الشايب والوايت

[معلومات العضو مبارك ال بريك]

يسولفون عن شايب نوى يشتري له وايت علشان يسقي الحلال ، وذالشايب متقاعد وشاريله رعية غنم

وفوقها خمسين ناقه ، فأخذ يجمع له دراهم لين صار عنده حول الثمانين خمسة وثمانين ألف ريال ،

فقام وتوكل على الله وعَزْم يروح يدور له على وايت .

صدفه وهو يمشي إلا ذيك الناس مجتمعةٍ في أرض فضاء كبيرة ولا حولهم وايت واقف ، عجب خوينا

الشايب نظرة هالوايت وهو ما شاء الله يبرق من بعيد ووقفته شيء عجيب ، قال بس لقيناه خلني أروح

أوصلهم وأشوف كم هو واصلٍ سومه وإذا هم حادينه أشوف كم هو عليه .

وصل عندهم الشايب ووقف يسمعهم يحرجون ، وأستانس بالحيل لأنه ما هو بغالي ، ولا ذاك الرجال

ماسك المكرفون ويحرج 50 ،، 52 ،، 55 ،، ومن قال زود ، قال الشايب بس شكلهم يحرجون على

هالوايت ولا هوب بغالي وإن شاء الله يكون من نصيبي .

ويخش معهم بالحراج ... 56 ... ويزودون ... ويزود ... ويزودون ... ويزود

المهم وصلوه 75 ... قام خربها وقالهم 80 ...

هو قالهم ثمانين ... يوم طخوا كلهم وسكتوا .. ! ..وهجدوا .. !! .. والتفتوا عليه .. !!!

يناظرونه .. يناظرون بعضهم .. يوم تغامزوا ونقز له واحد منهم .. ويسحبه على جنب وقاله شف يا رجال أنت باين عليك أبن حلال وطيب بالحيل ، وش رأيك لو نعطيك شيك بمليون ريال ذالحين ذالحزه

بس أمش من هنا ولا نشوف وجهك واقف معانا بالحراج .

أنصدم الشايب .. أفتر راسه له شوي وقال هااااا .. وش السالفة .. ؟؟!!

مليون ريال .. وليه..؟؟

قال له الرجال خويهم بس خذ هالشيك وتوكل على الله والله يستر عليك ولا لك بالطبخه

وش أسمك ..؟؟ عطاه أسمه وكتب له الشيك بمليون ريال وصرّف الرجال من الحراج
هو ما يدري وش السالفة .. !!


طيب وش العلم علمني .. ؟؟

علمه بالعلم أثر ذالجماعة يحرجون على المخطط وواقفين بالصدفة جمب الوايت اللي جايبيه يرشون به

الأرض علشان يحرجون ، والحراج من اليوم بـ 56 مليون و75 مليون .. وأبو الشباب (الشايب) خش

عليهم عرض ولا يدري وش العلم .

وهم بعد أخترشوا شوي يحسبونه هامور وبيلطش عليهم المخطط .. قاموا صرفوه بمليون ريال ..



وهو ما صدق طاير من الفرحة مليون ، ويقول بخاطره

(عجزت وأنا أجمع ثمانين خمسة وثمانين ويجيني ذا الرزق من الله)

فسبحان الله مقسم الأرزاق على عباده .
الرزق مثل الأجل يتبعك

 

 

 

 

[معلومات العضو شافي بن راشد النتيفات]

يعطيك العافية يامبارك ورزقه الله يمكن نيته طيبه

 

 

 

 

[معلومات العضو أحمد شمس]

وعلي نيااتكم ترزقون
سبحان الله ..بس خشت الشايب حلووة
وتسلم ياالطيب

 

 

 

 

[معلومات العضو راشد المسعري]

يقولون ( زيّن النيّـه واضرب البريّـة )

جعل اللي عطاه ما يخلينا

لاهنت ياالذيب

تقبل ودي وتقديري ،،،،

 

 

 

 

[معلومات العضو عبدالرحمن بن فلاح آل بريك]

يعطيك العافيه مبارك على نقل القصه .

وجعل اللي عطاه ما يحرمنا ..

 

 

 

 

[معلومات العضو مبارك ال بريك]

المشاركة الأصلية كتبت بواسطة شافي النتيفات

يعطيك العافية يامبارك ورزقه الله يمكن نيته طيبه

مشكور على مرورك اخوي شافي

 

 

 

 

[معلومات العضو مبارك ال بريك]

مشكور ولك مني كل التقدير