السلام عليكم ورحمة الله وبركاته
اهديكم اخر ماكتبت اسال الله ان ينفع بها
قال الجويزي في بداية مثايله=مثل المطر اليا هطل من مخايله
مثايلٍ من بدع فكري اجيبها =وعقّب صبيٍ مايقدّم جزايله
نصيحةٍ مهداه من قلب ناصحك=يبغي لك الخيره في موجب رسايله
افهم يابن آدم عسى الله يصلحك=كلامٍ امسند وردّه لقايله
دنياك بنتٍ تزدهر لك بزينها=كم مؤمنٍ غرته واقفت رحايله
لكن تفطّن لاكشرت لك بنابها=والرجل لابده يحصل عمايله
ياما خذت بانسان في حين غفلته=روّح بوسط النار يشكي علايله
تطعمك سكر لارضت بك وغردت=وتسقيك من ماها قراحٍ زلايله
وليازعلت قامت تذوّقك ضيمها=وابليس ملعونٍ بشتى وسايله
وانشد عن الماضين وياتيك علمهم=عبره لرجلٍ يعتبر في فعايله
واقرا بوسط اللي منزله ربنا=كتابه المنزل وهو اللي قايله
وشواهد التاريخ تثبت نصايحي=فرعون في تاليه عين حصايله
ترا التغطرس و الكبر دوم ينزلك=لا تحسبٍ الكبر عزٍ وطايله
وقارون في سيرته ناخذ من العبر=مايدري ان بقعا كما البحر هايله
واقرب شواهد تالي الوقت عانها=صدام وينه يوم لاقت بدايله
يبطش ويظلم يوم جاته بغيّها=وصارت بوجهه نقمةٍ جات مايله
والناس فالدنيا عبورٍ وفانيه=هاذي هي الدنيا ولابد زايله
وترا البخيت اللي كسب طيّب الذكر=مع البشر يمشي وتذكر فضايله