الأخ العزيز سعد آل بريك
صح الله لسانك ... قصيدة جميلة ... وفكرتها أجمل
ياليت ابو محمد ينسقها
الطفاقه
يا ناشدي بالله خل الطفاقه= لا تبحث الخافـي ولا تخـرب المـود
صدري وهو صدري تضايق خلاقه=والنفس مسدودتن والعقل مسدود
ما نيب أحسد الناس واقطع علاقه= ومانيب اخوي من حياته بلا فود
أجنب الرديان واهل الحماقه= واحط من دونـي طوابيـر وسـدود
أحب قرب أهلي وجمع الرفاقه= واشفق عليهم كثر ما ذعذع النـود
ربعي هل التاريخ واهل العراقه= وسامة المشعـاب فيامنـا السـود
دواسراً للمجد رابط أعشاقه= ما تقبـل الهزلـه ولا تذخـر الجـود
لكن بعض الحيان تبلش أبعاقه= وتدعي عسى الله يقلعه لين ما يعود
ون صككت دنياي طاقه وطاقه= أنا بدوي ما يلحـق العمـر منقـود
أحب يم البر في وقت فاقه= أسوج رجلـي فـوق تربـان وحيـود
ما يشرح الصدر ويفكك غلاقه= ياكود مسراحي مع طـرف الـذود
سوداً مجاهيمٍ نضرها شفاقه= ترعى من الريضان ما تاكـل العـود
في رايعاً ما داسته قبل ناقه= عليه وبل الوسـم مـن قبـل مـردود
ياناشدي والعمر بعضه ذواقه= باغنم مع أهل العز والعمـر معـدود
العمر مره والوناسه سراقه= وانا بونس خاطـري واطلـع أسنـود
قررت أحلل خاطري من وثاقه= يا ناشدي تكفى توكـل ولا تعـود
أخوك في الله
العرابي