لام الشاب نايف اليوسف المسجون بامريكا تنخى فيها الامير سلطان

[معلومات العضو عبدالرحمن الشرافي]

عندما يحترق على فلذة كبدها قلب الام تخرج اصدق الكلامات تعبيرا وهذه القصيده المؤثره المبكيه لهى اكبر دليل قصيده لام الشاب نايف اليوسف المسجون بامريكا تنخى فيها الامير الشهم سلطان :

أصيح بأعلى الصوت نايف فقدناك= عساك تسمع صرختي يوم أناديـك
أنا أمك اللي عيدهـا يـوم لقيـاك=يا سعد نفسي لو عيونـي تلاقيـك
والقلب ناره تشتعل عقـب فرقـاك=ما تطفي النيران يـا كـود أياديـك
لبست ثوب الحزن بعدك ولا أنساك=والنوم ودع يـوم غابـت لياليـك
تاهت بي الخطوات ودروبي أشواك=والدمع من عيني على الخد يبكيـك
أراجع الماضـي وأعيـد ذكـراك=تشدني الذكـرى وأبكـي لماضيـك
سجين بالغربة ويـا كبـر بلـواك=الله يعينـك دايـم فـي بـلاويـك
هذا القدر مكتوب ، مكتوب ما جاك=اصبر عسى الله بالنهايـة ينجيـك
بديار بوش سجنك الموحش هنـاك=يا ليت لي قدره على الدرب واجيك
يا سجن أرفق مسندي وسط مبنـاك=ما شاف شمس ومظلمـات مبانيـك
مدري يا عمري كيف الأحوال وياك=طمني عنك طمـن أمـك تحاتيـك
من يغسل هدومك ومن قام يرعـاك=ومن يطبخ الوجبات منهو يواسيـك
ومنهو الذي بالليل لا نمت غطـاك=خوفي عليك البرد بالحيـل يوذيـك
ودي قبل موتـي مشاهـد محيـاك=ودي أضمك في يدينـي وحاكيـك
يا حافر قبـري دخيلـك رجينـاك=تحط فوق النصب نيشان بوصيـك
يمكن يحين الوقت ترجـع لمربـاك=وتزور قبري مسرع في خطاويـك
يا سيدي سلطـان تكفـى طلبنـاك=ياراعي الفزعات تشكـر مساعيـك
شلال طيـب منبعـه دوم يمنـاك=خيرك مغطي كل بيـت باراضيـك
وقت الشدايد ما لها غيـر شـرواك=يبشر بعزه كل من جـاك ناصيـك
ياسيـدي سلطـان حنـا فـدايـاك=بارواحنـا نفديـك نفديـك نفديـك
الجود وأنت الجود يمشي بممشـاك=يمشي وراك ويتبعك مـا يجاريـك
يتعبني مدحك لـو أعـدد سجايـاك=والشعر يرفع رايتـه مـا يوفيـك
يالله عسى المولى يصونك ويرعاك=ويعود نايف يا عسـى الله يخليـك
أبختصرها يا ذرى كل مـن جـاك=شكوى تجيلك تنتهـي مـا تعديـك

وسلامتكم..





تقبلوا تحياتي...

 

 

 

 

[معلومات العضو مسفر المصارير]

الأخ : عبدالرحمن الشرافي

سلمت يمينك على النقل المميز

صح الله ألسانك وألسان أم نايف

حقيقه قصيده محزنه

عسى الله أن يفرج همها ويخرج ولدها لها

الله لا يهينك يا عبدالرحمن

تقبل كل الود ولتقدبر

اخوك : مسفر المصارير

 

 

 

 

[معلومات العضو محمد ال بو زمام]

انشاءالله ابو خالد مايقصر . . . الله يفرج همها ويخرج ولدها لها سالم غانم باذن الله . . .


اخوي الغالي ( عبدالرحمن الشرافي ) بيض الله وجهك على القصيده . . .


تقبل تحيات اخوك محمد بن عبدالعزيز . . .

 

 

 

 

[معلومات العضو ذياب اليامي]

عبد الرحمن الشرافي

الله لايهينك ويعطيك العافيه على النقل الممتاز والرائع

والله يرد عليها قرة عينها

تقبل فائق احترامي
اخوك
ذياب

 

 

 

 

[معلومات العضو خرجاوي]

مشكور أخوي الشرافي على هذه القصيدة و الكلمات الصادقة الي تحتويها



من قلب الام وما قصرت والله


يرحم أمهاتنا وأبوانا والمسلمين أجمعين





أخوك/ خرجـــــــــــــ فتى العمور ـــــــــــــاوي