قصة وقصيدة ترتعش لها القلوب الحية

[معلومات العضو ذيب الوادي]

ابدي بالتحية على اخواني وخواتي الاعضاء واجدد مشاركتي في بيتنا الرائع منتدى العجمان بهالقصة

المؤثرة اللي والله اشوف فيها مضمون يهز الأفئدة ويحرك ضمير وقلب كل شخص مقصر في حق

قريب له اوحتى له فيه علاقة معرفة قصيده يرددها كل من في المستشفى

فهي قصيده على لسان سيدة وقورة ترقد احد المستشفيات منذ سنوات

قصتها مبكية الحقيقه ..

تقول هذه السيدة قبل سنوات جاء زوجي وطلب مني اروح معاه السوق

وقالي اشتري اللي تبين وبأي سعر واشتريت افخم الثياب واجملها

وجميع المستلزمات للبيت وغيره ..ورجعت للبيت مسرورة وفرحانه..

فجأة ... قالي زوجي كل هالاغراض مو لك ..

هذي لزوجتي الجديدة وانتي الحين طالق ..

بعد هالحادثة اصيبت الزوجة بجلطة وغيبوبه جلست في المستشفى ..

ولا احد يزورها غير اخ لها زارها كم مره وبعدين بطل لما طالت المدة

ولازالت موجودة في المستشفى والكل يعرفها وحافظ قصائدها وكلماتها

ولما تسألها عن قصتها تبكي بحرقه وتردد قصائد توجع القلب

لانها ولهانه حيل على اولادها ولا تدري عنهم شيء فالكل هجرها ..

وهذي احد قصائدها تقول فيها:


تكفين ياطيور حرار افزعيلي
...................ابي عن اديار الاهل منك الاخبار

تكفين حومي فوقهم وارجعي لي
..................والا ان حصل لك حومة داخل الدار

تكفين حول ابيوتهم دوري لي
.......................سبعة فروخ يوم اخليهم صغار

شوفي ضناي وعودي وانكفي لي
........................وشلونهم ياعلهم صارواكبار

نسيوادفاي ونومهم في شليلي
..................وش علمهم ياعلهم طول الاعمار

قولي لهم أن امكـم له عويلي
..................خمسـة سنين دمعها دوم مدرار

وقولي لهم اني على طول ليلي
...........................انوح ولياقرب الصبح انهــار

وقولي عيونه دايم له هميلي
.....................تبكي لياشافت من الناس زوار

كل يوم اقول اغدي حديهم يجي لي
........................راحت سنين مابهم واحد زار

وانا اللي من سبة سوات الحليلي
........................حالي تردت كل ماله وتنهار

وفرقى ضناي اللي تردت بحيلي
...............كني على شوفتهم اصلى على نار

ياويلي كان الله عجل رحيلي
.....................وانالي سنين ابي لوهي اخبار

ياعونة الله الله من يبي يتكي لي
.................جارت علي بامرالولي كل الاقدار

تنكروا من يدخلون الدخيلي
..................واللي بوسط ديارهم يامن الجار

قولي لهم ياطيور قلبي عليلي
..................الله يكافي قلوبهم صارت احجار

وانا اللي لبراق الخيال استخيلي
..........................واقول ياعل (......) للامطار

.تكفين وسط ديارهم صوتي لي
........شوفي عسى لاسمي مع الناس تذكـار

وقولي لمن نسيانهم يستحيلي
...................يااللي نسيتوها ترى الوقت دوار

ياهيه ياللي بالسمالك هديلي
.......................ردي خبر تكفين يكفيني امرار

شوفي اكااللي نومهم في شليلي
...............من اذانه المغرب الى وقت الاسحار

شوفي اكااللي مااهتني في مقيلي
.........................الا بمقيل معهم كباروصغار

وقولي لهم ان كان حملي ثقيلي
.....................مره يجون وعقبها شي ماصار

وانا يتـولاني كريم جليلي
.....................ياعلني في جنته وسط الابرار

منقول لتعم الفائدة

وسامحونا عالقصور

 

 

 

 

[معلومات العضو عبدالكريم البليهي]

مايقال لهذه القصه ألا نستغفر الله ونتوب اليه ........... قصه مؤثرتآ حقآ ولاكن نعوذ بالله هل يوجدفي مجتمعنا المسلم الذي يشهد ان لا ْ اله الا الله اناس كلهم بهذه القسوه ولا واحد منهم فيه رحمه لا ولد ولازوج ولا اخ ولا قريب نرجو ان تكون قصة فيها شئ من المبالغه والله المستعان

 

 

 

 

[معلومات العضو ابوعبدالرحمن الودعاني]

	أخي وإبن عمي الحبيب الغالي الله المستعان قصه تدمي القلب صح لسانك ولسان الشاعرة وقصيده جزله وطيبه وأنت ما يجي منك إلا الطيب والزين جعلنا ما نخلا منك

 

 

 

 

[معلومات العضو الصقر الحر]

أخوي العزيز ذيب الوادي مشكور على القصة و القصيدة

و الله يكون في عون ذا المرأة



أخوك الصقر الحر

 

 

 

 

[معلومات العضو عبدالرحمن الشرافي]

أخي وإبن عمي الحبيب الغالي

الله المستعان قصه تدمي القلب

صح لسانك ولسان الشاعرة وقصيده جزله وطيبه

وأنت ما يجي منك إلا الطيب والزين

جعلنا ما نخلا منك زمن مشاركاتك الرائعة

 

 

 

 

[معلومات العضو صالح الجعيدي]

ذيب الوداي ،،، لا هنت على القصة والقصيدة المؤثرة يالسنافي.
الله يعافيك على النقل المتميز.
تقبل خالص تحيات أخوك ومحبك في الله/ صالح الجعيدي

 

 

 

 

[معلومات العضو رعاد]

الله المستعان قصه تدمي القلب

صح لسانك ولسان الشاعرة وقصيده جزله وطيبه

والله يعطيك العافية