مراسلة بيني وبين عبد الكريم القحطاني

[معلومات العضو سلطان المسعري]

هذه مراسلة جرت بيني وبين الشاعر / عبد الكريم محمد القحطاني وحبب ان انقلها لكم
ويهمني رايكم ولا تبخلو علي بالنقد الهادف

عبد الكريم القحطاني

مايشرح الخاطر اللي زاد همه وضاق=مطاوله ضيقة مايعرف اسبابها
منها غدا اصغر هموم القلب ماهو يطاق=ياكود مسرى يداوي النفس ممابها
من فوق جيب يبعد عن نطاقه نطاق =ويقرب بعيد الديار اللي تنوى بها
وارد بريمي عليه الهرج غلق غلاق=بضاعة بيض الله وجه من جابها
صحيح كلن تلاقي له مزاج ومذاق=ولولا اختلاف السلع ماربح جلابها
لكن هوالوحيد اللي عليه اتفاق =ساحر عيون العباد وسارق البابها
في وقفته كنه شيخ زان جوه وراق=له هيبة بين ربعه كلن يهابها
وليا نتقته تقل من سرعة الانطلاق=شيهانةٍ حولت من فوق مرقابها
واطلق خوين يخاوي لك (علي الطلاق)=خوة شجاع سنافي مالك الابها
نصه هل الوادي اللي يحتمون النياق=بمصقلات يهول القوم مضرابها
واخص سلطان غمر ماتثنى وعاق=كل العلوم الجزيله صاركسابها
سلطان والهرج مردوده بنفس السياق=من طبع الاصحاب ماهي ترخص اصحابها
الشك زايل وذكر الطيب فا لنفس باق=تبقى بيوت الصداقه دامت اطنابها
صداقة صادقه ماهي صداقة نفاق=يوم ان بعض اللحا ماتكرم اشنابها
جيتك وباجيك والميثاق ماهو يباق=اعني الرجل ماني بحسب اتعابها
ونته ولامرة عنيت رجلن وساق=سج القدم يمنا مره وتجزابها
يابوحسين اختصارجلالها والدقاق=الله يكافي من الدنيا بلشنابها
ظروفنا سببت بين النشاما فراق=لكن يبقى الغلا ون طول غيابها
واللي على عبده انزل سورة الانشقاق=ان لك عندي معزه وانته ادرابها

ورديت

لي حول شهرين عايش بين هم وشقاق=مستقبلي والحياة أحسب حسابها
همي على باب قلبي كل مااصبحت واق=نبش جروحي وعنا العين واهدابها
بيني وبين الهواجس مثل حرب العراق =قضية شايكة ماصكت ابوابها
لو ما بها اطلاق نار و لا دماء تراق=لكنها علة(ن) مافادت اطبابها
لاشلت هذا الشقاق يميل ذاك الشقاق=ولا قلت روحتها حظ العنا جابها
بيني وبين الأمل والنور مثل الرواق=الله على دورة الدنيا ودولابها
لكن ربي كتب لي من همومي اعتاق=من يوم جتني رسالة من تعنابها
جتني صلاة العشا المبروك والبال راق=وفزيت اهليبها من قدر كتابها
اللي رسمها على المعنا وشد الوثاق =وصاغ القوافي وركبها وغنا بها
حييت يابومحمد وانت نجم السباق=الأولة من نصيبك وانت ركابها
ما هيب تحدا و لا تنقاد و لا تساق =تباري الريح لامن هب هبابها
جتني وقلبي من هموم الزمان استفاق=وجريت شيلة هجيني وابتدينابها
وهاجت بحور لها بين الضلوع اصطفاق=تطفي لها جمر نار راح شبابها
الجمرة اللي لها بين الضلوع احتراق=شبابها من خذا روحي وقفابها
قلت أخذ عمري عقد وإلا مؤخر صداق=لكن ريح عيون الحزن من مابها
واثره نسا مامضا ولاعاد فيه اشتياق=جعله مثل مابلا العربان يبلابها
هذا حصلي وسبب لي مرض واختناق =وتعبت يابومحمد من تقلابها
ولاني بابرر واقول العذر هالحين لاق =لابد الاصحاب ماتعتب على اصحابها
واللي بسط سبع واعلى فوق سبع طباق=انك على البال والجية نوينا بها
لنك من اللي لهم كيف المجالس يساق=قحطان يوم القبايل تذكر انسابها
لكن ابقول لك ما دامنا في وفاق=كلمة عتب وانت اظنك تفهم عتابها
لولا العمل والطريق اللي لتثليث شاق=ما زانت الفرصة اللي قد حضينابها
واختامها حان حل المؤتمر والشقاق=ترا الخطا مشترك والنفس وحسابها

وســـــلامتــــــــــــكم

 

 

 

 

[معلومات العضو مشعل راشد الشايقي]

الجزل سلطان

لاهنت ولا هان الشاعر عبدالكريم

بيتين تترجم اعجابي بهذه الدرر يشرفني قبولها وتستاهل ملعقه

لله درك ياسلطان الشعر منك راق
-------------- جزل خيول المعاني تحزم اركابها

وشرواك عبدالكريم احساسكم حيل راق
-------------- شموخ فكر الجزاله انتم اصحابها



مع خالص التحية والتقدير

 

 

 

 

[معلومات العضو الجراح]

الشاعر سلطان المسعري صح لسانك واعتلا شانك ولاهنت ولايهون الشاعر عبدالكريم وتقبل مروري

 

 

 

 

[معلومات العضو غازي المسعري]

سلطان المسعري صح لسانك واعتلا شانك ولاهنت ولايهون الشاعر عبدالكريم وعزا الله انكم شعراء متمكنين والله يوفقكم لما يحبه ويرضاه تقبل مروري

 

 

 

 

[معلومات العضو حازب الووودعاني]

لااااهنت ياسلطان وصح لسانك ولسان الشاعررر عبدالكريم

تتحياتتي

 

 

 

 

[معلومات العضو راشد المسعري]

ابو حسين صح لسانك ولسان الشاعر عبدالكريم القحطاني وعز الله إنه شاعر وأنت بعد شاعر وبيض الله وجيهكم على قصايدكم اللي له روح ، ومبروك التخرج يابو حسين وعساك موفق في حياتك ولاعاد تقاطع ربعك الحين ماعاد لك عذر.
تقبل ودي وتقديري ،،،

 

 

 

 

[معلومات العضو محمد الولامين]

صح لسانك يابوحسين و صح لسان القحطاني

ولا هنتو على ماقدمتو من قصايد رائعه وجزله

في انتظار جديدك

 

 

 

 

[معلومات العضو سعد المورقي]

الشاعر سلطان المسعري

صح لسانك واعتلا شانك ولاهنت ولايهون الشاعر عبدالكريم

وتقبل مروري

 

 

 

 

[معلومات العضو سلطان المسعري]

لاهنتوا جميعاً على المرور كل الشكر والتقدير

 

 

 

 

[معلومات العضو شافي القويسي المخاريم]

صح لسانك يا ابو حسين
شعراء متميزين
لاهنت على الطرح
تحيااااااااتي

 

 

 

 

[معلومات العضو سالم بن صمهود]

صحـيـح كـلـن تـلاقـي لــه مــزاج ومــذاق=ولــولا اخـتـلاف السـلـع مـاربــح جـلابـهـا

بيني وبين الهواجس مثل حـرب العـراق=قـضـيــة شـايـكــة مـاصـكــت ابـوابــهــا

الشاعرالمبدع سلطان صح الله لسانك ولسان القحطاني وعزالله انها قصايد ممتعة

 

 

 

 

[معلومات العضو السيف دايـم]

صح لسانك ولسان عبدالكريم لاهنت يالذيب وبيض الله وجهك وانا من أشد المعجبين بشعرك الجزل أتمنى لك التوفيق ..

 

 

 

 

[معلومات العضو غــريـب الـدار]

هناااء الشعر

صح لساااانك ولساان عبدالكريم

امتعتونا بهذه الرديه المليئه بالشعر

 

 

 

 

[معلومات العضو سلطان المسعري]

لا هنتوا ومشكورين على مروركم الرائع بالتوفيق