نسعى على الدنياء وبقعاء قصيره// واللي يمر العبد مقضي ومقسوم

**معلومات** **العضو** · 07-12-2010, 08:49 PM

العمر فرصه والمقادير خيره=وعمر الفتى وان طال لابد له يوم
ياصاحبي سود السنين الأخيره=اخذت منها درس وافي ومفهوم
في كل يوم والرحى المستديره = تظهر عبر واحداث واحزان وهموم
نسعى على الدنيا وبقعا قصيره=واللي يمر العبد مقضي ومقسوم
لو كل رجالٍ يحكم ضميره=ماشفت بين الناس ظالم ومظلوم
واللي ماياقف للامور العسيره=ماهوب في نطح المهمات ملزوم
يرتاح وامواج البحر لا تثيره=ماهوب ملزوم على الموج والعوم
واللي اهمومه في حياته كثيره=لايطلب الفزعه من انسان معدوم
وسيف ماتفرق سلته من جفيره=ماهو امفرج لك الى صرت مضيوم
البعد من بعض النفوس الحقيره=فود وسعة بال من الضيق مزحوم
عزلت من رفقت اقلال البصيره=وعرضت خلان الرخى برخص السوم
ليت الردي مهما تقدم مصيره=تظهر علي وجهه علامات ووسوم
اللي على الصاحب ركابه مغيره=نلقى بداله من هل الجود شغموم
نلقى بدال ديار الانذال ديره=ونلقى بدال القوم ياصاحبي قوم
وعد ماتعرف وارده من صديره=اخير لك فرقاه و السد مكتوم
الحظ طيب والهقاوي كبيره=والرزق عند منشي السحب معلوم
لاصار مال الرجل بالطيب سيره=وش ينفعه عمره الى صار مذموم
بعض العرب ماله مع الناس جيره=وبعض العرب سيفه من الحقد مثلوم
وبعض العرب لو ميز الوقت غيره=يشيل له قلب من الخبث مسموم
وبعض العرب مثل الحصاة الصغيره=ماهوب كفو الكبر والبشت والزوم
واللي مايحمي محكمات السريره=ماهوب يحمل شرهة الود واللوم
ياصاحبي جاتك البيوت المثيره=اخذ المفيد وباقي العلم مختوم

**معلومات** **العضو** · 07-12-2010, 09:19 PM

اررررررررررررررحب يابوسالم

صح الله لسانك ياذيبان
مافيك حيلة
لاهنت على الرائعة لاعدمناك

**معلومات** **العضو** · 07-12-2010, 10:16 PM

محمد بن سالم الخظراني

صح لسانك واعتلى شانك شاعر جزل

والله لايهينك يالقرم

تحياتي وتقديري

**معلومات** **العضو** · 07-12-2010, 10:23 PM

الله الله اشهد لله انك عبرت عما في خاطرك يابوسالم
وهذي الناس اجناس كم واحدا يغرك بمظهره والى عرفته
طلع بالعكس صح لسانك والله ان كل بيت اجمل من اللي قبله
وهذا يدل على طول نفسك الشعري الذي قل من يمتلكه
في ذا الوقت صراحة مهما كتبت امام هذه المعلقة قليل بحقها

**معلومات** **العضو** · 07-12-2010, 10:50 PM

ابوسالم محزمك مليان كما هي عادتك في القصائد الرائعه الملغمه المثيره ...
صح لسانك واعتلى شانك ياأمير الكلمه المبهمه والمفرده الصعبه على القايل والسهله على المتلقي..مهما سطرت من احرف لاتفي لك مايكنه لك الفؤاد من تقدير واعجاب..
تقبل مرور اخوك المتواضع وخالص تقديري لك

**معلومات** **العضو** · 07-12-2010, 11:05 PM

الشاعر الفذ

ابوسالم

سلام الله عليك

وعلى هذه القصيدة التي بحق وحقيقة انها مثيره

ابوسالم

صحيح ان الدنياء قصيره

والله ثم والله ثم والله

ان الرابح الي بالدين والطيب متمسك

امتعتنا بقصيدة لم تدعنا نمر عليها مرار الكرام

بل مررنا عليها وبقت في ذاكرة المار

وهذا ماعرفناه من اخوانا

قبيلة الخضران

الشعر الجزل

وكامل معاني الرجولة والقرامة

وتقبل مني أعذب التحايا واعذبها

أخوك حفيد الأمراء

**معلومات** **العضو** · 07-12-2010, 11:07 PM

الشاعر الرائع محمد بن سالم الخضراني

أبيات جزله ومعاني رائعه

صح الله اللسانك يامبدع ولاهنت على هذه الجزله

**معلومات** **العضو** · 07-12-2010, 11:44 PM

لله درك شاعرنا الكبير محمد بن سالم الخضراني

ابيات تسطر بماء الذهب

معلقة من المعلقات

صح الله السانك واعتلى شانك

الابداع ابداعك والتألق تألقك والتميز تميزك

دائماً تتحفنا بمثل هذه القصيدة الجميلة والتي تهيض ما في القريحه

فشكرا لك وابداعاتك المتواصلة

**معلومات** **العضو** · 08-12-2010, 12:58 AM

ابو سالم

صح لسانك و أعتلى شانك

قصيدة جزله من راس جزل

جزله بكل ماتحمل من معاني

لله درك على نظم هذه القصيدة التي في قمة الروعه , , معانيها ثمينه وقوافيها جميله

وفيها من الدرر واسوار الذهب المحبوكه

لله درك على هذا الابداع الرائع , ,

واتمنى عدم البخل علينا بكل ماتحتويه جعبتك وقريحتك الشعريه . . .

ودي وتقديري , , ,

**معلومات** **العضو** · 08-12-2010, 02:15 AM

شاعرنا الكبير ابوسالم

والله مدري وش اقول ولا وش ازيد على الاخوان اللي سبقوني

والله ان الكلام يوقف عاجز عن الشكر على هذه الدره

فعلا دره وتستحق الاعجاب

وتستحق التقييم واقل شي في حقها

ابيض وجه وصح الله لسانك ياذيبان

شاعر,وقرم,وخلوق

ولله الكمال عسى الله يحفظك ويطول بعمرك على طاعته

**معلومات** **العضو** · 08-12-2010, 03:51 PM

العمر فرصه والمقادير خيره=وعمر الفتى وان طال لابد له يوم

الله الله

نسعى على الدنيا وبقعا قصيره=واللي يمر العبد مقضي ومقسوم

سبحان اللي قدر المقادير وسجلها في كتاب

لو كل رجالٍ يحكم ضميره=ماشفت بين الناس ظالم ومظلوم

أنـــشهــــــــــــــــــــد

واللي ماياقف للامور العسيره=ماهوب في نطح المهمات ملزوم
يرتاح وامواج البحر لا تثيره=ماهوب ملزوم على الموج والعوم

قسمه من قسم خواته

واللي اهمومه في حياته كثيره=لايطلب الفزعه من انسان معدوم
وسيف ماتفرق سلته من جفيره=ماهو امفرج لك الى صرت مضيوم

صحيح أما تطلب بليهان و لا الضعيف كبه

والبعد من بعض النفوس الحقيره=فود وسعة بال من الضيق مزحوم

راااحت بال يا ابو سالم

عزلت من رفقت اقلال البصيره=وعرضت خلان الرخى برخص السوم

تذكرت البيت الهجائي القائل :

يالكبش ياللي وسط الاسواق مسيوم=بشريك بالنعلين ولا هي خسارة

ليت الردي مهما تقدم مصيره=تظهر علي وجهه علامات ووسوم

اشهد يابوسالم أن هذي رحمه من الله لهم ولا انفضحوا

واللي على الصاحب ركابه مغيره=نلقى بداله من هل الجود شغموم

الله يطيب فالنا مع هل الجود

نلقى بدال ديار الانذال ديره=ونلقى بدال القوم ياصاحبي قوم

الحرّ لا صكت عليه المغاليب=ملزوم عن دار المذلّه ينـزّي

وعد ماتعرف وارده من صديره=اخير لك فرقاه و السد مكتوم

ولد الردي لو طاب لك لاتماشيه=يومين والثالث يبين الـردى بـه

الحظ طيب والهقاوي كبيره=والرزق عند منشي السحب معلوم

الحمد الله رزقنا عند واحد ما خاب طلابه

لاصار مال الرجل بالطيب سيره=وش ينفعه عمره الى صار مذموم
بعض العرب ماله مع الناس جيره=وبعض العرب سيفه من الحقد مثلوم
وبعض العرب لو ميز الوقت غيره=يشيل له قلب من الخبث مسموم

لافض فووووك درر يا ابو سالم

وبعض العرب مثل الحصاة الصغيره=ماهوب كفو الكبر والبشت والزوم

صح السانك ملايييين بيت عن 1000 بيت

واللي مايحمي محكمات السريره=ماهوب يحمل شرهة الود واللوم
ياصاحبي جاتك البيوت المثيره=اخذ المفيد وباقي العلم مختوم

صح اللسانك واعتلا شانك و أعذرني على الأطاله

أخوك / ابو زيد

**معلومات** **العضو** · 09-12-2010, 12:55 AM

صح لسانك يامبدع

**معلومات** **العضو** · 09-12-2010, 01:43 AM

صح لسانك مليون
عزالله يابوسالم ان قصيدتك من عيون الشعر
قريتها مره وثنتين وثلاث وكل ماجيت ابختار بيت لقيت اللي بعده ازين منه
صح لسانك لين ترضى

**معلومات** **العضو** · 10-12-2010, 10:46 PM

اقتباس:المشاركة الأصلية كتبت بواسطة فهد فارس الصخابرهاررررررررررررررحب يابوسالم

صح الله لسانك ياذيبان
مافيك حيلة
لاهنت على الرائعة لاعدمناك

المرحب باقي يافهد وصح بدنك ولا عليك زود

**معلومات** **العضو** · 11-12-2010, 12:30 AM

صح الله السانك يا بو سالم وجمل الله حالك

عز الله انها راقت لي ومن أجمل القصايد التي قريتها

وسأعود قراءتها مرار

لا فض فوك يا محمد

تحياتي

الذين يشاهدون محتوى الموضوع الآن : 1 ( الأعضاء 0 والزوار 1)

		منتديات صحيفة وادي الدواسر الالكترونية