[معلومات العضو محمد الغريري]

المشاركة الأصلية كتبت بواسطة ابو عبدالمحسن المسعري

اخواني أعضاء وزوار منتدانا الشامخ يسرني أن أنقل لكم هذه القصيدة للشاعر: نايف بن مسرع والتي قالها قبل فترة قصيرة في حفلة زواج أخيه راشد وإليكم القصيدة:-

يامسندي هات القلم طرّف الليل = والعين جافيها من النوم جافي
يحرم علي النوم مادام بي حيل = لين الصبح ينباج مانيب غافي
ماهيضني لابسات الخلاخيل = نجل العيون موردات الأشافي
ياما خذن بين المناعير حلحيل = وباسبابهن تسفي عليه السوافي
هيضني اللي جاب بيض المراسيل = من كف عودٍ في المواجيب ضافي
أبوي تشهد له قروم الرجاجيل = وكلٍ يقول أنا اشهد إنه سنافي
كريم سبلا في الليالي المماحيل = وغيثٍ لضيفه في السنين العجافي
ماشيف زوله مع هل القال والقيل = وله مجلسٍ مايدخله كل هافي
والعاني اللي ذاق مر وغرابيل = لامن نصاه يروح همه عوافي
يشيل حمله لاعجز عنه ماشيل = ويورده حوضٍ قراحٍ وصافي
يقول (ابو مسرع): هلا عدة السيل = وعداد من صلى بمكة وطافي
وعداد من كبر وزوّد بتهليل = في عشر ذي الحجة ولاهوب كافي
وعداد مادارت صوان الفناجيل = بين النشاما أهل الصدور النظافي
باللي لحفلة ( راشدٍ )جو مقابيل = في ليلةٍ لاغلى الليالي تضافي
فيها يساق الطيب والبن والهيل = للي إلى جاه النبيبة يشافي
حفلة صبي منشهر كنه سهيل = ومن عاشره يعرف كثير الخوافي
سمي شيخ في اللقا يتعب الخيل = لا صاح ( أخو صهدة ) يجيهن خفافي
زيزوم ربعٍ في الحرايب مشاكيل = ياطا بهم درب الخطر ما يخافي
واختامها وعداد وبل المخاييل = يامرحبا باللي على الحفل لافي

ابو عبدالمحسن المسعري


يعطيك العافيه على ايراد هذه القصيدة الجزلة هنا في المنتدى وابو مسرع شاعر فحل

ولا يأتي بمثل هذه الابيات الا من هم على شاكلة الشاعر نايف بن مسرع ..


وصح الله لسانه ويسلم بنانه ..

على ما سطر من قصيدة قرأتها اكثر من مره لإعجابي بها وبكلماتها الجزلة ..


بيض الله وجهك ووجه ابو مسرع ..



تقبلوا تحياتي وتقديري ,,


اخوك في الله

محمد الغريري