مل عين ٍدمعها مثل همال السحاب=لا ذكـرت اللي نوده ولا نقدر نجيه
هيه ياللي شوفتك عن طعام وعن شراب=المنايا حوضها لا توردني عليه
منك حالي ناحل ٍماتحمل للثياب=اشرب الماء واكل الزاد دونك ماهتنيه
حبك اللي مشغل البال واذهبني ذهاب=عاقل ومن حبكم مخطر ٍلا ارجع سفيه
يوم ربي ميّزك بين تلعات الرقاب=لا تباها بالمزايا ترى مالك شبيه
واهني من حطكم راس ماله ثم تاب=والغنى فالنفس والرب خلقه ترتجيه
ليت حبلك بالثمن كان مثلي مايهاب=باتقدم من كرم لابتي ثم اشتريه
مير لا حليت باب انغلق عشرين باب=وان بنينا للرجاء بيت حل الياس فيه
والله اني خايف ٍلا تجي مثل السراب=يفرح الظامي بشوفه وهو ما يلتقيه
ودي اخذ راي من فكرته دايم صواب=والمراجل يحتملها وله قلب نبيه
يابن محسن خابرك من مطوعة الصعاب=ياطويلين اليماني وبيضان الوجيه
القضيه ماتجي بالمشاكل والعتاب=وان لقيتوا باب مفتوح دلوني عليه
شايفٍ لي شجرة شوكها نيبان داب=ومن رقد بظلالها شوكها ما يبتليه
عن عواصيف الزمن هي كما وصف الحجاب=والثمر باغصانها كل جايع يجتنيه
جعل يسقيها الولي من سحابٍ له رباب=لا تنثر ماه والصبح طله مقتفيه
مرحباً ياطيب الراس ياسهل الجناب=ياعريب الساس يالقرم يالشهم النزيه
ماعليكم زود يامروية حد الحراب=من رجالٍ منهج الطيب دايم تحتسيه
يانفل مثلك دليلٍ ويوخذ له حساب=فاهمٍ واللي مجرب سواتك مايتيه
احسبن جيشك من الغي ينوي الانسحاب=معلنٍ نصرك على من تهقويت تغزيه
واثرك اللي من هوى البيض تشكي مالعذاب=عزتي لك مالعناء والشقاء اللي طحت فيه
يكفي انك شفت مازان في عينك وطاب=لو هوى ذالجيل ماعاد به شي نبيه
ويكفي انك يارعى الصنف رجالٍ حضاب=عارفٍ مدخال رجلك وعرضك محتميه
تشتقي بالزين وتحب غضات الشباب=خص منهو جايزٍ لك وقربه مهتويه
فان بغيت نجرب الحظ زهب لك زهاب=حاضرٍ بالجاه مع كل شهمٍ ننتخيه
انت تنشدني وانا ودي اعطيك الجواب=حسب عرفي ماتنحلت قولٍ مدعيه
مايحصل شف قلبه ويكسبه اكتساب=كون منهو في حياته دعوا له والديه
اطلب اللي لادعي عان عبده واستجاب=كان ربي راد جتلك على ماتشتهيه
والشجر بالذات طبعه يجي مسموم ناب=من بغى طعم الهناء لا يطرف له يديه
بس انا فالظل بارتاح وابعد مالدواب=ليه مابعد مرقدي عن طريق الداب ليه
ذاكلامي وانت حرٍ على روس الهضاب=ان كسب ولا نصى مرقبه يبدي عليه