السلام عليكم
قصيده بمناسبة مشاركة الشيخ شعيّب بن فارس الدبالين في مزاين الكويت لهذا العام اتمنى تعجبكم
القصيده بصوت المنشد المبدع حسين آل لبيد اليامي
ياهل المجاهيم جاكم ذود دبلاني=ذودن يدك المزاين دق وجلالي
ذود أصوك الراس والمطنوخ زوماني=شعيّب اللي له العادات مدهالي
شعيب اللي نهار الغزو قد باني=له موقفن لو يزول طويق مازالي
له محزمن فالقسا والضيق مالاني=عياله اللي قروم وصيتهم عالي
اللي لهم كسبة النوماس نيشاني=كنهم حرارن تعلت روس الاقذالي
ياهل المواقيف والميقاف قد حاني=دكو بذودن يشوّش يوم الاهوالي
سودن زيانن لابن فارس كحيلاني=اللي عن شفوفها ماهوب ميالي
جرد الرقاب الطويله حدب الآذاني=فنس الخشوم وزهاها طول الاسبالي
سنامها منفهق يشبه لصيواني=تقبل وكنْها تسبح ربها الوالي
سند الغوارب طويلة جنب ومتاني=تزها الجنايب جليلة عظم وطوالي
اليا مشت كنّها تلطم بالايماني=وان درهمت مثل جولن صابه جفالي
ذودن تجيب الفخر والزين ربّاني=كنها تقول الغنايم والسعد فالي
ورثن لنا من شيوخن تمّن الجاني=ورث من جدودنا تفخر به اجيالي
وقت مضى والقبايل جوع واكواني=يوم السطر والحرايب واشهب اللآلي
عند المضاهير نكسر كل قوماني=كم شيخ قومن فنا من عقب ماعالي
حنا هل الابل على مرّات الازماني=في شفّها نحتزم لدروبن طوالي
ترعا الخطر في جنبنا والعمر فاني=جنبن متينن يرجح كل مكيالي
دواسرن ساسنا والجد خضراني=اهل الفخر والكرم شيبان وعيالي
دواسرن نكرم الضيفان والعاني=عاداتنا مانحسّب كثر الاموالي
خطلان الايدي سواة السيف شاماني=ناسم عصا الجار ونعدّيه لميالي
وفي جايزة من على الطالات عجلاني=صباح الاحمد امير كويتنا الغالي
ياهل المواقيف والميقاف قد حاني=دكو بذودن يروم المركز العالي