ادخل واقرا قصايد عن الونيتات (الجموس)

**معلومات** **العضو** · 19-04-2005, 11:12 PM

راكب اللي يوم طب من النفودي
...............................................كن صلفات الهبايب عج ويله
صوت سيره يوم غنى بالعمودي
...............................................صوت ذيب وارداً راس الطويله
ــــــــــــــــــــــــــــــــــــــــــــــــــ ــ
ويقول:

ياهل الونيت اللي على مدقمه ميم
.................................................. نقل الرياض الخط ماتوصلونه
صناعتة مخطين ملة ابراهيم
.................................................. حمران روم لونهم مثل لونه
مارهموا له بالكراجات ترهيم
...............................................ولا طلعو كبريترة ينفخونه
والله لو امسك طارته يالمغانيم
...............................................ماع اد اقلد دولة يصنعونه

ــــــــــــــــــــــــــــــــــــــــــــــــــ
الله على اللي يوم يفتل عموده
............................................يطلع ثرى ارض بعد القيض ماها
ليااونس ثقيل الترس يرسي عضوده
..............................................شيها نة ترخي المتون لعشاها
ــــــــــــــــــــــــــــــــــــــــــــــــــ

يامنير دوك الفرت واخذ الفواتير
..............................................افحص عليه ودخلة بالكراجي
اللي يبي بنزين ركب مواسير
............................................واللي تبيه النار ركب بواجي
ــــــــــــــــــــــــــــــــــــــــــــــــــ

الا يا نديبي فوق من ينطح التهريب
...........................................ليا عدّ ميه قام يلعب دركسونه
أبى ابعد عن الشرطة وأفارق جنود الذيب
...........................................لدار يبيدن الونيتات من دونه
وياحن قلبي حن فرت بعد توضيب
...........................................تحت خارجي ماطفت نار غليونه
ــــــــــــــــــــــــــــــــــــــــــــــــــ

مايفيد اللف لو يالع و أكنّه
........................................ماش مثل اللي قراطيسه نظيفه
راكب اللي زوّد اليابان فنّه
.........................................واخترع فيه الدبل ضد الحتيفه
ــــــــــــــــــــــــــــــــــــــــــــــــــ

والجيب شاحنه إلك كيك و شابور
..........................................والما معبّيه إلك مير انت شاوي
ــــــــــــــــــــــــــــــــــــــــــــــــــ

يا عبيد غنّن سيور الهاف
.................................لا يا بعد كل من غنّا
عرق الابيتر رماه خلاف
................................ما طبّ له واحد منّا
ــــــــــــــــــــــــــــــــــــــــــــــــــ

وجدي عليه وجد من هرّب الجمس
...............................................في حمله يا عبيد سبع المثاني
يوم الطرد غدت ثلاثه كما الخمس
..............................................قامت تقطّع قربته جدّ عاني
ــــــــــــــــــــــــــــــــــــــــــــــــــ

فرت مخيف وحدّه الحمل والجور
..............................................زاع أسود الما لين ولّع انبيره
ــــــــــــــــــــــــــــــــــــــــــــــــــ

عدو به على اللي كنّه النسر بالمرقاب
.............................................على الجمس الأصفر كاملات شراشيره
معه فرت خمسه طن ياخذ ميّة ركّاب
............................................من المال عيّن ينقلنّه تغاييره
ولا يوصله يا كود فرت عليه اسطاب
...........................................ليا حاسب السوّاق تقدح مواخيره
ــــــــــــــــــــــــــــــــــــــــــــــــــ

ألا يانديبي فوق فرت ورد من شرق
.................................................ع لى راس قيره للعليمي تعاشيقه
ــــــــــــــــــــــــــــــــــــــــــــــــــ

من فوق فرت مايشيل الصقاقير
............................................من زود فنّه صافيات بلوفه
بعريبيا ما رهّموا له مسامير
.........................................من دولة النجمة مبادي حروفه
ــــــــــــــ.ـــــــــــــــــــــــــــــــــــ ـ

راكب اللي يعجب اللي يوم حافه
.............................................زين صوته بالسيور المعدنية
زيّن الصنّاع شغلة بالكيافة
.............................................ناسج حوضه على ذوق الحنيّة
ــــــــــــــــــــــــــــــــــــــــــــــــــ

راكب اللي يوم واشك خط لينة
...........................................مثل شقرا واشكت جول الحباري
عيدهي ما يوني من قرينه
............................................ناشب في مدقره حمض الخباري
رافعين سليتره ومطوّلينه
............................................ما نبيه بدق ولفه بالحداري
ــــــــــــــــــــــــــــــــــــــــــــــــــ

راكب اللي من حفيزه للحدودي
.............................................عقب العشرين طبلون اميتينه
فرت نوع كلاسيكي ماله طرودي
...........................................أبيض في البيت الأبيض فارقينه
يرفعنّه نايمات بالعمودي
............................................والهوى والنار يرخنّ المكينه
يوم مرّ خريص مع عرق النفودي
..........................................قاومه صوت القيامة في المدينة
ــــــــــــــــــــــــــــــــــــــــــــــــــ

راكب اللي مخّ رجليه خنزير وهوا
.........................................اشهب في مقدمه بارقين وعكس تاج
متر في مترين مستبرم كله سوا
.......................................حايفه حطّاب ما سمكره راعي الكراج
إن نعشته بالثلاثة مع اللفه عوا
..........................................عوي ذيب محتدينه مربّيت النعاج
ثابت ما يختلف كلما لف إنزوا
......................................وارتفع ثم إرتخى مثل طايرة المراج
كن ضرب المرو في الويل قدّام و ورا
......................................ضرب هملول البرد وإن تقفّاه العجاج
منوة اللي مشفق لهله ولهم نوا
.......................................من بعد طول المسافة يبي فلّة حجاج
ــــــــــــــــــــــــــــــــــــــــــــــــــ

الهاف روّح وحط طريف من دونه
..............................................عقّب حدود السعوديّة لعمّاني .
ــــــــــــــــــــــــــــــــــــــــــــــــــ

يوم لزّه بالثلاثة مع العرق الحمر
..............................................شال صدره من عوا الذيب ما تفرق عواه
ــــــــــــــــــــــــــــــــــــــــــــــــــ

يا اهل الونيت اللي يشق الدهو شقّ
.................................................. ..يصفر صفير مفجرات السراعة
أمّا اركبوني يالنشاما بلا حق
.........................................والا أوصلوا مرزوق منّي وداعة
ــــــــــــــــــــــــــــــــــــــــــــــــــ

**معلومات** **العضو** · 20-04-2005, 01:23 AM

لاهنت يالخييلي على الموضوع الجميل

حمّاره مع نور القمر كنه الياقوت=

ياراكب اللي حرف جي ام يزهاه=
لادق سلفة والبساتن مصفاه=
قزاز متحرك وتوانك معباة=
ظغط المكينه يوم صنعت بمنشاة=
لاداسه السواق مايلحق اقصاه=
صنعت يهودين عسى النار مثواه=

وتقبل تحياتي

**معلومات** **العضو** · 20-04-2005, 01:37 AM

ولا أنت يانـايـف

وصح لسانك على هالقصيده يالشيخ

ومشكور على هالمرور الطيب

تحياتي لك ..

**معلومات** **العضو** · 20-04-2005, 02:25 AM

الا يا نديبي فوق من ينطح التهريب
...........................................ليا عدّ ميه قام يلعب دركسونه
أبى ابعد عن الشرطة وأفارق جنود الذيب
...........................................لدار يبيدن الونيتات من دونه
وياحن قلبي حن فرت بعد توضيب
...........................................تحت خارجي ماطفت نار غليونه
ــــــــــــــــــــــــــــــــــــــــــــــــــ

لبيه يالجمس
لاهنت يالخيلي وماقصرت طال عمرك
وبيض الله وجهك على القصيد الزين

اخوك
عبدالله الشكري

**معلومات** **العضو** · 23-04-2005, 03:07 AM

ولاهنت يالشكري اسمحنا على القصور ترقبو الجمس جديد بالاسواق

خخخخخخخخخخخخخخ ووجهك ابيض يالشيخ

اخوك الخييلي

**معلومات** **العضو** · 23-04-2005, 03:44 AM

لاهنت يالخييلي علي الابيات الاكثر من رائعه

**معلومات** **العضو** · 25-04-2005, 03:26 AM

ولاهنت اخوي تركي الودعاني على مرورك الطيب

تحياتي لك..

**معلومات** **العضو** · 25-04-2005, 03:39 AM

راكب اللي يوم طب من النفودي
...............................................كن صلفات الهبايب عج ويله
صوت سيره يوم غنى بالعمودي
...............................................صوت ذيب وارداً راس الطويله

لاهنت يالخييلي والله يعطيك العافية

**معلومات** **العضو** · 26-04-2005, 02:03 PM

لاهنت يالخييلي على قصيدة الجمس

مافيه شي عن Vxr

**معلومات** **العضو** · 27-04-2005, 12:44 AM

ولاهنت اخوي حمد الودعاني والله يعافيك ويطول بعمرك اخوي

ومشكور على هالمرور اخوي

تحياتي لك...

**معلومات** **العضو** · 27-04-2005, 12:46 AM

ولاهنت اخوي النـايــف1 ويعطيك الف الف الف عافيه على هالمرور اخوي

ابشرك بسعدك اخوي ماطلبت شي قريبا بأذن الله بمنتديات قبيلة الدواسر ان شاء الله

وتحياتي لك ..اخوك الخييلي

الذين يشاهدون محتوى الموضوع الآن : 1 ( الأعضاء 0 والزوار 1)

		منتديات صحيفة وادي الدواسر الالكترونية