الحزن مسدل في عيوني ذوايبه=واصلب معاليقي من الوجد ذايبه
راسي من نقوش الهواجيس معتصب=وراس القوافي شد فيني عصايبه
العين ساقت للحسايف ظعـونهـــا=تشبه غريبٍ راح ديــرة قـرايـبـــه
والا شجاعٍ ثـار عـمـّـه يـضـيّـقــــه=يوم احتزم شـد لـغـريـمــه ركـايبه
والا بدوي..طلّق على جهل حرمـتـه=وبعد النـدم وجـّـه ذلـول لـ نـسـايبه
غبني غبن شيخٍ على الطيب منهجه=مزبن دخـيـله قـبل يـعرف نشـايبه
وفي ليلةٍ قالوا : ترى ضيفك انغدر=عانه ورى بيتك..رفـعـنـا نـصـايـبه
حاول يشوف الغير..وش هي مصيبته=شاف الكثيـر.. ولاتـهــاون مـصـايبـه
قلبي على خـد الحـشـا هلّ دمـعـتـه=فـي عـز حـبه..يفقــد اغلـى حـبــايبه
يـاغـايبه ضيّعت عمري عـلى الـسهــر=وضاع السهر في قول كلمة : ياغايبه
ترى جذوع ضلوعي بذكرك ازهــرت=يهـزّها فـرقــاك بااعـذب هـبـايبـه
فـاحت بنار الشوق دلـّـة صـبـابتي=لـكـن فنـاجـيـل المـقـاديـر خـايبـه
أنـا أردّد : ياعـجايبْـك يـازمـــن=واثـره يردّد : إن انــــا من عـجـايبه
لايـازمن ويـنك مـودّي وصـالـها !=تراك جـايـب وصلها غصب جايبـه
الروح مـاهي مذنبه في غرامـهـا=وان كان هو ذنبٍ...فلاهي بـ تايبه
ماني بـ قايـل طابـت النفس واكتفي=لا والله ان النـفـس ماهي بـ طايبه