السلام عليكم ورحمة الله وبركاته:
أبيات قلتها في زواج اخوي مراقب عام الموقع/ عبدالرحمن بن فلاح آل بريك
أسأل الله أن يجعله زواجاً مباركاً ويرزقه الذرية الصالحة
والسموحة على القصور لأني وقتها مسافر وقلتها وانا في الطريق للزواج:
يافكر قنّد دلتي ما تقهويت = جزل المعاني بن واحكم بهارك
دام القريحة حضرت واستعديت= خل الجزالة دايماً هي شعارك
لامن دعاني طيّب الجد لبيّت = وجيته ومن باب المحبة مشارك
مبروك ياقرم على الطيب ربيت = ومبروك ياعلّه زواج ٍ مبارك
الله يحقق يابطل ما تمنيت = آمين يامنزل بقولك تبارك
بعض القصايد لو توّصل مية بيت=ما ظنها تجزي وتاصل مسارك
لأنك صبي الجود ياكاسب الصيت= ودايم معسّف للمكارم إمهارك
ولأنك من آل بريك وش عاد خليت= في السلم سلم وهم شبوب المعارك
ولأنك من آل بريك والعلم تثبيت= برك(ن) توسّع وأصبح اليوم دارك
ولأنك من آل بريك قوم(ن) عناتيت = عدوهم دايم كفوفه تفارك
وختامها ياصاحبي كاسب الصيت= عسى زواجك يالسنافي مبارك