السلام عليكم ورحمه الله وبركاته
يا اخوان هذي مشاركه لي وانتمنى انها تحوز على رضاكم هالقصيدة مدح في رجال عزيزاً علي ومطلق شرواكم والتهنئه بمناسبه عيد الفطر كانت ويستاهل كل خير و هو اخوي عبدالله بن مبارك المسعري الدوسري والقصيده تقول:
بو مبارك
بو مبارك من خبرنا خوتك راعي جمايل=تكسب النوماس دايم من فعايلك العظيمه
دوسري والحمد لله نفتخر بك في القبايل=من نسل زايد كسبت الطايله جد وعزيمه
مسعري (ن) جعل ربي يسقي ديارك همايل=يعلها وبل المزون اللي عطايها كريمه
تعدلون الميل لامن انه غدى فيها موايل=تلجمون اللاش ما ترضون بفعول ذميمه
يا هل العليا هل الصملات لا حلت صمايل=تنصرون اللي نخاكم زابن يشكي الظليمه
من عصور الزير واللي يعتدي شاف الهوايل=ينتكس مغبون ذاق الجمر من شر الهزيمه
من ولد جيعان خذها جاتكم والشك زايل=جيتكم عاني ومافي القلب ربي هو عليمه
جيت اهنيك بحلول العيد يا نسل الأصايل=وجيت ارجع ذكريات في الحشا عز وقيمه
تهنيه من قلب صادق ساقها فعل وفعايل=ساقها فعل الجمايل دوم يا مال الغنيمه
وتم قولي وانتهاء في عده ابيات عدايل=صغتها من دم قلبي لأجل اقدمها سليمه