قالوا (هوى ) قلت: الهوى وش هو؟؟ وابي علمٍ ثبات=قالوا( محبة)قلتنا: والحبّ مرساه القلوب؟!
قالوا : نعم حب النّقا يبقى ولو راعيه مات = صمّ الصّفا وهو الصّفا لو ذاق لذّاته يذوب
عنتر وهو عنتر تعّلق بالبنيّ المترفات = من شانهنْ لبْس الدّروع وخاض غبّات الحروب
ليلى وقيس بن الملوّح في عصورٍ ماضيات = قيس انهبل في حبّها يومنّها بنت لعوب
بالله ما تقرا دواوين الغزل في المكتبات= مثلك يبو راجس مثقّف وانت شاعر وامحسوب
قلت المحبة الاوّله ولّت وعصر الحبّ فات = حبّ النّقا ولّى ولم يبقى سوى الحبّ الكذوب
أيّة محبّه يابطاقات ( السّوا ) ؟؟ والترّهات = حبٍّ بهيميّ المقاصد لا محبّ ولا امحبوب
حبٍّ بداياته ( مسينجر) او تولّد عبر ( شات) = حتما(ن) بداياته نهاية واسألوا راعي ( القروب )
بالله قلّ لي لو سألتك وش يشدّك في الفتاة= لا صرت ساعي في زواج وقيل خاطب وامخطوب؟؟
شفّك طويلات الغِطا واهل العبايا الضّافيات= شفّك قصيرات الخِطا والسّالمات من العيوب
جواهرٍ في بيوتهنْ ما دوّجنْ في النّاطحات = ما عرّضنْ بالبنطلون وخالفنْ صلْف الهبوب
ما كحّلنّ عيونهنْ لاهل العيون الجايعات= ولا حزّمنّ خصورهنْ والكفّ بالنّقش امخضوب
الحبّ تالي الوقت ما ظنّي على ذكره طراة = شمسٍ بدت في الاوّلين وهايفت يمّ الغروب
ثوبٍ لبسه اهل الرّدى واهل النّفوس الخاملات= احسن لنا نغسل يدينا من تعاطيه ونتوب!!
الشاعر الكبير تأبط خيراً
الحقيقه القصيدة أكبر من التعليق لاعدمتك
أكتفي بالنظر والمتابعه والتمعن فيما كتبت لنا من محاضرة لايجيدها إلأ الكبار شرواك
وأقول جعل والدينك في وجميع المسلمين في جنات النعيم
وصح الله لسانك وإعتلا شآنك دنياً وآخره
تقبل ودي وتقديري وأكد متابعتي لما تكتب
محبك في الله : دغش البطي