لاتخبي غلاي إن كنـت تغلينـي = منك حبس المشاعر ظلم بالغالـي
كلما شفت عينك يانظـر عينـي = قلت ياذا العذاب اللـي تهيّالـي
شفت فيها شقاي وجددت فينـي = حيرتي والسؤال اللي علـى بالـي
لامتى وانـت تبعدنـي وتدنينـي = ليه اشوفك بعيد وزولـك قبالـي
لامتى الحاجز اللي بينـك وبينـي = كلما مر يوم يزيـد فـي العالـي
شايف الشوق في عينـك ينادينـي = كل نظره تقول إن السعـد فالـي
وانت دونك جدار الصمت حاديني = صمتك اللي سبب همي وغربالـي
كم تمنيت يـوم إنـك تلاقينـي = تشتكي لي وتسألني عن احوالـي
إنتظرتك تطيع الشـوق وتجينـي =إنتظرت, إنتظرت أيـام وليالـي
عمري اللي تعدى واجمل سنينـي = فات والعالـم الله ويـش يبقالـي
خايف إنك تجي في يوم ناصينـي = ماتجد شي منـي يرسـم ظلالـي
لاإنمحت من على الدنيا عناوينـي = ولابقالـي مـع الحييـن منزالـي
وقتها غصب من دنيـاك تلغينـي = تحذف إسمي وتحذف رقم جوالـي
كان قصدك بعد مااموت تبكينـي = ليش تنثر دموعك في الخلا الخالـي
دمعـةٍ فـي غيابـي ماتواسينـي = ولاتبـدل هـذاك المـر بالحالـي
لو تخلي بيـوت الشعـر ترثينـي = لين تصنع مـن الأشعـار تمثالـي
ماسكبت السعاده فـي شرايينـي = ولاانت واصل لروحي والجسد بالي
طيع شوري وحط يديك بيدينـي = ليش تاقف لحالك وآقـف لحالـي
دام يمديـك يالغالـي ويمديـنـي = حطم الحاجز اللي حطـم آمالـي