحبه = لاصاب ذنب ويقلقه لاخان
وين الهموم اللي تعيّفه الكرى = لا جا ينام ومن ظلم سهران
هذي بيوت الشاعرابن عريمه = الدوسري من مارثة ودعان
تواردتني مثل خيل(ن) شرّد = تجاول وانا طوّعتها بعنان
عنانها فطنه وعشرة ندّر = زحول(ن) عواريف(ن) طوال ايمان
في الحرب سيف وفي المجاعه منسف = واهل حكمة(ن) تقطع ظما الظميان
اصوغها من خاطري طرب(ن) لها = صوغ الذهب والدرّ والمرجان
معنى الذهب يزهى على درّ حرفها = محبوكة(ن) معنى وبحر واوزان
الوزن من بحر(ن) طويل وافي = نونيّة رنّانه القيفان
تنساق من فكري على قدر طاقتي = والجود م الماجود مهما كان
وبعض القوافي لو تكرّر لي العذر = القاف شاب وفي الصدر دندان
والقصد ماهو برقة المتزيّن = خلّيت هذا لريشة الفنان
القصد معنى في كلام(ن) واضح = يحمي السليم ويبري المرضان
اهديتها هدو(ن) ولا ابغي لها ثمن= الاّ من اللي كوّن الاكوان
هذا وصلّى الله وسلّم على النبي = ماغرّد القمري على الاغصان
والحمد للي عانّي في نظمها = باسمه تعالى نختم البيان