الشاعر ناصر بن حماد المبزر النتيفات المعروف بفجيح يقول في ابيات له
اشوف دنياً علينا اليوم مفتره = اقفا طربها وقفا عصرها الزيني
من اولاً من الركا للعمق للسره = مقاطن كلها من الربع الادنيني
وابل مجاهيم سود كنها حره = والصيد باطرافها ميفخت العيني
واليوم معاد به زول ولا جره = يا والله اللي تفرقوا المحبيني
شيبانا موتوا وحنا على الجره = وعيالنا حولوا صوب البلاديني
وجاراها الشاعر سعود ال بريك حيث قال
يالله يامحصي بحره مع بره = ياللي خلقت ادم منشاه من طيني
بامره اذا راد شفت القاع مخضره = جعله على طاعته ورضاه يهديني
اشوف دنيا العنا ما فوقها قره = خذت الملوك وخذت مشايخ الديني
خوانة مامنها والجاهل تغره = كم غالي شلته من بين غاليني
والموت حق ولا احد مكفي شره = واللي خذا الربع بد يجيه ويجيني
وفجيح يشكي من اللي ذقتنا مره = فقدت ربع مجالسهم تسليني
وقد جاريتهم انا شافي النتيفات بهذه الابيات
يافجيح وسعود لا احد يبيح بسره = ياقل منهو تجاوز سن سبعيني
اشوف كل على الايام يتشره = تبون عمراً مديدٍ مير بعديني
قولوا لناس ورا الايام منغره = تطرد ورا حلوها وتخلي الديني
ما احداً صفتله ولا احداً قمت ببره = من اول الخلق حتى الناس ذا الحيني
كم واحد من غثاها جيبه يطره = عزيل منهو تجرع مرها سنيني
ورا الهوا يلحق الكره ورا الكره = يضحك وهو مادرا بالغيب مسكيني
من مات مثل الشهيد محمد الدره = قال العنا بالهناء والموت قافيني
وانتم رجال مواقفهم لها سره = ياما على الطيب حثيتو البعاريني
الذيب ما يلتفت في جرة الهره = والبوم ما عمره يرافق شياهيني
وحنا على دربكم بنسير في الجره = منا بمن غيره جو البلاديني