[معلومات العضو عبدالله العصيمي]

اخواني اعضاء المنتدى الكرام اضع بين يديكم هذه

القصيده و هي في الاساس رد على قصيده سمعت منها

بيت واحد ولا اعلم قائله والبيت هو :

الصيف روح والمطارات مليا .... والحجز ملغي والمزايين فالشام


وجاريته بهذه الابيات المتواضعه

الحجز ملغي والمطارات مليا = ولا همني حجزه ولا روحة الشام
يهمني شوفة ظبيٍ جفليا = مرباه نجد وشوفته تشف الاسقام
ليا قام يضحك لي ضحوك الغزليا = يضحك بغرٍ كنها صافي الخام
من بينها مزيت طعم العسليا = من مبسمٍ حمرٍ شفاياه وانعام
والخد براقٍ صدوق اشتعليا = نوه صدوق وفاضحٍ ليل الاظلام
والرمش من رب العباد اكتحليا = ما شالت المكحل ولا كحل الاقلام
عكشٍ مظاليلٍ زهاها الخجليا = مع قرضة البرقع يسنن الاسهام
ولبة نحر تشد القمر لا اكتمليا = والقرن سباحٍ على ذيك الاقوام
والردف مزبورٍ وراه انعزليا = والوسط ضامر والنواهيد قدام
عمره على العشرين لا ما اكتمليا = تفداه بنت الشام وديار صدام
ليا اقبلت اجزل بيوتي جزليا = وان شافني يشدي غطاريف وانغام
مثلت مع خلي سلامه وعليا = بالحب والا ديننا شرع الاسلام
والمعذره ياهل الوفى والفضليا = وضحت مكنوني على شان ما انلام
في حب مجمولٍ له الريم حليا = تعبت لجل رضاه واشقيت الاقدام
ولا طعت في حبه كلام العذليا = ناسٍ تقول الحب تاليه الاندام
لو كان جسمي بالهوا قد نحليا = يدريك عن حالي غدا جلد وعظام

اخوكم عبدالله العصيمي