۩ الــمــلــحــمــة ۩ للشاعر الكبير : مـرشـد الـبـذال 〗

[معلومات العضو ابن شمسان البدراني]

بسم الله الرحمن الرحيم

مساكم الله بالخير جميع

هذي ملحمة قالها الشاعر الكبير مرشد البذال - رحمه الله - .. وسببها :


أن الأمير : عبد الرحمن الأحمد السديري - رحمه الله - كان يريد دعوة ثلاثة من الشعراء في أحد الاحتفالات بأحد الأعياد وهم : مرشد البذال ، و عبد الرحمن العطاوي ، و عبد الله بن عون ..


فدعا الشاعر عبد الرحمن العطاوي وطلب منه أن يوصل الدعوة للبذال وابن عون .. فقام العطاوي وأرسل قصيدة لهم يدعوهم فيها إلى الحضور لذلك الاحتفال ..

فاعتذر ابن عون عن الحضور وأرسل البذال كذلك قصيدة يعتذر فيها عن الحضور لظروفهم الخاصة ..


فأرسل الشاعر عبد الرحمن العطاوي قصيدة أخرى للبذال يُلح عليه فيها بأن يحضر ..

فوافق البذال وأرسل لهم هذه ( الملحمة ) وطلب فيها من ابن عون أن يشاركهم بالحضور في ذلك الاحتفال ..



والحقيقة أن هذه القصيدة من أروع وأقوى القصائد حيث تحمل جميع معاني الحكمة والجزالة

يقول فيها ::

قل (لأبو نواف) كملنا العذار=وانتوينا (يالعطاوي) بالمسير
كان (أبو نايف) تحصل له مدار=دوره وإلا دفعنا له بشير
قل (لابن عون) الوعد تالي النهار=بالمثلث لا تسج ولا تحير
اعتجل يوم الهوى ذعذع ودار=اترك الراضه وعذر فيه مير
كان عندك بالبنا تالي جدار=افهقه والعيد ما فيه اتعمير
يم (أبو سلطان) عزم الفكر سار=يم غيره لا تقول ولا تشير
خلهن يمشن من ديره لدار=المواتر صافيه والدرب قير

مثل (أبو سلطان) له حقٍ يزار=جيته بالعيد مظهرها كبير
سجةٍ عنده تزود بالعمار=يدله الخاطر ويرتاح الضمير
في محلٍ قد جلسنا به مرار=صاحبٍ يا عز من هو له عشير
مجلسٍ يوخذ بعين الاعتبار=مدهل الشيخان والزاعل عثير
دلةٍ فيها من الحبشي بهار=ومنسفٍ يشبع ضيوفه والقصير
نادرٍ له نطحة الموجب شعار=فاهمٍ بالمرجله درسٍ غزير
ما لبس ثوب الشهامة مستعار=وارثٍ طيبه من الوجه السفير
( أحمد ) اللي له تواريخٍ قرار=بالكرم وبسلّة السيف الشطير (1)
اسأل التاريخ يعطيك اختيار=عن تواريخ (السديري) بتعَبير
اقر (ديوان الخليفة) كان دار=شف مقاله عنه بالثلث الأخير
شف مراكيضه على قب المهار=يوم سفك الدم غادي له هدير
كان (أبو سلطان) هوماته كبار=تابعٍ عودٍ على دربه يسير

والعلوم طوال وأحلاها القصار=زبدة الموضوع وأحلاه القصير
ما بنيت (الملحمة) بني الجدار=كود ناسبها على فعلٍ شهير

كان للمعروف هالوقت اشتهار=(السديري) مع هل الجودا خشير
ما بنى السمعه على ملس العذار=ما بناها إلا على فعلٍ ثمير
انشد اللي سمْع بأفعال الكبار=نور الأول يقتبس منه الأخير
يوم وقتي عقب ( أبو زيد ) استدار=اجتبرت بجابر العظم الكسير (2)
شمت للي فيه خصلاتٍ خيار=الذكاء والدين والعرض الستير
لي بربعتهم معزه وافتخار=ربعة الطيب تنسيك الحقير

أفهم لطيب الخنين من البهار=يوم فاح المسك شميت العبير
قالها اللي له بعرف الناس كار=أفهم الشبر الطويل من القصير
الرجال طيور توصف للحرار=وكل طيرٍ في جناحينه يطير
وين طيرٍ يحتري له كل جار=ووين طيرٍ يذعره صوت الصفير
وين طيرٍ لا نهض شق الستار=ووين طيرٍ ما يصيد إلا الشرير
لو تقول إن الشجاعة بالطيار=كان فضلنا القطا عن كل طير
النداوي له على الفعل اقتدار=والحمامه بالمحارم تستثير
وإن جهلت الزين والجنس الدمار=انشد اللي في معرفتهن خبير
افتهم مني كلامٍ باختصار=فرق بين الصوف من سلك الحرير
وفرق بين الحب ونخال الشوار=أصلهن واحد لا شك الذوق غير
ربعة الطيب تزيدك بانتصار=ترفعك رفع العمد بيتٍ نضير
والردي عرفه مثل بيرٍ هيار=تنقبر فيها ويدفنك الحفير
حقة الطيب تجيك من الفقار=والردي يعطيك كرسوع البعير
لا ترابع واحدٍ بالعهد بار=وإن وفا مره فهو خيرٍ كثير
التجارب خلها لك مستشار=لا تبي غير التجارب لك شوير
لا تجي مدخل يدينه بالخبار=ما لقى صيده لقى دابٍ ضرير

روس الرجال فهـود وأدناها حمـار=وأنت فكر بالفهود و بالحمير

وأنت في نفسك عليك الدور دار=لا تحسب إنك مخلا يالفقير
وقر العالم وتلقى لك وقار=وإن حقرت حقرت لو إنك أمير
والشرف لا يستوي فيه انهيار=الشرف هو مقضب السيف الشطير
والقناعة مرجلة والضعف عار=واطلب النجدة من الوالي القدير
لا تجي للناس طلباتك كثار=كل ديوانٍ تجي يمه مغير
ما خبرنا في هل الشحذه تجار=غير فقره كل نفس له تعير
خل عز النفس للعورة ستار=لو فراشك في طرف بيتك حصير
وأنت للعودة من الله بانتظار=واحدٍ ما له وكيل ولا مدير
مدّت الله تمتلي منها النقار=تجعل الغدران بالملزم تحير
تجعل الوادي مريفٍ بالخضار=عقب ما هو يابسٍ قشعت هشير
الكريم معان والفارس مجار=مدي الواجب ونطاح الذخير
والغنى بالذل ما فيه اشتهار=والفقر بالعز لأمجادك يثير
منزلك بالذل فوق أعلى منار=ينتفضل عنه مسكان الحجير
مرقدك بالعز في حزم القرار=ينتفضل بالمعزه عن سرير
الغنى بالنفس ما هو بالصرار=كم غنيٍ كن ما عنده ذخير
كم فقيرٍ في ثقيل الحمل ثار=وكم غنيٍ سمعته سمعة فقير
لا تقول فلان يملك له عقار=ليش أنا ما أدركت لي مثله وأصير
واحدٍ معطيه ما هو فيك غار=لا تجي لأحوال خلق الله نظير
عز نفسك لو تبيع من القشار=بيع غرضانك ولا طلبة وزير
ولا تقول الوقت لا يحني سطار=ضربةٍ خلت دماغي يستدير
غيرك الدنيا تلوحه بالحجار=لين صار الدم من خده خرير
ضامت الدنيا مدللت البكار=نازلين القفر لو جاهم نذير
وانكشف برقٍ مثل لون الشعار=يذكر الغزاي به عشب وغدير
جلعوا له ما لهم غيره مزار=في جهامٍ كنه الصيد المذير
وإن مشوا ركب السلف والنشر سار=زمة الحيران زاهيها النشير
حاسبينٍ للجهاد وللمغار=والبنادق ما تخبا بالجفير
كان شاط الهوش شيطات العشار=جتك أواليدٍ تعزوا بالفطير
موتةٍ عن قولة الخفرات نار=العذارى ما تعشق اللي ينير
وينهم هالحين ما منهم سمار=ما تشوف لهم ورود ولا صدير
مالت الدنيا عليهم بانكسار=عقب ما يضهد دبشهم كل بير
عقب شرب الدر من سور الحوار=هاجروا بالمدن يشرون العصير
والدبور ليا طبخ قدره وفار=ذوب اللي فيه من حامي السعير
لذة الدنيا مثل لعب القمار=لو جمعت المال شف تال المصير
لو جمعت من الذهب حمل القطار=عند نزع الروح منتب له دبير
صار بين الوارثين بلا مشار=وانعزل حق الكبير من الصغير
وأنت حقك خامةٍ عشرين وار=حقتك هذي ولا فيها خشير
فصلوا منها حزامك والوزار=وأقرشوا بك يم مثواك الأخير
وانسدحت من الفضا في وسط غار=يطردك منكر وقدامك نكير
وا هني اللي مشي طلق الشكار=سالمٍ من ظلم عمرو ومن عمير
لوه بالدنيا بحالاتٍ خطار=يرتجي بالآخره فرحة نظير
من رحمه الله وقلبنّ العذار=رحمة الله تغفر الذنب الخطير
والأثيم من الصراط أقرش وعار=إن سلم من ويل طاح بزمهرير
يا إلهي كان مالي اقتدار=ألتجي في رحمتك وأنت المجير
الشباب أقفى وأنا بآخر نهار=وأرتجي فزعتك يا نعم النصير

(1) المقصود الأمير أحمد السديري - رحمه الله - من أجداد الأمير عبد الرحمن .

(2) أبو زيد : المقصود الأمير محمد الأحمد السديري - رحمه الله - .

تـحـيـاتـي ،،،

 

 

 

 

[معلومات العضو المحيربي]

مشكور وما قصرت وبيض الله وجهك

وتقبل تحياتي

 

 

 

 

[معلومات العضو ابن شمسان البدراني]

المحيربي :


لا هنت وبيض الله وجهك على المرور الرااائع ..


تقبل تحياتي ،،،

 

 

 

 

[معلومات العضو ذيبان البدارين]

مشكور أخوي على القصيدة الغاية في الحكمة

وصح لسان الشاعر والله يرحمه

 

 

 

 

[معلومات العضو (*الدوسري*)]

صح لسان الشاعر الكبير مرشد البذال

ولاهنت على القصيده

 

 

 

 

[معلومات العضو ابن شمسان البدراني]

ذيبان البدارين :


لا هنت وبيض الله وجهك على المرور الرااائع ..


تقبل تحياتي ،،،

 

 

 

 

[معلومات العضو ابن شمسان البدراني]

الدوسري :


لا هنت وبيض الله وجهك على المرور الرااائع ..


تقبل تحياتي ،،،