بالقاف أسلي خاطري كل ماظاق= خواطر(ن) تنبع من اهجوس ضيقه
مثايل(ن) مع داجي الليل تنساق=أوله لها وله القلوب العشيقه
أسس قواعدها على بيض الأوراق= وابني عليها من البيوت الغميقه
من شأن من يطرح لها السمع يشتاق= ونقادها ما أبغا يجيله طريقه
ماكل من ينطق يقال إنه نطاق = يحكم عليه إيلا تكلم نطيقه
ولاكل رماي(ن) يقال انه تفاق=ولاكل صيد(ن) من قنص له يعيقه
وإن جيت بوصف من التواصيف مالاق= بحث(ن) عن إعجاب الوجيه الطليقه
أخترت مايطرب رفيعين الاذواق=ومن الزلل حصنتها بالحقيقه
حقايق(ن) ماهيب تحتاج ميثاق= تشهد لصحتها العقول الوثيقه
عن ما تشوف أعيوني من التفراق= في سيرة الدنيا وطبع الخليقه
وأبدى وأقول الطيب من فضل خلاق = ومن لاوهبه الله يظيع طريقه
والناس ترفعها المراجل والاخلاق= يوم الردي كسبه عداوة رفيقه
رجل(ن) يجي لقرابه اظلال ورواق=تجذبه للطيب الاصول العريقه
ورجل(ن) يلامن طاب طيبه تلصماق=مثل السراب يزول عجل بريقه
ورجل(ن) مجاله بالثنا يشرق إشراق=ورجل (ن)كما جمة قليب(ن) عميقه
ورجل(ن) نظر عينه رفيع للآفاق= ورجل(ن) عيونه في الأمور الدقيقه
ورجل(ن) براسه من الصواديف دناق= يروغ منها لو تجي في شقيقه
ورجل(ن) يلا نشفت من الحمل الارياق=يشيل حمل اللي عجز لا يطيقه
والبلشة اللي ما تلهمد بلزاق= اللي لخو مره رحول ووسيقه
اللي لربعه حرقة اكبود وإرهاق=خلقة وبا ماينعرف له طريقه
اللي على طرد المقفين شفاق=ومن كثر هرجه بالقفا نشف ريقه
وإذا درى ان الوضع قرب التوهاق=جوده ومجهوده يجي في طقيقه
مايدري إن له في المطاليق معلاق= يحشم جنابه لجل حشمة فريقه
حلو اللسان اللي مع الوقت بواق= ما أشبهه كون العباة الرقيقه
هذا لك أفضل بيع جمعاه بفراق=من قبل تصبح منه كبدك حريقه
الاخ العزيز والشاعر الكبير: عبدالله بن مرضي الجماعين
اررررررحب ترحيبةٍ تردف مليار ترحيبه في مقامك العالي
في البديه اهني نفسي واهني هذى المنتدى الكريم
بأن كسب شاعر متمكن مثلك جعل عمرك طويل على طاعته
وقصيده قويه قويه قويه قويه والى الامام عسى الله يبارك في احساسك وفكرك
وصح الله السانك وعتلا شانك وزادك الله من زوايد فضله التي لا تنقضي
قصيده جزله بما تعنيه الكلمه تقراها مرارٍ ولا تملها من سهولة معانيه
وعذب قوافيها فبارك الله فيك اخي العزيز والله يهنك في عمرك
وننتظر جديدك المميز
وتقبل تقديري واحترامي واعجابي في قوافيك الجزله
اخــــــــوك / فـــــهـــــد الــغـــريــــري,,,,,