قصيده قيلت في حفل ال ابو سباع
يالله يارب الملا خير معبود=يارافعٍ سقف السما دون عمدان
نرجيك عفوك يا اله راع الجود=وفوزك ليا حط العمل وسط ميزان
من بعد ذكر الهنا مصرف النود=زان القصيد وخاطري للغنا زان
وهاجوس جزل الشعر في الصدر ماجود=ماياخذ الا كل جزلٍ ومليان
وزين القوافي اصخره مايجي كود=اقودها قود الاصايل بالارسان
واخاف من قولٍ يجي منه منقود=واخاف يقفاني فلان مع فلان
ماكل منهو قال قول بماكود=وما كل رجلٍ في المواقيف فهمان
وانا كتبت القاف وابذلت مجهود=بذلت مجهودي ولانيب خسران
سلام تسليمٍ بلا عد وحدود=يادار ربعٍ ف المواقف لهم شان
ومخالطه مسك مع عنبر وعود=مع ورد مع يشموم مع ريح ريحان
وانّا ملبين لدعوة راع الجود=هو دعوته عز وفخر بتيجان
بندر حليف الجود ومحالف الجود=راع الوفا زين النبا طير حوران
عوايد له يكسب المدح ويزود=لانه ولد تركي وجده عويجان
ومن لابة يوم اللقا تروي العود=خوران لامنه ارتكز كل شيطان
اللي مواقفهم على غيرهم كود=واهل السيوف مطوعة كل فسقان
ربع ليا منه غشا الجو بارود=فعولهم تطلق نظر كل عمسان
لهم على الماضي تواريخ وشهود=يشهد لهم في ماضي الوقت مروان
واهل الكرم لا ركب الوقت بشدود=وانا اشهد وبالعون الاجواد كرمان
من لاد ابن سباع كسابة الجود=اللي لهم في قمة المجد ميدان
قلته وانا ربعي هل المدح والزود=لاد المنيعي لاحتما كل ميدان
كم واحد من ضربهم يسكن لحود=واليا اعتلو عجلات الازوال فرسان
كم واحد من فعلنا مات ملهود=ولا خير في قول على غير برهان
ولي الدواسر عزوة العز وجنود=وكل القبايل حقها دون نقصان
وختامها صلو عدد ذاري النود=على النبي الهاشمي نسل عدنان
الشاعر
محماس بن سعد بن موفي المخاريم