قم يامحمد وأكّد الحجز بالحال

[معلومات العضو راشد المسعري]

السلام عليكم ورحمة الله وبركاته:

قصيدة قالها الشاعر بعد أن سافر مع أصدقائه لشرق آسيا في مهة "تجارة" ولكن الجو العام هناك لم يناسب لصاحبنا فقطع إجازته وقال:-


قم يا محمد وأكّد الحجز بالحال
نبغى السعودية ديار الجدودي

ما عاد إلي في ديرة الشرق منزال
سلم العجم ما هوب سلم السعودي

قضيت عشر أيام ما ارتاح لي بال
لا عاد يومٍ فيه طفت الحدودي

تركت دار العم والجد والخال
دارٍ بها الطيّب يبين ويزودي

ونزلت في دارٍ على ألوان وأشكال
مدري من الإسلام ولا يهودي

عيني بها شافت خرافات وأهوال
لعل ما شافت لها ما يعودي

في وسط جاكرتا بلا ثوب وعقال
أمشي وكنّي حابستني قيودي

قلت السلام وقالوا الناس وش قال
قلت أتّبع سلمي ونرقى سنودي

قالوا تكيف قلت للكيف فنجال
كيفٍ على هيلٍ وبنٍ وعودي

ما هوب كيف مغنية كل موال
اللي تجيب الهرج بيضن وسودي

قالوا هبيل وقلت صاحي ورجال
أحرص على ديني ولجله نذودي

قالوا تمتع وأنعش الحال بالمال
قلت اسمحوا لي ما نبيح السدودي

حنا السعودية على مر الأجيال
طبعٍ لأهلنا حافظين العهودي

وقم يا محمد وأكد الحجز بالحال
نبغى السعودية ودار السعودي


فرح بن هلاّل العضياني العتيبي

 

 

 

 

[معلومات العضو حمد ابن فهد]

صح لسان العتيبي وبيض الله وجهك يابومحسن

قلت السلام وقالوا الناس وش قال
قلت أتّبع سلمي ونرقى سنودي

قالوا تكيف قلت للكيف فنجال
كيفٍ على هيلٍ وبنٍ وعودي

ههههه عز الله انه شاعر

 

 

 

 

[معلومات العضو فيصل ضيف الله الكبرا]

صح لسان قايلها وسلمت يد ناقلها
جعلها تحرم عن النار ولاهنت لاهنت لاهنت

 

 

 

 

[معلومات العضو راشد المسعري]

المشاركة الأصلية كتبت بواسطة حمد ابن فهد

صح لسان العتيبي وبيض الله وجهك يابومحسن

قلت السلام وقالوا الناس وش قال
قلت أتّبع سلمي ونرقى سنودي

قالوا تكيف قلت للكيف فنجال
كيفٍ على هيلٍ وبنٍ وعودي

ههههه عز الله انه شاعر

يستاهل ابو فيصل وفعلاً هو شاعر ومميز وإن كان بعيد عن الإعلام تقبل ودي وتقديري ،،،،

 

 

 

 

[معلومات العضو بطل]

صح السان الشاعر ومشكور يراشد علي النقل

 

 

 

 

[معلومات العضو ابن غزه]

صح لسان قايلها وسلمت يد ناقلها