الليالي تودع العاقل هبيل
والأمور اليوم سلم يا سلام
راح جيل ومقبل ياخوك جيل
يالله اني طالبك حسن الختام
العـزيـــز يـــــذل ويعز الذليل
والسباع تباع في سوق النعام
ودفتر الشيكات في مخبا البخيل
ماظهر في حرب والا في سلام
واللبن والزبد في بطن الصميل
ما اطعم الجايع ولا فطر صيام
وش يجيب الدوم لغروس النخيل
فرقهن فرق الكرام من اللئام
ومن جلب لأهل الحسا تمرٍ حويل
علموه إن الهــــــزيله ما تسام
حسبنا المولى وهو نعم الوكيل
عالم النيـــــــــات خلاق الأنام
مانبي منهم كثير ولا قليل
ولا لنا مقصد ولا غاية مرام
والحظيظ اللي يحسب للرحيل
بارك ليا لف في مترين خام
مايفيده لاخوي ولا زميل
ولا يفيده لا خوال ولا عمام
فانيه والآدمي عابر سبيل
اترك اللي فات وانظر للأمام
والمهايط والحكي ماله ذبيل
مارفع طامن ولا طمن سنام
والشعير يكال بشوال وزبيل
والذهب محسوب بالملي جرام
والكلام أحيان أحد من الصقيل
يتلف الأرواح ويقص العظام
والصبر طيب لو أنه حنظليل
والعفو والصفح من طبع الكرام
استغلوا فرصة الشهر الفضيل
افتحوا صفحة محبه وانسجام
الشاعر : خليل الشبرمي