( أخشــــــــــى النـدامـــــــــــــه )
قالولي اقـصد وانـت بالشــعر معــروف ### ودايـــم قصيــدك ناجــــده بالصــحافــه
عبر عــن اللــي يشــغل القلب بحـروف ### خــل المعــاني تنتشــي فــي اوصـــافه
قـلت الشـــعر باقصــى خــفاياي موقوف ### قفـلـت انـا بيـبـــان طـــرقــه وقــافــه
اخـاف انا وان قلـت يحذف على الروف ### واخشـــى الندامــه في نهـايه مطــافه
ليا صـار مــاله ناس تــوحيــه واتشوف ### وتقـــدره قبــل ان يكــشــف اغــلافــه
حشــــمة معــازيبً اليا جــوهــم اظيوف ### مثــل الصخــي للضيـف يفني اخرافـه
مــا شــوف لــه داعـي ولانـي ابمـكلوف ### أقــول قــولً مــايـحقـــــق اهــــدافــه
واليـوم لو شــكلت من شــعري اصفوف ### يبقــى خســـاره دون فــــــودً وآفـــــه
لاشــــك انا شــاعـر ومعنــاي به نــوف ### على شـعر شـــعار شــعر الســخافــه
اختـار انــا القيفــان واحـوفـــها حــوف ### ليـنـه يـجـي للنـاس مثـــل الطــرافــــه
اتـعــب على الجزلات والهـزل محذوف ### عــن لايصيــبني اســــهوم الحســـافه
وشــلون اخاطبـلي مـن النـاس ملقـوف ### معمـيـــه طيشــه والكبـــر والصـلافه
ابـرك لي اكتــم ماحصـل داخــل الجوف ### ولا ايقــــال فـــلان صــــابه لقـــــــافه
واللــي حصــل كابـوس لابـــده ايطـوف ### حـــلمً مــع الايــام تقفــــي اطيـــافــــه
وعمـر البــنادم بيـن الامــان والخـوف ### هـــذي حيــاةً عـاشــــــــــها باختـلافه
بيـن الســـعاده والتعـاســه وصــادوف ### ومنهــا يشـوف المـرء غبـن ولــطافه
والصبـــر طيــب للمسلمين موصـوف ### واليــوم انـا راعيــــه لـو بـــه كـــلافه
محمـد بن ســوعان الربيــع