قصيدة الغيثاني المري في الدواسر

[معلومات العضو عبدالله الدوسري]

هذه القصيدة من الشاعر علي بن عبد المحسن آل جمعان
الغيثاني المري في هذال الحقباني الدوسري
الذي عفا عن واحد من ال مره من الغياثين في الجبيل هذا الشهر جعلها الله في موازين أعماله وإليكم القصيدة

قال ابن جمعان في بدع الأمثال = غـــيـثاني المنسب وشرّاب دلّه
يقعد خوا راسي من الكيف فنجال = بــنٍّ يمـــانيٍ ثمـــــينٍ مــــــزلّه
الشّكر والعرفان يالشيخ هذال = ولــك الثـنا يالــــشيخ هذال كلّه
ياللي ضربت بشيمة الشّهم الأمثال = عرش المراجل عاش من يستحلّه
عرش المراجل ينبنى فوق الأهوال = يبنى على تسعه وتسعين علّه
ويبين من طاله على مرّ الأحوال = ويبين من يقصُر ولو هو يدلّه
والشيخ فوق الهقوة إلّلي على البال = فــوق الـهــقاوي عــادة لـّه ودلِّه
القلب مومن والعمل خير الأعمال = هـذا وأنـا مـاني بـزًكّي عـلى الله
لكــن نشوف الفعل يا عسر الأفعال = يـا طيـب فعــلٍ ما تــخلخله خـلّه
كبْرت عليك احمولٍ كبار واثقال = وأنت احتملت الحمل دقـّه وجــلّه
واشتلتها في وقفة أحرار وأبطال = واليوم حــنّا مـن جـميلــك نـشـلّه
والمدح يا هذال بك له تسلسال = من طيب مغراسك براسك جِبلِّه
عريب جدّ وجدّ والعمّ والخال = بيت الحسب روس الجبال المطلّه
يا تغلبيٍ طال ما قال وإن قال = ايطـــول ما قــاله بــفعلٍ وأَدِلــــــّـه
راحوا لك عيالٍ وحنّا لك عيال = وأمــرك عــلينا عيــدنا مانمــلّه
اكبارنا واصغارنا باشهب الّلال = إن شان حِلّ الوقت وإن زان حلّه
ابشر بنا مهما الدهر يايبه طال = يــابه كــما خـلٍ فزع صوب خلّه
كلٍ يلبّي لك وفي اللازم عجال = والله مــا نقــبل علــى الشيخ زلّه
والشاهد الوالي علينا ولا زال = إن حن على خدمتك يا شيخ وِلّه
والله يقدرنا على قد الآمال=علـه يـــعبر شـــكرنـــا لـك لـعلّه
والنّعم بالحقبان رجال رجال = الكـــل مـــنهــم مـا تــعقّد يـــحِلّه
هل سربةٍ لا روّحت تذهل اذهال = تردع جموع أهل الكبود المغلــّه
يا معتق رقابٍ ورا سود الأقفال = ترقب متى السيّاف سيفه يسلـّـه
حار أحمر الدمّ بعروقه ولا سال = ولا جــرى في عرقـه ولا يبلـّـه
إلين جاها عفوك السمح الاقبال = عفو المعزة مــا عفيــتوا مذلـّـه
ولا أنت قادر تمضي الحكم في الحال = حقّك وشرع الله فــي كــل ملـّـه
لكن نصيت الواحد العادل العال = إللي وعَدك إنه يظلّلـــك ظلـّـه
والمنزل العالي على كل منزال = عنده وعند الخلق عالي محلــّه
ترفع لك البيضا على روس الأمثال = ويخلــّـد التاريخ في صفحةٍّ لــّه
إن علمك الخالد على مر الأجيال = والشّـايع الذّايـع على كل حلـّـه
تقبل به رجالٍ وتخبر به رجال = علمٍ عظيــمٍ ومــن يسويــه قِلـّـه
يوصف على نوٍٍّ من الوسم همّال = سبحان من بأمره يسـوقــه وهلـّـه
ولا كما نور البدر يشعل اشعال = يسوى تمامه كــل نــور الأهلــّه
فوق الرّمك تكاملوا كل خيّال = بالبيرق إلّلــي كــل قــاعٍ تقلــّه
تغالبٍ عدوهم صابه اجفال = وإليا نطحهم ما سلى الشرّ لله
كريم يا برقٍ غداله تهلهال = من عقربياتٍ ضوَت مستهلّه
جعله على الوادي له أيام وليال = والرحمة تسوقــه ومــرٍٍّ تتلــّه
دار الدواسر دار كرمان الاسبال = يسقي المضارب كل شبرٍ يحلّه
يروي ديار الجود وازحولٍ جبال = إللي لهم مجدٍ عريـــــض سجلّه

 

 

 

 

[معلومات العضو معزي]

صح السان الغيثاني المري. وانا اشهد انها ترفع البيضاء لهذال الحقباني. وفعل مايسوننه الا ازحول الرجال. والله يكتيله الاجر. ولاهنت ياعيدالله على القصيده المعبره

 

 

 

 

[معلومات العضو نايف الخييلي]

بيض الله وجهك يابو صالح

وصح لسان علي المري

والله يبيض وجه هذال بن راشد الحقباني على موقفه النادر

والله يكتب اجره ويخلف عليه ابنه

 

 

 

 

[معلومات العضو ناصر بن فهد]

لاهنت وبيض الله وجهك يا عبدالله على النقل
وصح لساان الشاعر على المري
وبيض الله وجه هذال الحقباني

 

 

 

 

[معلومات العضو ابومبخوت الدوسري]

وبيض الله وجه الشيخ / هذال بن راشد الحقباني الدوسري والله يعضم اجره في ولده والله يغفر له ويسكنه الجنه يارب العالمين موقف قوي ويحسب للشيخ هذال وجزاه الله خير اللي نقل الكايده والعسيره . قال الله تعالى {وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا} وبيض الله وجهك ياعبدالله على نقل قصيده للشاعر / علي الغياثين المري وجزاه الله خير .

 

 

 

 

[معلومات العضو عبدالله الدوسري]

معزّي




الله يعزّ شانكـ




شكرا لك




و دمت في خير،،،

 

 

 

 

[معلومات العضو عبدالله الحافر الغييثي]

صح لسان الشاعر المري وهذال فعل فعلا" قليل من الرجال اللي يسويه الله يخلف عليه ويرزقه ولدا خيرا من ولده ولاهنت ياعبدالله

 

 

 

 

[معلومات العضو محمد بن حمد الشكرة]

بيض الله وجهك يابو صالح وصح لسان علي المري والله يبيض وجه هذال بن راشد الحقباني على موقفه النادر والله يكتب اجره ويخلف عليه ابنه

 

 

 

 

[معلومات العضو تركي بن عبدالرحمن]

الرجال تبان في االمواقيف الصعبه والعفو عند المقدره من شيم الرجال النوادر .... بيض الله وجهك ياهذال بن راشد الحقباني الدوسري... تستاهل الثنا منا ومن غيرنا ؟؟؟و بيض الله وجهك يبو صالح على نقل القصيده

 

 

 

 

[معلومات العضو عبدالرحمن بن فلاح آل بريك]

صح السان الغيثاني المري.


ويستاهل الشيخ هذال على فعله النادر والطيب ..



ولا هنت يا عبدالله على نقلها لنا .

 

 

 

 

[معلومات العضو شافي بن راشد النتيفات]

لاهنت وبيض الله وجهك يا عبدالله على النقل
وصح لساان الشاعر على المري
وبيض الله وجه هذال الحقباني

 

 

 

 

[معلومات العضو راشد ناصرالدوسري]

بيض الله وجهك ولاهنت

 

 

 

 

[معلومات العضو راشد ناصرالدوسري]

لاهنت با عبدالله الدوسري وبيض الله وجهك يا الدوسري

 

 

 

 

[معلومات العضو راشد ناصرالدوسري]

عشت يا الغيثاني

 

 

 

 

[معلومات العضو راشد ناصرالدوسري]

ما قصرت يا الغيثاني