الدخول للشعار فقط وغيرهم يمسك الكتف الله لايهينه

[معلومات العضو ابو لورنس]

يالربع انا بقولكم الصراحه هالسياره بيني وبينها عشرة عمر من 30 سنه وصراحه انا ماني شاعر بس ابي فزعتكم كل واحد بيشارك مايتجاوز بيتين واحسن بيتين راح تسجل على كبوتها لاني ناوي احيلها للتقاعد وابشركم فصلت لها مضله بالبيت وبدخلها وهذي هي صورتها فديتها شوفها

 

 

 

 

[معلومات العضو شوق2]

لقاااااااااااااافه
ولو اني مانيب شاعره0

جعل يفدى موتري كل سياره =موتري وقت الوازم يهقويني
لاخفضت اله القدم صار طياره= مخبلك يالي تهقوى تباريني

هذاااااااا قبل ماترفعها على البراميل (باعتبار ماكان)
تقبل مروري وتقديري0

 

 

 

 

[معلومات العضو أبو زايد التغلبي]

يابو لورنس حلني للتقاعد=مابقى بي حيل لاروحه وجيّه
لو تحط جسور في جنب المساعد=العمر ولـّى وقربته المنية
عقب هدّ الحيل ماتن السواعد=انتبه لورنس لايقضي عليّه

 

 

 

 

[معلومات العضو أبو زايد التغلبي]

يابو لورنس حلني للتقاعد=مابقى بي حيل لاروحه وجيّه
لو تحط جسور في جنب المساعد=العمر ولـّى وقربته المنية
عقب هدّ الحيل ماتن السواعد=انتبه لورنس لايقضي عليّه

 

 

 

 

[معلومات العضو أحمد الغاطي]

ألا ياددسني ياما سهجتيبي صحاري نجد=زمانٍ فات وألا اليوم عندي وارد ألفيني
وفا مني,,ولاهو كل أبو ذا يالعراوي وجد=أبا أحطك تحت عيني وكنك من وراعيني

 

 

 

 

[معلومات العضو ابو لورنس]

والله انكم ماقصرتو وكل قصيده احلى من الثانيه وبيض الله وجيهكم وانتظر المزيد والتحكيم بكره بعد الفطور ومازالت الفرصه للجميع علما بانه تقدر تشارك اكثر من مشاركه والاخ احمد الغاطي تسلم يمناك وكذلك الاخ ابو زيد التغلبي يامال العافيه وتسلم يمناك والاخت شوق 2 ماقصرتي ولقافتك في محلها

 

 

 

 

[معلومات العضو مشبعني ذراعي]

قــال ابــــولورنس عشـق ددسـن غمـاره ----- امــا هـي توديـنــي والــى انــا اوديــهـا
كـل يــومن تمشيــــني في وســط حــاره ----- شقــرديه حتــى راعي البنز مايجاريها
مــزيونه خصـــــوصا لغـــمزت بالاشاره ----- من هولها العالم تعداني وتشر بايديهـا
مافيها بريك والحذر عندها كبس الاناره ----- وخـــروا عــن دربهـــا لاحــد ن يــذيـها

 

 

 

 

[معلومات العضو أبونواف الدوسري]

والله الي قام حظ هالسياره السكراب هههههه.

ابو لورنس تسلم يا الغالي..

أخوك أبو نواف الدوسري

 

 

 

 

[معلومات العضو فايز علي الدوسري]

تستاهل

 

 

 

 

[معلومات العضو العماني]

ههههههه صح الله لسانكم جميع على الأبيات الرائعه

والله يخلي لك ددسنك يابورنس وعزالله انك ماقصرت فيها .

تقبل تحياتي،،

 

 

 

 

[معلومات العضو ابو لورنس]

شباب ماخفيكم سر ابياتكم خلتني احتار كل قصيده احلى من الثانيه والفرصه متاحه لمدة 48 ساعه من الان فهل من مشاركات

 

 

 

 

[معلومات العضو كلاش]

خذ بسرعه لاتفوتنا الجائزه

عقب منتي بعينه غاليه ياوارد السبعين=غديتي للآسف يأم الغلا جيز البراميلي
كذا الدنيا ليامن جاك غالي يارث الغالين=مثل منتي ورثتي في غلاك الهجن والخيلي

 

 

 

 

[معلومات العضو ابو زابن المسعري]

الا ياددسني حبتس بقلبي واصلن حده=جمايلتس القديمه والله اني ماتناساها
ولكنتس كبرتي والكبر يالعنبو جده=وخردتنا القديمه لازم ان ادور ارضاها

اشكرك ياصاحب الخرده على فتح المجال

 

 

 

 

[معلومات العضو ابو لورنس]

	افا يابو زابن خربتها الله يسامحك بقولتك الخرده هذي انا مسميها سمحه وبسمعك بيت شعر قلته فيها من ثلاثين سنه ايام شبابها وشبابي كان لنا صولات وجولات كم دينا وقلابي طفته عليها وكم مطب نشب سنوني بالطبلون عليها وكم سطحه شلتها عليها وكم مخالفه اخذتها بسبتها من المرور مكتوب فيها تعطيل سير بس ماتنلام يابو زابن الي مايعرف الصقر يشويه ============ بيت الشعر الي قلته فيها ============== ودي على سمحه نسير +++ صوب الفريق المواليني وودي على خوة نوير++ لوكان ماهيب تبغيني

 

 

 

 

[معلومات العضو الخضراني2]

ههههههههههه

ابو لورنس

قلنا نشاركم في سحمه الله يعطيك خيره ويكفيك شرها


ياسحمتي ياموتري ياغاناتي // اللي لوازيمي تسدينها
ياجعل يسقى يوم أصلح مرآتي // عند الصناعيّه مودينها
ماعاد يفرق بيننا الا المماتي // ياجعلها تبقى على زينها