قصيدة بمناسبة عودة الملك المفدى للوطن بعد رحلته العلاجية خارج ارض الوطن للأستاذ الشاعر /فراج بن فهد بن جديع آل بريك الدوسري
يـاخـادم الـبـيـتين لاباس تطهير = يـشـفـيـك رب لـلـبـرايا يشافي
عـود حـمـيـد ودايم الدوم في خير = يـابـو الـمـكـارم واليدين النظافي
شـعـبك على شوفك يسوق التباشير = وبـلادكـم لـبـسـت ثياب الزفافي
قـلـوب شـعـبك كنها خافق الطير = تـكـفخ تحت حدب الضلوع النحافي
ان غـبـت عـنهم صار بالجو تعكير = وان جـيـت جو المملكة صار صافي
مـبـداك مـثـل المرزمات المزابير = غـيـث عـمـيـم لـلقرى والفيافي
شـعـبـك يـابو متعب يقدرك تقدير = ويـبـدي لـكم ما كان بالقلب خافي
احـد يـعـبـر بـالـلـسان التعابير = واحـد يـعـبـر بـالـدموع الذرافي
وتـحـت الـخـدور يرحبن الغنادير = بـالـقـايـد وسـتـر البني العفافي
وفـوق الشجر تسمع لحون العصافير = تـسـجع طرب رغم السنين العجافي
شـعـبك يعبر لك عن الشوق يا امير= ويـهـتـف عساها يابو متعب عوافي
اسـكـنت شعبك في رياض مخاضير = نـوارهـا مـن كـل الانـواع زافي
حـطـيـتـهم وسط العيون المساهير = عـيـن لـهـم فـرش وعين لحافي
وحـطوك في وسط القلوب المحاجير = عـرفـان بـالمعروف لك واعترافي
اتأسس الـبـنـيه وتسـعى لتطوير = ومـع حمل شعبك شلت حمل مضافي
تـبـعـث رفـات وتبني امجاد وتنير = درب مـن الـمـاضي محته السوافي
تـبـنـي بيوت الله وتدعم هل الخير = وتـوسـع اروقـة الـحـرم للطوافي
وتـنـشـي مـدن وتعبد السبل للسير = وتـفتح من اجل الشعب دور ومشافي
تـكـرم كـريـمـين وتغني مفاقير = نـاس مـن الـعـازة شـفاهم نشافي
وتـمـسـح دموع اللي دهته المقادير = وجـدران قـلـبـك للرعايا صخافي
صـالـح ومصلح فيك حكمه وتدبير = ومـيـزان عـدلك ينتصف للضعافي
لـلصاحب احلى من حليب المصاغير = وشـر عـلـى الـعدوان سم زعافي
لـسـطـوتـك ذلـت قلوب الجبابير = وقـويـت بك قلوب الرجال الخفافي
يـابـن الـمـلوك اللي تدك الطوابير = لا حـل فـي حشود الحريب اختلافي
لاجـــــــا نـهـار فـيـه ربح ومخاسير = ربـح الـسـلامـة والخساير هيافي
تضرب على الهامات ضرب المساطير = بـمـهـنـد تـرعـف شباته رعافي
تـضـرب بـحــــد المرهفات البواتيـــر = لاحـذفـن بـيـض الـبـني الغدافي
مـنـا الولاء لك والوفاء دون تقصير = والـعـهـد ديـن وعـادة الحر يافي
حـنا عضودك صار ما صار ويصير = حـنـا الـى جـات المواقف نشافي
يـا امـيـر حـنا اللي نفك المسامير = لا وثـقـت حـنـا الـشداد الصلافي
قـدنـا يـابو متعب على اليم ونسير = قـدام نـمـشـي مـا نـعود خلافي
يـابـن الامـام مسطر المجد تسطير = عـبـدالـعـزيز اللي يروي الرهافي
مـن دار اخو مريم سرى جيشه مغير = واشـبـع من خصومه سلال الشلافي
ونـادى الـمـنادي في المنابر بتكبير = الـحـكـم لـلـي بـالقدم سار حافي
وصـاح الـبشير وسمر الحكم تسمير = نـجـد لـبـو تـركي وزال الخلافي
قـال الـشـريعة منهجي دون تغيير = ومـن عـز ديـن الله يـذب الشعافي
حـكـمـه سماوي ما حكم بالدساتير = مـا فـيـه بـند ملحق وبندً اضافي
وحـد شـتـات صفوف قوم مناحير = وعـم الـرخاء والامن عقب التجافي
وقـطـع رمـوس مـدبرين التدابير = مـن عـقب ما شاشت وحان القطافي
قـوم تـفـرق وحـدة الصف وتثير = نـعـرات لـديـن الـشـريعة تنافي
يـاالله يـالـلـي رد مـن جمة البير = يـوسف على يعقوب وابصر وشافي
تـحـفـظ بـلاد الدين من كل تدمير = فـي حـمـاك تبقى ما عليها خلافي
وتـحـفـظ ملوك تكرم الجار وتجير = ومـن جـار يجبر بالحراب السهافي
ومـسـك الـختام اختم كلامي بتذكير = بـازكـى الـسلام لمن دعاء بالكفافي
وسلمتكم