ياشعر دام اني مضريـك بالخيـر=رد الكرامه مـن سلـوم الشهامـه
ماعاد فيه اليـوم ياشعـر تاخيـر=اقـدم علـى عـدٍ وقابـل مقامـه
صوت الموده مع ضريس النواعير=والشول جايٍ له على الما ابترامـه
اتزيـن الحيـه رقـاب الاباكيـر=ويقـول عبـدالله ويجـزل كلامـه
اجذب منه مايجذبـون الشواعيـر=جزل البيوت اللي تجمـل مقامـه
سـلام حـق للرجـال المناعيـر=من هاجس صادق صدق في سلامه
سلامٍ احلى من حليب المصاغيـر=تاطا السهل ما عرضـت للعدامـه
في ضفكم ترتع سهاف المعاشيـر=ترعى الخطر وانتم حماة الجهامـه
من دونها صوت العزاوي محاذيـر=مثل الرعود اللي تزيـح الظلامـه
صوت العزاوي عز دون المضاهير=زايـد وتغلـب كاسبيـن الزعامـه
وان حافها الطماع ماحافه الخيـر=غشيـم راي وغـارقٍ فالغشـامـه
يرسون مثل طويق والا كما النيـر=والا كما ضلع رسـا فـي تهامـه
ميـراده محقـق بقاعـة زمهريـر=جداه عقب العـز عضـه بهامـه
واللي نجا يـردف دعاتـه بتكبيـر=يالله بغـزوه تاليتـهـا السـلامـه
وان طوحن بالصوت بيض الغنادير=ودون المعقل صار نطل العمامـه
ثم ثار عج الخيل مثـل المعاصيـر=وغطا على روس النشاما غمامـه
يـروون حـد مصقـلات بواتيـر=ويجلون هم اللـي تزايـد عسامـه
شجعان ماهابوا جمـوع وطوابيـر=وكلن يدور نجدتـه فـي حزامـه
يردون حوض مايـروده مصاديـر=الا غـلام وسـط قلبـه قـرامـه
من فوق قبٍ في رباهـا سعاطيـر=لا ارخو لها قامت تخوض الرغامه
ياقـوم ياعنتـر وياسالـم الزيـر=وياقوم ابو زيد المسمـى سلامـه
افعال حـق ولا روايـه اساطيـر=وشهودها التاريخ واهـل الفهامـه
خطلان الايدي فالليـال المعاسيـر=ياقـاري التاريـخ فسـر كلامـه
ماصكوا البيبـان دون الخطاطيـر=ومقابليـن ضيوفـهـم بابتسـامـه
تشهد لهم صفر الـدلال المباهيـر=وحيل عليها من الشحـم ماترامـه
امشرعيـن ابوابـهـم للمسايـيـر=للضيف والطرقي ربيـع وكرامـه
اهل الكـرم ماحسبـوا للمخاسيـر=كـلام حـق ولا عليـه مـلامـه
هذا وانا من لابـة تخصـم الغيـر=عتيبه الهيـلا علـى العـز هامـه
ماضي وحاضر والشواهد تقاريـر=في دفتر التاريـخ حطـو علامـه
اللي قرا يلقـى عظيـم التفاسيـر=واللي جهل ما احد نشد وش علامه
وكـل القبايـل وافيـه بالمعاييـر=والطيب ماهو حكر والا انقسامـه
قلت الحقايـق دون زودٍ وتزويـر=والحق يلـزم للرجـال احترامـه