يالمناجي وش تناجي كلها دود وعظام
يالمناجي اذكر الله وامسح دموعك وروح
يالمقابر لو دريتي وشهو في قلب الغلام
كان عمرك ماطلبتي صاحبك بعد ونزوح
يالمقابر جيت ادور حضنها بين الركام
وارمي بكل المشاعر واشتكي وقتي وانوح
جيت اكلمها واعاتب من عقب ماارسل سلام
ليه يا يمه تركتي اولدك ينزف جروح
جيت اعلمها بقراري بعد فقدانك حرام
اهتني برغد المعيشة والحزن عقبك يلوح
جيت وجاوبتني حلومي يوم شفتك بالمنام
شفتك تنادي ياخالد ناسي الوجه الصبوح
من يقول اني نسيتك يابعد كل الأنام
وعطرك العنبر اشمه في صدر دارك يفوح
لا تسامحني الأمومة كان ماقلته كلام
وشلت ايدين الكتابة لو شعوري به جموح
اسألي دمي وعروقي كيف صارو في خصام
واسألي قلبي ياامي ليه تصرخ فيه روح
كان عايش في حياتك صار من بعدك حطام
واكتشف فيني غموضه من بعد هاك الوضوح
وعافت النفس المحبه والعشق واهل الغرام
وانزويت اكتب قصايد مالها عندي طموح
بين جدران وزوايا اشتكي جور الظلام
وان بغت تبكي عيوني اهرب لفوق السطوح
لا غدى موتك منابر والحكي عنه امام
ابشري بشيخ المشايخ يخطب ويقرا شروح
ابتدي بيمه فديتك ارجعي عندي كلام
وانتهي بيمه غيابك اتعب الوجد المزوح
والقبر يمه بزوره كل يوم وكل عام
وان منعني الموت عنك اطلبك يمه السموح