ابن خشنان فخر الدواسر من قديمٍ وتالي

[معلومات العضو أبـ ريماس ـو]

قصيدة في منقية الشيخ عمر بن محمد بن خشنان المخاريم الدوسري

حان القصيد وزان بدع الطواريق=فاللّي رقى بالمجد في كل عالي
هذاك ابن خشنان منصى المطاليق=راع المجاهيم الزيّان الغوالي
منقيّةٍ لا شفتها تبعد الضيق=سودٍ عليها يتعبون الرجالي
الرّب فيها طبّق الزّين تطبيق=مازيّنت بالخيط والا الجلالي
في زينها تحتار روس المخاليق=كبار الجروم اللي سوات الجبالي
طوال الرقاب وجرد ماهيب تحليق=واللي يماريها من العقل خالي
جمهورها لاشافها قام تصفيق=يبرا لها لو كان ماله حلالي
يالجنة التحكيم جتكم طواريق=لاول لها من دون شك وجدالي
واللي قناها طوّق الطيب تطويق=شيخٍ لفعل الطيب والجود نالي
مواقفه تعرف ولاهيب تلفيق=فخر الدواسر من قديمٍ وتالي
ابو فهد منصىَ ليا نشّف الرّيق=هو ذخرنا لاصك جالٍ بجالي
عزٍ الرفيق وينفق المال تنفيق=يفدونه اللي يكنزون الريالي
من لابةٍ منزالها ف.الشّواهيق=اهل البكار محوّلات السبالي
تفرح بنا و نضد عنها اللّواحيق=ومن دونها نرخص لها كل غالي
دواسرٍ يزهى بها المدح ويليق=اهل المكارم ملحقين التوالي
والله يعز الحكم باهل المواثيق=ال السعود اللي رقوا بالمعالي
في ظلّهم عشنا ولا فيه تفريق=والصف واحد والتفرّق ظلالي

كلمات الشاعر/ناصر بن فلاح المخاريم الدوسري

 

 

 

 

[معلومات العضو الجراح]

دواسرٍ يزهى بها المدح ويليق=اهل المكارم ملحقين التوالي

الله الله صح لسان الشاعر الكبير ناصر بن فلاح المخاريم ويستاهل الشيخ عمر بن محمد المخاريم المدح ولاهنت يا أبـ ريماس ـو على النقل المميز

 

 

 

 

[معلومات العضو أبو ريم]

يستاهل ابو فهد لاهنت ابو ريماس

 

 

 

 

[معلومات العضو ابو زابن المسعري]

صح الله السان الشاعر وبيض الله وجهه على القصيده الكايفه


والشيخ عمر يستاهل كل خير

معروووف بالعلوم الطيبه

 

 

 

 

[معلومات العضو خالد المشاويه]

عز الله يستاهل الشيخ / عمر ابن خشنان المخاريم

شيخ بفعله وممثل ربعه في المحافل

وصح السان الشاعر ناصر بن فلاح المخاريم

ونتمنى لبوفهد التوفيق في المزاين وان شا الله فاله المراكز الاولى