رسالة إلى ولدي " فهد " ... وكل ولد !

[معلومات العضو فراج بن فهد آل تركي]

السلام عليكم ورحمة الله وبركاته :

(فهد) لم يتجاوز الثانية من عمره , ولكن أتت هذه القصيدة لتحمل بعض
الآمال والتطلعات التي أرجو من الله العلي القدير أن أراها في ابني وفي كل أبناء المسلمين ,
خصوصاً وأنا قد أخفقت إلى حد الآن في تحقيق بعض تلك الطموحات :

وين (فرعون) المللك وينهم (عاد وثمود)؟!!=وين راح (أصحاب الأيكة ) و( إرم ذات العماد) ؟!!
عقب شامخْة القصور أسكنوا جوف اللحود=مابقى ألا أطلالهم تشهد بضعف العباد
كل كاين حيّ ماله على الدنيا خلود=الخلود لواحدٍ رافع السبع الشداد
والحظيظ اللي تغانم وجوده في الوجود=واكسب الذكر الحسن والهداية والرشاد
يا فهد ياآبوك هذي مقدّمة البنود=واستمع الآتي وأنا ابوك واكتب بالمداد
رافق أهل الدين أهل الركوع أهل السجود=أتقياءٍ دينهم ليس سلعة في مزاد
سجدةٍ لله في الليل والعالم رقود=عندهم تسوى الملايين في ( بنك البلاد )
وجنّب اللي في المعاصي مصادير وورود=قومٍ تشابه للأنعام يامال النفاد
القلوب الغافلة بين نكران وجحود=والوجيه الودره اللي توشّح بالسواد
واتجّه للعلم وابذل حثيثات الجهود=واخلص النيّة ويرزقْك ربّي بإزدياد
وإن عرض لك يافهد في مشاويرك حيود=ارقها وألا فشلها على ظهر الجواد
الظبا ياأبوك من دونها أنياب الأسود=والجواهر دونها القرش وأمواج العناد
والكفو مهما وقع تنهضه روح الصمود=والردي لاطاح طاح وغدى جمره رماد
والجبال الراسية راسية من عصر (هود)=لو تقوم تطير وتوقّع أسراب الجراد
ومن حفظ ربّه وهي توّها سهودٍ مهود=احفظه ربّي من الوقت لاناش الزناد
فاحفظ القرآن ياتي شفيعك في الحشود=لانفِخ في الصور للخلق في يوم المعاد
ومن رحيق السنة انهل وشمّ أزكى الورود=تنتشي روحك ولجروحها تلقى ضماد
ورافق اللي لو يشحّ الزمن كفّه يجود=مايبالي بالخساير ولاويش استفاد
في العطايا تحسبه من عيال ( ابن سعود)=لوهو أفقر في الحقيقة من أهل ( إسلام أباد )
رافقه تاخذ طبوعه ويرقى بك سنود=وإن بداله لازمٍ خلّك لجنبه سناد
والله الله يافهد في شجاعات الفهود=وأعظم أنواع الشجاعة تسطّر في الجهاد
لافتح لك باب : فاذهب .. وجعلك ماتعود=والوعد في جنة الخلد كان الله أراد
حقّق اللي دون تحقيقه أرسف في القيود..=بين لفحات السمايم ونفحات البراد
واحترس من كل غرٍّ ترك حرب ( اليهود)=وانشغل في حرب قومه بتفجير العتاد
يافهد موتة شرف بين ثكنات الجنود=خير من عيشة ترف تحت ظل الإضطهاد
البروق تلوح في نجد وتْدنّ الرعود=والمطر ماهلّ وبله ولارشّ الحماد
من ذنوبٍ نقترفها على مرأى الشهود=ومن تخاذلنا عن مْناصر شْعوبٍ اتباد
ومن سكوتٍ يعترينا ومن ذلّ وجمود=والرسول المصطفى تشتمه بقْرٍ اتقاد
يافهد هذي خلاصة تجارب من عقود=وقالها قبلي هل العرف وشيوخ الشداد
وإن سهجت الخط الأحمر وجاوزت الحدود=فالله ايعزّ الحكومة ويهدينا الرشاد

 

 

 

 

[معلومات العضو ابو زيد الغييثي]

لافتح لـك بـاب : فاذهـب .. وجعلـك ماتعـود=والوعـد فـي جـنـة الخـلـد كــان الله أراد

لله درك نعم الاب انت


لا تعليق هي أكبر مني

واسمحلي اسميها

(( شيخه الوصايا ))

اخوك الصغير

ابو زيد

 

 

 

 

[معلومات العضو هادي الغريري]

الله الله الله




صح كلك يابوفهد وأعتلا شانك






عسى الله يخليه لك ويحفظه يارب





قصيده أعجبتني رائعه قيمه فيها من النصائح والعبر الشيء الكثير






لاهنت ياشاعرنا الكبير فراج بن فهد






سجل أعجابي...

 

 

 

 

[معلومات العضو خالد الخييلي]

الله ينصر دينك يا ابو فهد

والكفـو مهمـا وقـع تنهضـه روح الصـمـود
والـردي لاطـاح طـاح وغـدى جمـره رمـاد

الله الله توقفت عند هذا البيت لاتامله

بيت سيبقى في الذاكره


الشاعر الرائع ابو فهد

شهادتي فيك مجروحه

مواضيع متعدده اجدتها بكل جداره

وعسى ها الرساله تاصل الى كل انسان


صح لسانك وصح فكرك

ابدعت امتعت

اعجابي يتجدد

محبتي ومتابعتي

 

 

 

 

[معلومات العضو رائــــــــــد]

فراج بن فهد
بيض الله وجهك يالقرم
والله يخليلك فهد واخوانة
ويصلحهم ويهديهم
قصيدة تؤجر عليها انشالله
ودمت بالف خير

 

 

 

 

[معلومات العضو عبدالرحمن بن دعس]

صح لسانك

ولا هنت على القصيدة يا فراج بن فهد

 

 

 

 

[معلومات العضو نايف الخييلي]

فراج بن فهد

صح لسانك ,,,, مبدع مبدع قصيده في قمه الجزاله والابداع

يافهـد موتـة شـرف بيـن ثكنـات الجـنـود=خير من عيشـة تـرف تحـت ظـل الإضطهـاد

 

 

 

 

[معلومات العضو قديم الشوق]

ابو فهد أقسم بالله إنك مبدع

قصيدة جزلة من شاعر قدير جدا ً

امتلئت بالحكم والدروس من بين يديها ومن خلفها

شكرا ً لك على هذا الامتاع

وليست بغريبة على شاعر بحجمك

وتقبل فائق تحياتي وتقديري

أخوك / قديم الشوق

 

 

 

 

[معلومات العضو نجــــــــــديه]

لله عليك تسلم يمناك وصح لسانك وسلم راسك وجعلك ذخر كفيت ووفيت وافي نسل قروم لاهنت

 

 

 

 

[معلومات العضو سالم بن صمهود]

الله الله
فراج ابن فهد
اسئل الله العلي القدير ان يجزلك الاجر والمثوبة في الدنيا والاخره وان يصلح لنا واياكم وجميع المسلمين النيه والذريه كما اني اسئل الله ان يقرعينك بصلاح فهد ويجعله من خير خلقه وان يرزقك بره امين امين وصح الله لسانك ملاييين

 

 

 

 

[معلومات العضو الزين]

والحظيـظ اللـي تغانـم وجـوده فـي الوجـود=واكسـب الذكـر الحسـن والهدايـة والـرشـاد

والكفـو مهمـا وقـع تنهضـه روح الصـمـود=والـردي لاطـاح طـاح وغـدى جمـره رمـاد
والجبال الراسيـة راسيـة مـن عصـر (هـود)=لـو تقـوم تطيـر وتوقّـع أســراب الـجـراد

صــــــــــــح لسانك وبيض الله وجهك علي القصيدهـ الطيبه لاهنت يابن فهـــــــــد

 

 

 

 

[معلومات العضو فراج بن فهد آل تركي]

المشاركة الأصلية كتبت بواسطة ابو زيد الغييثي

لافتح لـك بـاب : فاذهـب .. وجعلـك ماتعـود=والوعـد فـي جـنـة الخـلـد كــان الله أراد

لله درك نعم الاب انت


لا تعليق هي أكبر مني

واسمحلي اسميها

(( شيخه الوصايا ))

اخوك الصغير

ابو زيد

يامرحبا ياأبوزيد

ومهما شكرتك فلن أوفيك حقك فأنت راعي الأولة دائم
وراعي الأولة مايلحق

وتسميتك لهذه القصيدة بشيخة الوصايا أعتبره وشاح
فخر ونوط شرف أشكرك عليه جزيل الشكر وهذا من طيبك لاشك

أسأل الله أن يرزقنا وإياكم الإخلاص في أقوالنا واعمالنا
وأن يصلح لنا ولكم النية والذرية

وتقبل خالص تحياتي وأصدقها

 

 

 

 

[معلومات العضو إبن دوسر]

ونعم الاب انت يابو فهد ,,
قصيدة مفعمه بمعاني مفيده !!
احسنت يا اخي فراج بن فهد في كتابتها !!
صح لسااااانك واعتلا شاااااانك ..
ونحن في انتظار جديدك دائماً ..
ويسلم عليك كرباج بعد حظره
( وترى هذا رده )

 

 

 

 

[معلومات العضو العماني]

الشاعر الكبير بوفهد

صح الله لسانك مدد مهوب عدد ، قصيدة جزله كما عودتنا دائما ومليئة بالحكم والوصايا والعبر الثمينه ، وعسى الله يصلح ابنك ويتربى بعزك ان شاء الله ويرزقك برّه .

تقبل تحياتي،،

 

 

 

 

[معلومات العضو فراج بن فهد آل تركي]

المشاركة الأصلية كتبت بواسطة هادي الغريري

الله الله الله


صح كلك يابوفهد وأعتلا شانك


عسى الله يخليه لك ويحفظه يارب

قصيده أعجبتني رائعه قيمه فيها من النصائح والعبر الشيء الكثير

لاهنت ياشاعرنا الكبير فراج بن فهد

سجل أعجابي...

أخي العزيز الشاعر هادي الغريري :

أنار مرورك هذا المتصفح

صح بدنك

وألف شكر لكل حرف كتبته هنا , ولدعائك الكريم حفظك الله من كل سوء ومكروه .

وإعجابك تم تسجيله بين الحنايا

تقبل شكري وامتناني .