[معلومات العضو ثامر البدراني]

السلام عليكم ورحمة الله وبركاته ..


هذي قصيدة لي (غزلية)

أتمنى تعجبكم

أقول فيها ..

زلزل مشاعر كل كلّي ملاقاك=هدّم مباني الياس والحزن فيني
أشعل شموع الحب والشوق طرياك=وأطفا حريق(ن) مشتعل في حنيني
أقبلتي .. وأقبل كل طيبي وحيّاك=إقبالة اللي فاقد(ن) له ضنيني
يا مرحبا بك عدّ أعمار الأفلاك=يا مرحبا بك يا بشاير سنيني
أقبلتي .. وأقبل كل خير مع خطاك=السعْد بعدك فكل لحظة يجيني
عمري .. ترى شعري نوى اليوم يغشاك=عمري .. ترى قلبي بغرامك سجيــني
هديّتك روح(ن) ومهجة وتفداك=ويفداك قلب(ن) بالمشاعر دفيني
قلب(ن) صدوق(ن) منه الإحساس أسقاك=حزنـه سنـيــن .. وفرحته لحظتيني !!0
القلب لك من بدّ المخاليق بدّاك=بدّاك لأنك أطيب العالميــــــنــي
عمري .. لا عاش من هو اليوم بكّـــاك=ولا عاش من هو في خصالك يشيني
ولا عاش من هو عاش عمره بليّاك=ذاق الحزن والشين في كل حيني
ذاقه ترى .. من هو يعَرْفِك وخلاّك=أنا أشهـــد إنه في بعادك حزيني
يا ليت من هو عاش عمره على لقاك=يصبح على شوفك ويمسي بلِيْنِــي
أجلس بقربك وأهتني في مراعاك=وأشوف شوقك بالوصل يحتريـنـي
قلبي ليـــامن ضاق يزبــن وينصـاك=يا اللي في درب الطيب طبعك رهيني
سبحان رب(ن) خالقك يوم سوّاك=سوّاك بأحلى صورة(ن) تهتــويني
وسبحان رب(ن) أبدعك يوم حلاّك=زين(ن) وحكمة وكل قول(ن) رزيني
أدمنت عطفك .. وأدمن القلب ذكراك=وأنتي مكانك بين رمشــي .. وعينــي
عمري .. أنا منوي فيوم إني أنســاك=عهد(ن) كتبته بين قلبك .. وبيني

تقبلوا أطيب تحية

ثامر البدراني