اخواني واخواتي
ابيات متواضعه
تنتظر رأيكم ومداخلاتكم
ليا من صدري كتم في داخله ونه = قربت سود اليراع وصغت قيفاني
ترجمت هجسي بنظمٍ عارف فنه = لعلي القى مع الطاروق سلواني
اناجي الهم وافكاري يصوغنه = ابيات شعرٍ تشوق كل طرباني
اشكي واعبر عن الهاجس وما ضنه = من جوف قلب شكا الهجران واضناني
قلبٍ بساعه هموم الكون زارنه = ومادق في داخله يفصح به لساني
انخى هل العرف واهل الطيب والعنه = ربع على الجود ترجح كل ميزاني
نخوة صويب سهوم الوقت صابنه = تكفون يا اهل المعاني جيتكم عاني
ابي نصيحه لقلبٍ داخله حنه = والا مواساه تشفي بعض وجداني
لي صاحب عاشقه ما اجوز انا عنه = ولا سلا بدونه ولا ارضى واحد ثاني
كل العذارى بعيني مايساونه = ومن طب بحر الهوا يدري بما جاني
اعطيته القلب والهاجس بلا منه = واعطيته اللي بغاه ودم شرياني
ولاني من اللي دموعه يستبيحنه = الا فراق الحبيب غصب بكاني
واستغفر الله صلاة الفرض والسنه = جاني لطيف الحشا فيها وسهاني
الليل عندي هموم القلب مدنه = حاربت فيه المنام وزادت احزاني
لوكان جفني غفا ما ارتحت انا منه = جاني مع الحلم هاجوسه وصحاني
من بعد هذا جفاني ما عرف ظنه = مدري ظروفه قست والا تناساني
وامسيت اجاذب وانا في داخلي ونه = واصبحت داين وسيد البيض دياني
وللجميع تحيتي وتقديري
اخوكم عبدالله العصيمي