قصيدة العتيبي في الشيخ حفيظ آل حفيظ

[معلومات العضو عازف شجن]

(يا حفيظ يا حافظ العادات)
أهداء الى الشيخ حفيظ بن عجب آل حفيظ الدوسري
عند الدواسر هل الوقفات **** ودي بجيبن يوديني
من همي اللي عليه اثبات**** وان جيت ابغفى يصحيني
لو هي عليه انا بالذات**** ما همني كثر ما فيني
لكن همي زهور وجات**** من كبد كبدي تناديني
يبون مني لهم هقوات **** ابني لهم عز بيديني
وش عذري ان كثرت الحاجات****والعمر ما عاد يمديني
وشلون ابصبر على العبرات**** والدين همه يقزيني
سجين ولا اقدر على السجات**** ما ني سجين السجاجيني
سجين همي بصدري بات**** يمسي ولا اصبح يمسيني
وليا بغيت اقطع الفرجات**** عيت ديوني تخليني
والقلب لا زادت الدقات**** يذكرك يا بن السلاطيني
يا حفيظ يا طيب السيرات**** يا حفيظ لالا تخليني
يا بن عجب يا كريم الذات**** جيتك وشوفتك تكفيني
يا حفيظ لو حطو الشيخات**** في كف شيخ الموازيني
كفتك ترجح من الميزات**** شيخ وكريم الكريميني
جيت اشتكي لك من الشركات**** اللي تمص الدماميني
ورطت معهم مع الورطات**** اللي تهد الفهيميني
والاسهم اللي على الغرات**** اخذت قلوب الكثيريني
تلعب على الناس بالشاشات**** وضاعت صلاة المصليني
يا حفيظ يا حافظ العادات**** يحفظك ربي وينجيني
يا حفيظ يا طيب الشبات**** نارك تشب وتقديني
في ليلن اظلم من الظلمات**** نورك على الدرب يضويني
لك طاله ان كثرت الطالات**** ما مثلها فالعريبيني
يمنى طويله ولك هبات**** تقصر يدين الضعيفيني
يا حفيظ يا شامخ الهامات**** شجاعتك ورث جديني
عزيت دين الله بحزات**** تشيب فيها الغلاميني
نصرت محمد عن الهزوات**** قوم الكفر والشياطيني
يا جعلهم هادم اللذات**** تاطا عليهم حذاييني
أكرمكم الله عن الهزوات**** جعل الكفر للسكاكيني
حشمت ربعك ولك وثبات**** فالطيب فقت الكثيريني
ربعك حزامك عن الصكات**** قوم اشكره من عريبيني
يا طيبهم حزت النكبات**** مثل الصخر والبراكيني
جمعت ربعك على الكرمات**** ما غيرتك الملاييني
لو اتمنا من المنيات**** والامنيه من يمنيني
انك عتيبي من الهيلات**** و الا من الربع الادنيني
حظ الدواسر رفيع الذات**** احفيظ حظ الحظيظيني
وعند الدواسر بدعت ابيات**** و احفيظ منهم يكفيني
وصلاة ربي عدد من بات****واعداد موتى وحييني
شعر منصور بن حمود بن عبدالله العتيبي

 

 

 

 

[معلومات العضو فارس الدبالين]

صح السان الشاعرمنصور بن حمود بن عبدالله العتيبي ملايييين

قصيده جزله وزاد جزالتها من قيلة فيه الشيخ حفيظ آل حفيظ الشكره الله يحفظه

ولاهنت (ياعازف شجن) على النقل المميز والمبدع اطربتنا ونومستنا في مدح

شيخ من شيوخ الدواسر الله يديم عزهم على طاعه

ووالله انّه يشوش الراس لآذكرت المدايح في الدواسر

تحياتي ...

 

 

 

 

[معلومات العضو ابومبخوت الدوسري]

فارس الدبالين اسمح لي اسرق ردك هههه صح السان الشاعرمنصور بن حمود بن عبدالله العتيبي ملايييين قصيده جزله وزاد جزالتها من قيلة فيه الشيخ حفيظ آل حفيظ الشكره الله يحفظه ولاهنت (ياعازف شجن) على النقل المميز والمبدع اطربتنا ونومستنا في مدح شيخ من شيوخ الدواسر الله يديم عزهم على طاعه ووالله انّه يشوش الراس لآذكرت المدايح في الدواسر بيض الله وجهك يا السنافي ويعطيك العافية ولاهنت تقبل ارق التحاااااايااااااااااااا

 

 

 

 

[معلومات العضو عازف شجن]

شكرا على المرور والشيخ يستاهل الحب والتقدير