الحمد لله رب العالمين والصلاة والسلام على سيد الأنبياء والمرسلين سيدنا ونبينا محمد ابن عبدالله وعلى آله وصحبه ومن وآلاه ومن اهتدى بهديه واستن بسنته إلى يوم الدين
إخواننا أعضاء وزوّار ومرتادي الموقع الرسمي لقبيلة الدواسر
أختتم مساء أمس الخميس الموافق 20-11-1434هـ المسابقة الشعرية الثالثة لمسابقة الموقع الرسمي للقبيلة تحت عنوان (( نعمة الامن)) بحضور كبير من مشائخ وأعيان ووجهاء وأبناء قبيلة الدواسر إكتضت بهم القاعة ، وأسدل ستار الختام على المسابقة بإعلان النتائج النهائيّة للمسابقة الشعرية .
__________________________________________________ ________
أسماء الفائزين بالمراكز الخمس الأولى :
الفائز بالمركز الأول : الشاعر صالح بن محمد الصليبي الحقباني.
قصيدة الشاعر صالح بن محمد الصليبي الحقباني المشارك بها بالمسابقة
تحت قيادة مليك العرب ذخر البلد=عبدالله الفيصلي نسل المليك الامام
مثبت الدار بالشرع المطهر وتد=سيفً على المعتدي حده يقص العظام
حنا بدار السعد عشنا بخير ورغد=يالله تمن وطنا بالرخا والسلام
الحمد لك ياولي العرش ماله عدد=الخير ماينحصي ويزود في كل عام
الحكم حكم السعد والشعب شعب السعد=مانلتفت في خفافيش الفتن والظلام
ماهمنا من تنكر للجميل وجحد=اللي على التفرقه يشعب ذلول الهيام
ياناس شوفوا جهود ابليس يوم اجتهد=وش فايدة من يبون يزعزعون النظام
كل الدول حولنا فيها دوي الرعد=راحت من مظاهره حرب وخراب وعدام
مآسي ً موجعه منها يشيب الولد=أرواح راحت هدر وديار راحت هدام
ومن لا اعتبر شاف ماعافه وذاق النكد=ومن لا يحسب عواقبها يعض البهام
اللي رضا وش وجد واللي زعل وش وجد=شي ً قسمه الولي مايمنعونه الأنام
هذا وطنا عسى عين الحسود الرمد=نفديه بارواحنا عهدً وثيق الكلام
وحنا لقادة وطنا ذخر عز وسند=صف " موحد مثل صف الفشق فالحزام
والله يرحم وزيرً عاش صبر وجلد=قضى حياته بجهد ً مخلص ً وألتزام
امجاهد ً عن ثقيل حمولها مانشد=حمله لو انه بظهر طويق دكه حطام
نايف ومن وكر نايف قايد ًمعتمد=حر ً ومن مدرسة نايف زهاه الوسام
محمد اللي يزود الأمن عون ومدد=وزير الأمن المحنك فالخطوب الجسام
لأمن الوطن والمواطن في عيونه رصد=ويبقى( المواطن خفير) اشعارنا والمرام
نعاهد اللي رفع سبعً بليا عمد=ربً حما البيت من جيش ابرهه لايضام
إنا فدا الدار من يوم المهد للحد=نفنى وتبقى على الدنيا رفيعة مقام
__________________________________________________ _____
الفائز بالمركز الثاني : الشاعر محمد بن مسفر بن قحيفان الخضراني.
قصيدة الشاعر الشاعر محمد بن مسفر بن قحيفان الخضراني المشارك بها بالمسابقة :
تسير الأمور بقـدرة الله عظـيم الشـان=وسـّو القدر شـبه الجزيره يحيطبها
كثير الـدول من حولنا شعبهـا شـتّان=بعض الدّير حكّامهـا اللي تحاربها
شعوب ٍ غزاها الغرب واغتزّها الشـيطان =على غير حقّ ٍ كاثرات ٍ مطالبها
تقابل أومور الصلح بالرفض والعصيان =ولاتستمع للريّس اللي يخاطبها
تزاحم بدون إوصول في ساحة الميدان =وفي دينها متخالفات ٍ مذاهبها
وحنّا نعيش بنعمة الأمن والأيمان =عسى الله يديم النعمة اللي نعيشبها
على طاعة المعبود عشنا تقول إخوان =تحت راية ٍ من ضدّه الوقت لاذبها
إلى نكّست الاعلام لحضة عزاء وأحزان= علمنا على راس الطويله يرف بها
ولاقّلت مصالحنا وبارو بنا الصحبان= لنا ديرة ٍ يالعنبو من يبور إبها
غلاها بدم ّ القلب يجري معى الشريان =ومن دون مكّه غالي الروح نجلبها
بلدنا مقر المصطفى عاصمة الاوطان =بها الكعبه اللي كُل مسلم يطوفبها
ألى ضاقت الدنيا بأهلها على السكّان =يعيش الضعيف ويتّسع في مناكبها
تحت هيبة اللي حصّنوها من العدوان =بنو صرحها الشامخ وعفّو جوانبها
حضرة خادم البيتين ومسانده سلمان =حموها وصانوها وقامو بواجبها
وحنّا لهم بالضيق لابارو الخلاّن =أسيوف ٍ على حد المناكب مضاربها
ألى ثارت الهيجا وطال النهار وشان =وضاقت بنا الدنيا وقلّت عجايبها
ودقّت أطبول الحرب واشتبّت النيران =وهبّت من الجنّه نسايم هبايبها
حمينا الوطن وصغيّر السن والشيبان =وخطوى الهنوف اللي تمشّط ذوايبها
تهبّ الهبايب والسفينه لها ربّان =إلى ضاعت العالم وغرقت مراكبها
ولانا على وقت أبو تركي من الجدّان =على سيرة اللي سنة الرسل راكبها
__________________________________________________
الفائز بالمركز الثالث : الشاعر مبارك بن محمد بن مبارك الرجباني.
قصيدة الشاعر مبارك بن محمد بن مبارك الرجباني المشارك بها بالمسابقة :
سلام يا ارض السعوديه بلاد السلام =يا اعز واطهر ثرا يا قبلة المسلمين
ياديرتي عزك الله بالملك والامام =وحكم ابو متعب مليك العرب والامتين
مليكنا اللي على هام العروش استقام =عزايمه للمعالي تذهل العالمين
المعضلات العظيمه مالها الا العظام =والمعجزات اعجزتها حكمة المعجزين
رفعت هامة بلادي يارفيع المقام =وعانق ثراها الثريا واعتلا الفرقدين
بالعدل واللين والرحمه بلغت المرام =وتواضعك للعباد وخدمة المسجدين
الحمدالله على نعمة الامن والنظام =يانعمة الله عسانا لك من الشاكرين
امن البلد نعمةٍ تحضا بكل اهتمام =امانته في رقاب ابناء الشعوب اجمعين
الامن نعمه ومطلبها وفا والتزام=والالتزامات واجبها على المخلصين
واجب الامن حققوه محققين الحلام=نعمة الامن غاليه والحب قدره ثمين
امن الوطن للوطن تقوى و درع وحزام =وحب الوطن مثل حب الام لاصغر جنين
والمملكه گ امنا والها غلا واحترام =وش حق الابناء اذا مابرو الوالدين
العدل والعلم نعمه تُشكر وتستدام =ضمينها الشكر ولّا ماعليها ضمين
نعمة الأمن جايزتها نوط ولّا وسام =يالله عسى شاكر النعمه من الفايزين
يامعشر القوم شق الصف ذنب وحرام =حق الولاء والوفا للقاده الصالحين
العهد مسؤول والخذلان عار وملام =ماهي بعاده طبع لاسلافنا الأولين
بالتفرقه واختلاف الرأي والأنقسام =وشقر العصا فتنتن تفرح بها الحاقدين
مبدأ ربيع الشعوب ارهاب ولا انتقام =عطني اجابة سوؤالي ياللبيب الفطين
عزيزهم شردوه وعزهم جا انهزام=ندمو على الأنشقاق وخسرو الخاسرين
الفرق معروف مابين البنا والهدام =وايّة حدث مايبان اليوم بكره يبين
__________________________________________________ _____
الفائز بالمركز الرابع : الشاعر خالد بن حليس بن مرزوق الخييلي.
قصيدة الشاعر خالد بن حليس بن مرزوق الخييلي المشارك بها بالمسابقة :
هذا الوطن عز ومهابه وميراد= ومنهو شكا من جور الايام جاله
واللي يحده من صروف الدهر حاد= من يزبنه صدر الرياض احتفاله
تصوير للواقع ثلاثي الابعاد=عن الوطن وامن المواطن وحاله
هذا الوطن حبه على روس الاشهاد=فخر العرب ارض النبي و الرساله
حب الوطن فطري مثل حب الاحفاد=اروى قراحه واتفيا اضلاله
الآمن نعمه من قبل نعمه الزاد=نحسد عليه اليا ذكر في مجاله
حرص المواطن قبل ضباط وافراد=على الآمن واعطي مثال ودلاله
امشي على كيفي ولا يردني راد=من البحر واصل جنوب وشماله
أبوجها وآصل مرابيع الاذواد= والحمد لله .. والشكر والثناله
ماصار في الثورات في امه الضاد=يندى جبين الآمن مما جراله
بديارنا ..طرقي ونازل وشداد=ومن وين ما يبغى على ما طراله
للحج زوارً وللأمن رواد=واخير من زار البلد وانتماله
واللي يهرب راصدينه بالارصاد=من مد حبل الكفر قصت احباله
ومن كان بالارهاب قيّد بالاصفاد=لاشاف درب الحق فكو اعقاله
ومقيم دولتنا على وين ما راد= آمن على نفسه وعرضه وماله
دامه نظامي ومتقَيد تقياد=بالانظمه يستَر حاله وفاله
حكم الوطن بالعدل والسيف جلاد=وعدالة القران اكمل عداله
باب الوطن مفتوح ونمد سجاد=للمحترم من كل جنس وسلاله
الله يديم الآمن وتدوم الاعياد= ويدوم تصوير الوطن في جماله
هذا الوطن ما يقبل الا بالامجاد=نعمل نهاره ونتناصف لياله
__________________________________________________ ________
الفائز بالمركز الخامس : الشاعر ثقل بن حسن بن سيف الشكرة .
قصيدة الشاعر الشاعر ثقل بن حسن بن سيف الشكرة المشارك بها بالمسابقة :
عليك يا والي تدابير الاحكام=توفيقنا يامن عليك اعتمدنا
فضلتنا واكرمتنا خير الاكرام=وامرتنا بالشكر في معتقدنا
فالحمد لك والشكر يارب الانام=ولا لغيرك يإلهي حمدنا
ربيع الامه ما مسح دمع الايتام=ولاوقف من دون الاقصى والادنى
وربيعنا تعجز ادّونه الارقام=في نعمةٍ كلٍ عليها حسدنا
أمن وأمان وعزنا الله بالإسلام=ولا نحصي الأنعام مما وجدنا
خير ورفاهيه وعلم وتقدام=ومطمئنينٍ اليا من رقدنا
في سربنا ننعم على مر الاعوام=واليا مشينا ما تقصوى جهدنا
وصفوفنا وحده ولا به تقسام =ومع قيادات البلاد اتحدنا
في ظل منهم للحرمين خدام=سور البلد وأمن البلاد وسعدنا
حكم الامام وحكمة عيال الامام=غيثٍ يخلي يابس العود لدنا
ال السّعود اللي لنا درع وحزام=وانّا لهم نوفي بصادق وعدنا
يبقى ولانا ماتغيره الأيام=وعلى عهدنا ماتغير عهدنا
ماضللتنا فالولاء سود الاقلام=ولا هروج اللي بحقده قصدنا
وختامها يالله عسى خيرنا تام=قولوا معي يارب عطنا وزدنا
والله يحفظ الدار شعبٍ وحكام=والله يديمك يالأمن في بلدنا
__________________________________________________ ____
قبيل الختام ، فإننا نعدكم بإذن الله تعالى بطرح تغطية مصوّرة لجميع أحداث الحفل منذ إنطلاقته وحتى إختتامه وأيضاً بطرح تغطية تقريريّة عن الحفل خلال الأيام القادمة .
في الختام ، فإن إدارة الموقع الرسمي لتقدم خالص التهنئة لـ الخمسة متسابقين الأوائل الذين تمّ إختيارهم من عدد كبير من المتسابقين الذي شاركوا بهذه المسابقة الشعرية الثالثة للموقع الرسمي للقبيلة . شاكرين بذات الوقت لجميع من شارك ولم يكن من ضمن الخمسة الأوائل الفائزين ومقدرين جهودهم الحثيثة التي قاموا بها من أجل المشاركة .
(
صوت قبيلة الدواسر)
منتدى قبيلة الدواسر الرسمي
www.alduwaser.org/vb
27-09-2013, 11:56 AM
إعلان أسماء الفائزين بالمسابقة الشعرية الثالثة للموقع الرسمي لقبيلة الدواسر :: ألف مبروك .. ألف مبروك .. ألف مبروك ::
رد: إعلان أسماء الفائزين بالمسابقة الشعرية الثالثة للموقع الرسمي لقبيلة الدواسر :: ألف مبروك .. ألف مبروك .. ألف مبروك ::
رد: إعلان أسماء الفائزين بالمسابقة الشعرية الثالثة للموقع الرسمي لقبيلة الدواسر :: ألف مبروك .. ألف مبروك .. ألف مبروك ::
رد: إعلان أسماء الفائزين بالمسابقة الشعرية الثالثة للموقع الرسمي لقبيلة الدواسر :: ألف مبروك .. ألف مبروك .. ألف مبروك ::
العرض العادي
