طيب الله اوقاتكم بالرضا والسعاده
رائعه بثتها قناة الصحراء بصوت الشاعر العذب
حسين آل لبيد للشاعر عبدالله بن عماره
اتمنى ان تنال استحسانكم ورضاكم
دمتم في حفظ اللي ما تنام عينه
ارجعي..تكرم مدينه لجل عينك
لجل ما اكسر خاطرك بين الحنايا
جيت لك و أمشي على رمضا سنينك
جيت لك لاجي ونظراتي لجايا
اخذني قلب عسى الله لا يهينك
اخذني من غير عقل ولا مزايا
هاك قلبي من يميني لي يمينك
عالجه من سم طعنات الوشايا
يوم قفيتي وما فيني سجينك
للسهر والهم عقلت المطايا
ما غفيت الا على ترديد وينك؟
نمت في غدراك وعيوني عرايا
كيف تسرق خافقي؟ ما اقوى كمينك
صار عندك خافقين اكبر بلايا
كيف انا عودت صيدة خافقينك
كيف وآنا لجلك آضد السرايا
كيف بعد الود ما بيني وبينك
صرت انا في دنيتك باقي بقايا
ليه ما راجعت نفسك مع قرينك!؟
يمكن انك كنت مخطي فالنوايا
لو حنيني صار في ليلة حنينك
كان قدمت المحاجر لي هدايا
لو تبي تعرف غلاك الله يعينك
من مكانك عد لي ما لا نهايا
عندي اغلا من غلاك لوالدينك
والغلا ما قلله كود الخطايا
آه ..ليتك طير وانتف ريشتينك
واثني سْبوقك واسوّي بك سوايا
لو حسبناهم ضحايا معجبينك
ما اكبر ذنوبك ويا كثر الضحايا
يوم شفت رموشك تخاطب جبينك
قمت اهذري والمس كفوف المنايا
لا تسلهم خلني مع جمرتينك
ودي اطفيها واولعها سنايا
دام قلبي والمشاعر مشترينك
جعلهم لعيونك السودا فدايا
من يلوم العاشق اللي لجل عينك
ما كسر خاطرك ما بين الحنايا