.
.
.
.
من طاع نفسه ساقتة للضلالي=واللي خطمها ساقتة للمسرات
لا عانها الله في صعود الجبالي = ما هابت من طويق ولا السراوات
ترقى الرجوم النايفات العوالي = لو ماقوت رجلك على سير خطوات
ترويضها ماهوب صعب المنالي =بلجامها تعسف وبسروج صهوات
ولا تطرد الدنيا تراها زوالي =ما دام ربي قاسم الرزق واقوات
من هان نفسه لاجل منصب ومالي =بشرة بالخسران لو نال حضوات
واختر لنفسك من قروم الرجالي = صفوت مطاليقن من الناس نقوات
وقت العطاء تعطي ولاهي تبالي =وعند الشدايد محزمن لك وعزوات
اهل النفوس الطامحة للمعالي =واهل الشجاعة والكرم والمروات
وكب الردي لو كان عمن وخالي =اللي يدور من ورى الناس هفوات
واسمع نصيحة شايبن قالها لي = ما تنشرى بفلوس واكنوز ثروات
ازهد ما عند الناس واتصير غالي =واطلب مجيباً ما يبي غير دعوات
واياك لامن صرت بالنفس خالي = عصيان من لا يجهله سر خلوات
في طاعتة منجاك يوم السؤالي =في يوم ما تنفعك حسرة ومنوات
ولا تقول ان الزمن ما صفالي=احذر ترى للنفس عثرة وكبوات
ولا يغرك طول وقت الليالي =حيين معنا اليوم في حسبت اموات
اختر يمين الدرب ولا الشمالي=حفت مكارة جنه او نار شهوات
خذني مثل لو كنت ماني مثالي =راحت حياتي بين نومن وغفوات
يا كبر ذنبي لا حسبت وطرالي =وياكبر حلم الله على النفس بالذات
ادعوا معي للي عليه اتكالي = يغفر لنا ويبدل الذنب حسنات
يارب ترحمنا قبل لا تهالي = اقبورنا ونذوق بالموت حسرات