|
|||||||
03-12-2006, 10:12 AM
|
#1 | ||||
|
سيرة بني هلال - بــعــد رحيلهم من ارض الجزيرةالعربية
رحلنا ولا ابقينا بنجـدٍ حسوفـه=سوى عيلمٍ بيـن اللـوا وزرود والفين ورد الما والفين صـدره=والفين مـا بيـن العـدام ورود تراه بواد الشري ياجاهلن بهـا=عليها النواز النايفـات شهـود ترد لها تسعين من جلـد بكـره=وتسعين مع تسعين جلـد قعـود لا زاد ورده زاد ميـاح جمـه=عدٍ ليـا حـرك تـراه يـزود دفناه عن نـاسٍ تـولاه بعدنـا=شحاحٍ ولا بالطايـلات تجـود بذرنا عليه الجود لين امحلت به=سنين القسى ما لجلجن برعـود ورحنا وعنه النفس ماهيب طايبه=عسانا ليا عاد السحـاب نعـود عسانا نعود ونبتها يكسي الوطـا=ومن عشب ترمسها عليه ورود غربيها زيزا بها الريم والمهـا=وشرقيهـا يـذرا عليـه نفـود عسى إله الكون يسقي ترابهـا=وعليها بدهم الممطرات يجـود حيث انها تالد بها شمـخ الـذرا=ونصيهـا للصافنـات مــدود رحلوا الهلاليه وطبعا معهم حلفائهم الزعابى ( قبلية زعب ) وما خلوا وراهم احد الا عليا إمرة ابوزيد الهلالي لانهم قبل لا يرحلون كان فيه مشكله بين اهلها وبين بني هلال وكانت عند اهلها في نفس الوقت .... .ورفضوا انها ترجع لبني هلال لين يجي ابوزيد ويحل المشكله ويوم جاهم ابوزيد بالإخبار وعرف ان عليا عند اهلها تركها على امل انه يرجع لها اذا خلص من مشكله الزناتي وجماعته.... مشت ركايب الهلاليه وخيلهم وكان ابوزيد يردد ابيات يقول فيها
يقول ابو زيد الهلالـي سلامـه=تجار نجد( ن) هالني كبر زومها يقولون ذا ونقـول لا ثـم ننثنـي=لحاجاتنا ناطا الغلا من حكومهـا عفا الله عني ليلـه بـت ساهـر=بجو السميراء بت اساهر نجومها بـت لكنـي شـارب قرقفـيـه=امدفقه فيهـا الافاعـي سمومهـا نفسي تمنيني علـى ذبـح خيـر=على غير حق اوهمه من اوهومها وهو يذبح الكوما الى قلص القرا=ولا قال يكفي درها عن لحومهـا ولولاه مـا بتنـا بنجـد عشيـة=ولا وقفت زلباتنا فـي حزومهـا وهو حسن الشده وحسن الرخـا=وهو اميرنا في جميـع علومهـا ولو العجوز العامريه ما ارثـت=لنا حسـن كنـا جميـع نلومهـا في طريقهم مروا على العراق وكان فيه حليف لهم يقال له عامر الخفاجي وكان امير قبيلته وكان له قصر معروف باسم الاخيضر نزلوا عند الخفاجي ماكتب لهم من ايام واكرمهم... ويوم ننوا الرحيل الى تونس ما قدر الخفاجي يصبر يوم شاف الخيل والفرسان وشاف بنات بني هلال حب انه يشارك معهم ويكسب سمعه جهز نفسه ومن معه من ربعه ويوم نوا يمشي منعته امه ولا امتنع وقامت تلحقه وتلح عليه يجلس ما سمع كلامها وقال فيه واحد من ربعه....
ولد الخفاجي راح وامه تذوده =خذن قلبه بالمنى والمواعيد يبغى يطلع مع هل الخير جوده =ورث لنا قصر الاخيضر وعربيد ( عربيد) ثعبان ضخم كان يربيه الزناتي في قصره بعد ما اقتربوا بني هلال من تونس ارسلوا مرسولهم للزناتي يبلغه انهم وصلوا واذا ما فك المساجين وسمح لحلالهم يرعى في دياره انهم بيصبحونه دخل المرسول على الزناتي قال الزناتي
لا هلا فيكم ولا مرحبا بكم =منين جيتوا يا ضراب الشعابه
قال الهلالي
جينا نبا المرعى ونسكن عندكم =والكل منا واقف ( ن ) دون واجبه
قال الزناتي
ترى وعدكم طلعة الشمس باكر =واللي يتردى يحسن الموس شاربه
رجع الهلالي لربعه وبلغهم ان الزناتي يتحدى ولا يبغى الصلح... جهزوا الهلاليه انفسهم وخيلهم وعدتهم وعزلوا له تسعين الف من فرسانهم وفي مقدمتهم الامير حسن بن سرحان وابو زيد الهلالي وخلوا بعض الفرسان عند الحلال والحريم والعبيد حمايه واذا احتاجوهم ارسلوا لهم.... هجموا على الزناتي وربعه واستمرت معاركهم شهر ما ردوا خبر للي وراهم من فرسان ولا بلغوا اهلهم عن كل اللي يصير معهم... بعد شهر قتل اكثر الفرسان من الطرفين وارسلوا الهلاليه مرسولهم يستنجد بباقي الفرسان وكان المرسول عبد من عبيد بني هلال واسمه سعد .... اول ما وصل سعد لربعه استقبله ذياب بن غانم وكان صغير ما عمره شارك في معركه قال ذياب
ياسعد خبرني ولا تكن ما جرا =عن الخيل والفرسان من جا خيارها انشدك عن سابق بدير بن وايل =هي من طوال الخيل او من قصارها قال سعد
يا سيدي سابق بدير بن وايل =ضربت بسيف هد عالي فقارها
يقصد انه قتل قال ذياب
انشدك عن عيال الزعابى الثلاثه =هم عزوتي يا سيدي من خيارها
قال سعد
يا سيدي كل الثلاثه ذبحوا =ما جيتك الا قد توافت عمارها
قال ذياب
انشدك عن ولد الخفاجي عامر =عساه سالم من بلاوي اخطارها
قال سعد
ثلاثين يوم(ن) حام الترك عامر =ولك الله ما يعرف ليلها من نهارها ومن ذبحته كل النسا زاد حزنهن =يهلن على قبر الخفاجي عبارها قال ذياب
لا حلكم لا بلكم وابل الحيا =يقطع نجوع (ن) ما ثنت دون جارها
زعل ذياب وضرب العبد بعقب الرمح وجهز نفسه للغزو مع باقي الفرسان وكان ابوه ما له غيره وكان كبير سن وقعد يوصي ذياب ويقول له تجنب الزناتي والعلام وهو يوصيه سمعته ام ذياب وردت عليه بها الابيات
لا تردي ابني يا هداني مقصر=عساك عن برد الجنان تغيب عساك يا ابني وان تداريت عنهم=شلفاه تخطيهم وفيك تصيب تباعد عنا يا ذياب بن غانم=له حربة (ن) تدع الوليد يشيب له حربة ( ن) ما ياقع الطل فوقها=عشاه من دم الرجال غصيب وصولوا باقي فرسان بني هلال للمعركه واشتبكوا مع بني قابس وكان من اشجعهم ذياب بن غانم وكان له فعل مشهود لانه كان يقترب من قصر الزناتي ويرهب فرسانه اللي كانوا حارصين قصره لدرجة انهم اذا شافوه كانوا يهربون منه حتى ان المساجين ( يحيى ومرعي ويونس ) يشوفونه ولا يعرفونه.... لانه ما هو من فرسانهم المعروفين وفعله فعل فارس وكانوا يسالون سعدى الصفيرى عنه وهي ما تعرفه قالوا لها روحي واسالي أي واحد من بني هلال يقول لك منهو راح ووقفت واحد من بني هلال وقالت له
وقف نبي ننشدك يا شايع النبا =عن الخيل حتنا اليوم موم شليلها
قال
ما غير فارس الدهما ذياب بن غانم =حامي خفاف الخيل ملحق ثقيلها
جتهم وقالت لهم انه ذياب بن غانم ما صدقوها لانهم يوم راحوا لتونس ما كان لذياب أي فعل ولا يعد من الفرسان قالوا لها روحي واسالي واحد غير اللي سالتيه الاول راحت ووقفت واحد وقالت له
وقف نبي ننشدك يا شايع النبا=عن الخيل جتنا بالرجال شرود
قال الهلالي
ماغير فارس الدهما ذياب بن غانم=وترى الشوف خرز والكلام يكود
الزناتي في ها الوقت كان حاط له كلاليب على امتداد قصره يعرفها هو ويبتعد عنها ودائما تخطف الفرسان ويعود عليه الزناتي ويقتله حاول الزناتي انه يستطرد لذياب ( يحاول ان ذياب يطارده ) ... يبي يجره للكلاليب حتى تصيب ذياب ويطيح من فرسه ويرجع عليه ويقتله وفعلا استطرد لذياب وطارده ذياب بعد مسافه انثنا الزناتي على ذياب لانه توقع انه طاح في الكلاليب لكن تفاجا ان ذياب وراه ما طاح وضربه ذياب بشلفاه اللي كان مسميها ( سم ساعه )... وطاح الزناتي وتجمعوا عليه فرسانه وخلصوه قبل لا يموت ودخلوه قصره بين الحياة والموت وقال قصيده يشرح فيها ما صار من بدايه قصته مع الهلاليه...... وهو يقول
يقـول الزناتـي والزناتـي خليـفـه=نفس الفتـى لا بدهـا مـن زوالهـا حلمت ليا ناش(ن ) من الشرق مزنـه=تمطر كمـا شـوك البلنـزا خيالهـا مشت خميس( ن) وامطرت يوم جمعه=وهلت علـى قومـي مقـدم فعالهـا مطرهـا السبايـا والصبايـا وبرقهـا=سيوف( ن) تلظا في يمانـي رجالهـا ياليتنـي مـا صـرت شيـخ لقابـس=واهني نفس ( ن) ما عليهـا ولا لهـا واهني نفس(ن) ما كلت مـال مسلـم=ولا اخلطـت مـال اليتامـا بمالـهـا نظرت بقومي نظرة (ن) ما تسرنـي=وجيـه العـذارى طلقوهـا رجالهـا كبـار اللحـا لا بـارك الله باللحـي=صغار اللحي شبـوا بقومـي فعالهـا الا وابـلادي زينـة المـا مريـفـه=مدعوجـة (ن) بالنيـل تنـدا جبالهـا مساس عن الرمضا دكاك عن الحصا=والبق والبرغـوث مـا جـا بجالهـا واشيب عينـي مـن عريـب تنزلـوا=على مجنب البطحـا وبنـوا حلالهـا بنـوا حـلال مـن حلالـي قريبـه=بنـوا حـلال شـاق عينـي دلالهـا تـرى خيلنـا تسعيـن الـف نعدهـا=وتذكـر لنـا خيـل الهلالـي مثالهـا ولوتجتمـع خيـل الهلالـي وخيلنـا=ابـا زيـد يركيهـا ويركـي مثالهـا خان الصفيـرا يـوم خانـت بابوهـا=ولا بنـت الا فـان ابوهـا دلالـهـا تشير بربط القـوم واطـلاق عبدهـم=واثـر عبيـد القـوم حامـي ثقالهـا اثـر عبيـد القـوم زيـزوم سربـه=يجر القنـا جـر السوانـي حبالهـا يشل الدمي شل الدلـي يـوم تمتلـي=لاماحهـا الزعـاب ثـم ارتكالـهـا سيفه تعايـوا عنـه صنـاع دمشـق=ليـا ولا جمجمـة الـراس شالـهـا لكن عوى شامان في طـوس روسنـا=عوا ذيبة (ن) تعوي لذيب (ن) عوالها وانا شاهد(ن) للعبد فـي ربـع هدتـه=ثمانين مـن قومـي قلايـع رجالهـا هذا لـو ان العبـد قـد هـد مثلهـا=علـي كـان التـرك تيتـم عيالـهـا اثـره اميـر ولـد اميـر مـجـرب=ليـا هـد تعطيـه السبايـا كفالـهـا ترى ما يجي عني مثل حذفه العصـا=واسرع مـن دور الرحـا اشتغالهـا ولولا بخـط الرمـل شيفـت منيتـي=بسيـف ذيـاب قـد لابازيـد ازالهـا هو قـدم قومـه وانـا قـدم قومـي=وهـو فهـد القنـاص وانـا غزالهـا حذرا من اللي كفيت القـدر وجهـه=لا جا جنوب الخيل صيـروا شمالهـا اللـي قلـع حـدري ثمانيـن سابـق=كبيشات ما في نجـد ربـي امثالهـا واللي قلعت حدره من الخيـل تسـع=والعاشره بالسيف انـا زلـت حالهـا اليا اعقر لـه سابـق جـاه مثلاهـا=واليا اعقر لـي سابـق جـا مثالهـا ان امهلت دنـاي وادركـت هقوتـي=لازيل الصفيرى عـن حيـاة تنالهـا مهبول يا مهبـول مـن يامـن النسـا=ومن يامن الحرمه الا اقفـت بفالهـا ليا بغـت درب الـردا مـا يكودهـا=تاطـاه لـو انـه حماقـا رجالـهـا مااااااااااااااااااااااات الزناتي ورثته ابنته سعدى في قصيده تقول فيها
تقول فتاة الحيّ سعدى وهاضهـا= لها في ضعون الباكييـن عويـل أيا سايلٍ عن قبر الزناتي خليفـه=خذ النعت مني لاتكـون هبيـل تراه العالي الـواردات وفوقـه=من الربط عيّساوي بناه طويـل وله يميل الغور من سايل النقا به=الـواد شـرقٍ والبـراع دليـل أيا لهف كبدي يالزناتـي خليفـه=قد كان لعقاب الجيـاد سليـل قتيل لفتى الهيجاء ذياب بن غانم=جراحه كأفـواه المـزاد تسيـل ياجارنا مـات الزناتـي خليفـه=لا ترحـل ألا ان يريـد رحيـل صار العلام هو الحاكم والقائد في المعركه بعد الزناتي كان له فعل قليل من الفرسان يقدر يوصل لمستواه وخاض بني هلال معارك كثيره ومن ضمنها معركه اصيب فيها الفارس ذياب بن غانم الزعبي وكان بني هلال في هذه المعركه ثلاثين رجل هرب منهم عشره وعشره خافوا ولم يتقدموا وتقدم لهم عشره منهم ابوزيد الهلالي وذياب بن غانم وسرور بن قايد وهو من فرسان بني هلال ... وكان العدو قد نصب كمين لبني هلال وجهز الف رجل للقاء بني هلال وبعد ان التقوا واشتبكوا تقدم واحد من العدو واسمه ( وهق ) وضرب ذياب ضربه جرحته وافقدته الوعي وعندما صحي انشد قصيده يمتدح فيها فعل جماعته الذين صمدوا ويذكر فعل عدوه وهق الذي اصابه يقول ذياب :
يقول الفتى الزعبي ذياب بـن غانـم=لي راي(ن) اقسى من حديد المبارد ولي حربة (ن) سميتها (سم ساعـه)=اعـرض بهـا فالكـون مـا كايـد حنـا بلينـا فالخـلا بالـف فـارس=وحـنـا ثلاثـيـن ولا زاد زايــد اهل عشر منا تـدب الخيـل بالقنـا=كز(ن) ليا شـروا هشيـم الوقايـد ابا زيد من ايمنهم وانا من شمالهـم=كما النار لا شبت ببعض الحصايـد واهل عشر منا هملوا روس خيلهـم=واهل عشر منـا موكديـن الشهايـد ينخون خيال (ن) بهـم مـا عرفتـه=يقولون يا وهـق يـا ابـا العوايـد ضربني وهق وانا مشيح(ن) لغيـره=وليا الدرع غاد(ن) فوق متني بجايد ضربني برمح (ن) تسعة ابواع طوله=وقنطاره اللي من ورى الباع زايـد سديته بسمـاي وثوبـي ومشلحـي=ايضـا ولا سـده جميـع السدايـد ولكن طاحت الدهما وانا طحت فوقها=يا طيحة(ن) ما هـي لنـا بالعوايـد ولكن قامت ا لدهما تومـي بعدتـه=وانا كما شن (ن) على القـاع بايـد وانا رفعت الراس من بعـد سـدره=ليا الخيل يدبهـا سـرور بـن قايـد على سرج قبا عنـدل بنـت عنـدل=مرفوعة الذرعان مـن خيـل قايـد قل عشت يا قرم(ن) ثنا دون ربعـه=بيوم (ن) به المسنـاد والـرد كايـد حنا عصافير (ن) وابا زيـد سـدره=نلوذ بـه عـن مرهفـات الحدايـد ومن فرسان بني هلال الذين قتلوا في هذه المعارك عمير بن راشد وقد قالت اخته عميره فيه قصيده ترثيه فيها تقول عميره
قالت عميره بنت من يمنـع التـلا=قيـل حثاحيـث القبايـل رحايلـه قيل الى من عد في وسط مجلـس=تعايا به الفهـام عـن اثـم قايلـه عزي لراع الغوج وان لحقن اربع=والخامسه دز العكا مـن سلايلـه عليهن بالجهلا عمير بـن راشـد=اخوي الذي تشكي العدا من فعايله اخوي الذي ما جابت البيض مثلـه=ما هوب غرجا يـوازي حمايلـه مدمي خشوم الفوس من شمخ الذرا=عمير ليا عيا على الحـب كايلـه ليا هبت النكبا وقـل وابـل الحيـا=تلقـى عميـر كاثـرات نزايـلـه وحنا الذي نكتال بالصـاع وافـي=واللـي يعادينـا انهفـي مكايلـه وحنا الذي نعزي الجنيني عن امـه=وحنا الذي نعزي الفتا عن حلايلـه اشتدت المعارك على بني هلال وكانت بقياده العلام اللي اسرف في قتل فرسان بني هلال ولا احد يقدر صده الا ابو زيد اللي سبق ان تعاهد معه عند القدور ان ما احد منهم يقتل الثاني مالقى ابو زيد حيله او أي طريقه يتخلص منها من العلام راح واستشار عجوز صاعنه في السن وقال لها انه بيقتل العلام حتى لو خالف عهده قالت العجوز لا تقتله لكن اعقر فرسه ( يعني اقتلها ) اذا كثروا الفرسان من حوله لان العهد اللي بينكم انكم ما تقتلون بعض ولا تعاهدوا على الخيل واذا طاح بين الفرسان استطاعوا قتله بدات المعركه في اليوم الثاني وكان هدف ابو زيد قتل فرس العلام وكان ينتظر ان يكثروا من حوله الفرسان وفعلا عندما اشتبكوا وكثر من حوله الفرسان ضرب ابو زيد فرس العلام وقتلها قال العلام لابو زيد
ابا زيد بقت العهد الذين بيننا =تبوق عهد الله يالغدار
قال ابو زيد
لك الله يالعلام ماني ببايق=ما بيننا والسابقات جوار
قال العلام
ابازيد جرني سبق الخيل جنني=عليها حماقا يدعون بثار
قال ابو زيد
لك الله يالعلام ماني بشيخهم=قدمي كبار ومقتفين صغار
قال العلام
خذ السيف والدبوس مني هديه=قدام لا اذبح يوخذن جهار
قال ابو زيد
اهب يالعلام ما اقوى باسك=لو هي بغيرك كان عقله طار
قال العلام
والله يا لو به مدفع ما لحقتني=لو رف مهرك بالجناح وطار ولو دامت العباد تقرا مصاحف =يوم(ن) دنا ما زودوه نهار مااااااااااااااااااااااات العلام بعد موت العلام استولى بني هلال على كل شي حتى على ديار بني قابس وصارت السلطه لهم والامر لهم وقد قال ابو زيد قصيده يذكر فيها اهم الاحداث من يوم ما ارسل ألى ان استتب لهم الامر يقول ابو زيد
يقـول ابـو زيـد الهلالـي سلامـه=قلبـي لعبـا بيـن شـاري وسـايـم قالـوا تقـدم ياسلامـه فـلا هـفـا=مقامك يـا ذيـب السرايـا الدواهـم طلبت الفتى يحيى ومرعـي ويونـس=ولا غيـر هـذا ولا رفيـق يـوالـم دعيتهـم والـكـل دنــا قلـوصـه=دعيتهـم ثـم احـرمـوا بالمـحـارم سرنا بليل(ن) بـه قليـل(ن) نجومـه=مغلنطـس والجـدي بالجـو حـايـم سرنـا لمـا قالـوا الربـع كلـهـم=زهابنـا كـمـل حــذات الذمـايـم قلت ابشروا ثـم ابشـروا ثـم ابشـروا=بعـز(ن) ورد كـل يـوم (ن) يوالـم سرنـا مـع الحـرات تسعيـن ليلـه=نقـود ا لطوعـات خلـف الجهايـم وردنا بها تسعيـن عيـن(ن) غزيـره=ولا اسقانـا عقـب الفـلا للبهـايـم سرنـا علـى اللـي بالقـا واعديينـا=على شيخنـا غاديـن مثـل العلايـم عزلنـا لهـم تسعيـن الـف مـدرع=من اهل عزوتي واهل الوفى والعزايم ضربنا بهم ضرب(ن) بدوس(ن) وهمه=كـز العوالـي والسيـوف الصيـارم تبك الصفيرا عبـرة(ن) بعـد عبـره=تزيـد علـى ماقيـل آه(ن) وهـايـم وقال ابـن سرحـان عليهـا مجـوره=حـرام (ن) عليهـا مالغيـري تلايـم قـال ذيــاب بـدلـوا ذا بغـيـره=انا شوقهـا انـا ستـر قـان الرقايـم كثـرت مـن هـذا وكثـرت مثـلـه=وطال العيا بينـي وبيـن بـن غانـم ولا يــد الا ويــد الله فـوقـهـا=ولا ظـالـم الا ويبـلـى بـظـالـم واعمارنـا راحـت نـداري زماننـا=ولا خير في عمـر(ن) مـداره دايـم ولا خير في عمـر الفتـى وحياتـه=ليا عـاد مـا تكثـر عليـه الجرايـم لك الله مـا ذقنـا بنجـد(ن) طرابـه=حذا العيـد اوحـذا ليـال الصرايـم يانجـد لـو ان الجفـى منـك مـره=صبرنـا لكـن الجفـى منـك دايـم يا نجد وان جاك الحيا فارسلـي لنـا=مع الطير والا مـع هبـوب النسايـم يا نجد وان جاك الحيا فاصعقـي لنـا=صوت (ن) رفيع موقض(ن) كل نايـم سرنـا خـلا العـد تسعيـن ليـلـه=ليا دار قوم (ن) مـن كبـار العمايـم سعولنـا بحبـال شــرع قطـايـب=حطـو يدينـا مـن ورانـا حـزايـم قال احبسوهم عنـد سعـدى وحيهـا=لمـا يجـي فيهـم امــام يـسـاوم اقفوا بنـا والفـوا بنـا عنـد منـزل=بدر(ن) تجـلا عنـه بعـض الغمايـم قالـت لنـا يالربـع ويـن ديـاركـم=ومنيـن جيتـوا يـا رجـال العزايـم قلنـا لهـا حجـاج مـن دار عامـر=تقـازا بنـا اكـوار البكـار الهمايـم قالـت لنـا والله مــا ذا بعلمـكـم=كذبتـوا علينـا يـا وجيـه الخدايـم معي علمكم من يوم سرتوا من اهلكـم=تقـازا بـك اكـوار البكـار الهمايـم معي علمكم يحيى ومرعـي ويونـس=وابا زيـد لبـاس الـدروع الرسايـم قلنـا عطـاك البيـن انتـي طبيـبـه=او زاد لـك بيـن السرايـر معـالـم قالـت لـنـا والله مـانـي طبيـبـه=ماغير اشوف اللي به المـوت حايـم ابـا زيـد لا بــد مــا تملكونـنـا=وتسعون لنا بعـض الليالـي وهايـم ويذبـح ذيـاب او سميـه والــدي=وياخذنـي منـك ذيـاب بـن غانـم قلت قولـي خيـر عسـى تاجدينـه=وربـي لـراع الخيـر يلقـاه دايـم راحت تخطى يـم ابوهـا تقـول لـه=الا يا ابـو احـذر لشـوري تعاسـم يا ابوي ربـط العبـد يدنـي معيـره=لو كان فـي وسـط القبـور الهدايـم قـال لهـا يابنـت شـورك مبـارك=قومي وجزي حبـل نسـل الخدايـم جتنا تخطى فرحـة(ن) غيـر كرهـه=تقول ابشروا يالربع ابـا زيـد سالـم دنيـت للزيـزا صميـل ومـزهـب=ودنيت لي رمـح(ن) طويـل العلايـم ودنيـت لـي مـا مونـة هيلكـيـه=وان سندت لي قاعد(ن) صرت قايـم اللي سرتهـا تسعيـن ليلـه وانختهـا=ليا حسن فـي نجـد اثـار المكـارم تجينـي النجـلا تفـتـش مزهـبـي=ولقت خطوط (ن) فيه زيـن الرسايـم قالت ابا زيد هو ما قال يحيى وقلت له=حث الخطا ليـا نـادم الحـي نـادم قامت تناعت لـي رجـال الزعامـه=يالبيـض طلعـن الغطـا واللثـايـم وصاح ابن سرحـان بشبـان قومـه=وترى اول من مشى ذياب بـن غانـم سرنا على هجن(ن) قد انقـاد حيهـا=وعرض لنا طيـر الفـلاح ام سالـم في ها الوقت طاح المطر على الجزيره العربيه وتاخر ابو زيد ما رجع لعليا وارسل له قصيده تساله عن اسباب غيبته وان المطر نزل على ديارهم في نجد ووقتها كانت عليا في بيشه تقول عليا
ياركب اللي مـن عقيـلٍ تقللـو=على ضمرٍ شروى الحنايا نحايل ابا اوصيكم وصاةٍ ماتثقّل ركابكم=خفيفه على راعي الثنا والجمايل واليا لفيتو لاهلكم عقـب غربـه=متغبطينٍ فـي بطـون الحلايـل فقولو لبو زيـدانّ بغانـي بغيتـه=وأنّ دوّر البـدلا لقينـا البدايـل كمٍ رجوس الحجل تبلـى بعاقـه=وكمّ عقةٍ تبلى بوافي الخصايـل أنجبت أخضـر مايـزرر ثيابـه=هبيل يلعـب بالقلـوب الهبايـل والله لولا البحـر بينـي وبينـه=جيته على وجناّ من الهجن حايل أبا زيد غرّات الصبـا لاتغـرّك=ترى الهجن خيرٍ بالسرا والقوايل بالشتا عليك من الهجن سمرغيّـه=وبالقيظ دوّر من كبـار الشمايـل غزاليّـة المقـدم جماليّـة القفـا=عليكم بهـا ياراكبيـن الرحايـل أبا زيد لوّ انّ النسا تركب النضا=جيتك على وجناّ من الجيش حايل لكن صريخ الكور حدري وفوقها=صريخ القطا في محكمات الحبايل أبا زيد تنساني وتنسـى جمايلـي=الله أكبـر يانـكـور الجمـايـل نسيت يوم انّ عرقات الارطا بيننا=يوم انّ جعدي فوق متنيك مايـل ويوم وصلت الرساله لابوزيد ركب ذلوله وتوجه لبيشه اول ما وصل وشاف عليا عرفها وقبل ما تعرفه ويوم تعرفت عليه استغربت من شكله متغير وقالت له
وراك يا ابوزيد غاد(ن) شايب=شايب ومشهوهب وكنك ذيب انا اشهد ان البعد ما يهم طيب=ولا هو على جزل الرجال صعيب قال ابو زيد
بلا من هجرك ومن غربة النيا=ومن نوبتن تزمي وهذيك تهيب اهلك بالوديان وديان بيشه=واهلي شمال الشمس يوم تغيب انتهى ،، والسلام عليكم ورحمة الله وبركاته ،،،
|
||||
|
|
|
|
03-12-2006, 04:51 PM
|
#2 | ||||||||
|
مشاركة: سيرة بني هلال - بــعــد رحيلهم من ارض الجزيرةالعربية
لاهنت أخوي صالح
|
||||||||
|
|
|
|
04-12-2006, 10:04 AM
|
#3 | |||||
|
مشاركة: سيرة بني هلال - بــعــد رحيلهم من ارض الجزيرةالعربية
اقتباس:
ما عليك زود أخوي/ يحيى الودعاني ،،، و لا هنت على مرورك الطيب.
جعلها تزين حياتك يالغالي. مع خالص التحية و التقدير ...
|
|||||
|
|
|
|
05-12-2006, 12:36 AM
|
#4 | ||||||||
|
مشاركة: سيرة بني هلال - بــعــد رحيلهم من ارض الجزيرةالعربية
تسلم
|
||||||||
|
|
|
|
05-12-2006, 09:14 AM
|
#5 | |||||
|
مشاركة: سيرة بني هلال - بــعــد رحيلهم من ارض الجزيرةالعربية
اقتباس:
من قال سالم ،، لا هنت على المرور الطيب.
مع خالص التحية و التقدير ،،،
|
|||||
|
|
|
|
05-12-2006, 10:37 AM
|
#6 | ||||||||
|
مشاركة: سيرة بني هلال - بــعــد رحيلهم من ارض الجزيرةالعربية
الأستاذ صالح الجعيدي
|
||||||||
|
|
|
|
05-12-2006, 10:43 AM
|
#7 | |||||||||||||
|
مشاركة: سيرة بني هلال - بــعــد رحيلهم من ارض الجزيرةالعربية
|
|||||||||||||
|
|
|
|
06-12-2006, 12:30 AM
|
#8 | |||||||||
|
مشاركة: سيرة بني هلال - بــعــد رحيلهم من ارض الجزيرةالعربية
[align=center] اقتباس:
والصحيح ان عميرة واخها ليسوا من بني هلال بل من الضياغم و الضياغم لهم هجرة تشابة هجرة الهلالات والقصيدة ليست مرثية بل فخر بأخها وقصة القصيدة هي : ان لبني ضيغم فارسين وهما عرار وبن عمه عمير وكانو شيوخ قبيلتهم وفي نفس الوقت وكان الأمير عرار متزوج من عميرة اخت عمير و الأمير عمير متزوج من ميساء وايضاً كانا يكرهان بعض ولكن عرار كان يتفوق على بن عمه عمير بانه يمتلك الحصان مشهور وكان عمير يريد ان يلقح فرسة من حصان عرار ولاكن كان عرار يرفض . فم يكن من عمير إلا ان اتى بالحيله واخبر أخته بأن تجلب له الحصان ويلقح الفرس . اثناء نوم عرار ذهبت عميرة واخذت الحصان إلى اخها الذي لقح خمسة من افراسه . و بعد ثلاثة أعوام تم تدريب الأمهار الخمسة وعند استعدادها للكر والفر أٌ قيمة معركة بين عرار وجماعته وعمير وجماعته وتفاجاء عرار بوجود هذه الأمهار التي تشابه حصانة . وعند انتهائه من المعركة لم يقع شك عرار سوى على زوجته عميرة وعند سؤاله لعميرة وأعاطها الأمان فاخبرته بالصحيح فانشد عرار قائلاً : الخيل يامشهور والخيل جردت *** على طمع أو زال بالعين زايله حصاني عدا بالخيل لا صار طاري *** وإن كان مطرودٍ فلحدٍ بنايله حصاني عقابٍ من شواذيب مرقب *** تحدر على كدري نزع من مقايله فردت عليه زوجته عميرة قائله : قالت عميرة بنت من يمنع التلا *** قيلٍ حثاحيث القبايل رحايله قيل إلا من عد في وسط مجلس *** تعايبه الشعار غيركم قايله عزي لراع الغوج وإن لحقٍ أربع *** والخامسة تبرالهن من سلايله ذرعان قطنه وكنها وأذكر الله *** ذرعان غرافٍ عطشاتٍ شوايله عليها بلا جهلا عمير بن راشد *** أخوي الذي تشكي العدا من فعاليه أخوي الذي يعزي الجنين عن امه *** أخوي الذي عز الفتى عن حلايله أخوي الذي ماجابن البيض مثله *** ماهوب غرجاضٍ يوازي حمايله أخوي إليا مشا يمشي مكنهل *** على روضةٍ قفرٍ تهاوى رحايله إمحني خشوم الفوس من شمخ الذرا *** عميرٍ إلا عيا على الحق كايله إلا هبت النكبا وقل وابل الحيا *** تلقا عمير كاثراتٍ نزايله ليل ونهارٍ من دخاخين بيته *** وليل ونهارٍ من مصالى شعايله حنا الذي نكتال بالصاع وافي *** والي يعادينا هافياتٍ مكايله ولا حربٍ إلا حربنا يالراشد *** جاسٍ ورصراصٍ وضلعٍ هضايله ولا طيبٍ إلا طيبنا يالراشد *** وطيبٍ بلا صبرٍ فلحدٍ بنايله وعند إنتهاء عميرة من إنشاد هذة الأبيات لطمها عرار لطمتً اوقعت إحدى ثناياها والقصة طويله سوف أذكرها إن شاء الله وهذة الرواية من الشيخ عبدالطيف بن عقل بن جاسر بن قشعم القشعم من سكان مدينة الرياض وسكان في حي النسيم الشمالي في شارع عبدالرحمن بن عوف هذا واشكرك يا اخي الكريم على الرواية وعلى تعبك في سردها وهذا شيْ ليس غريب على أمثالك فأمثالك ايها الأخ العزيز هم من حافظ على التراث
|
|||||||||
|
|
|
|
11-12-2006, 02:09 PM
|
#9 | |||||
|
مشاركة: سيرة بني هلال - بــعــد رحيلهم من ارض الجزيرةالعربية
اقتباس:
أرحــب يا "أبو محمد" ترحيبة المطر ،،، من قال يسلم ولا عدمناك يالغالي.
ما عليك زود ،، من قال ما يهان ،، وجهك أبيض يالقرم و عسى حياتك تزين. مرورك أعزه وأغليه يسعدني ويشرفني دائماً ،، مع خالص التحية والتقدير ،،،،
|
|||||
|
|
|
|
11-12-2006, 02:11 PM
|
#10 | ||||||||||||||
|
مشاركة: سيرة بني هلال - بــعــد رحيلهم من ارض الجزيرةالعربية
اقتباس:
يا مرحبا بــ "ابو عبدالرحمن الودعاني" ترحيبة المطر ،، الجميل مرورك يالغالي.
ومن قال ما يهان ،، مرورك يسعدني و يشرفني ،، مع خالص التحية و التقدير.
|
||||||||||||||
|
|
|
|
11-12-2006, 02:15 PM
|
#11 | ||||
|
مشاركة: سيرة بني هلال - بــعــد رحيلهم من ارض الجزيرةالعربية
|
||||
|
|
|
|
18-12-2006, 11:08 AM
|
#12 | ||||
|
مشاركة: سيرة بني هلال - بــعــد رحيلهم من ارض الجزيرةالعربية
للرفع
|
||||
|
|
|
 |
«
الموضوع السابق
|
الموضوع التالي
»
| الذين يشاهدون محتوى الموضوع الآن : 6 ( الأعضاء 0 والزوار 6) | |
| أدوات الموضوع | |
| انواع عرض الموضوع | |
العرض العادي
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| إهانة إمام جامع بوادي الدواسر لصلاته بآية "الدفع بالحسنى" | الحجازي | :: قسم السياســة والإقتصاد والأخبار :: | 3 | 13-09-2010 01:57 AM |
|
|
|
إعلانات نصية |
| منتديات صحيفة وادي الدواسر الالكترونية | |||
الساعة الآن 10:53 AM
