[معلومات العضو ناصر الشريف]

مصافحه اولى

سج الضمير وشب للشعر ضوّه = في مرقبٍ دونه تحن الهواجيس
أساير حروفي بليته ولوّه = منها جيوش الفكر عطشى محابيس
يا هاجسي دوس الطريق المتوّه = ما اخبر عزومك فا المواقف مناكيس
دايم لساني للمشاعر مفوّه = شاعر وادرس طالب الشعر تدريس
حرفك ليا ما صار عنده جروّه = يكفخ كما كفخ الحرار القرانيس
خله بصدرك يا قليل المروّه = وش فايدة حرفٍ يغث القراطيس
واقع مرير نعايش اليوم سوّه = الشعر راح مهايط وسلم فا الكيس
صار الشعر مع عابثينه مشوّه = قفى مع أهله كاسبين النواميس
الشعر حبك وسبك ماهو فتوّه = ولاهو مصايح في صدور المجاليس
واللي يدوّر من ورى الذل قوّه = يلقى من امرار المذله كوابيس
مالك ومال اللي يخايلك نوّه = سحاب صيف يروح عبر النسانيس
قدرك رفيع وليه ترضى دنوّه = وتحد روحك للعقول المفاليس
واليا رجيت ارج الكريم بعلوّه = وارسي كما ترسي الجبال المراويس
لولا الكرامة ما صفى الطيب جوّه = ولولا الحيا ماتت جميع الأحاسيس
شاعر من الغيره لغيره ينوّه = في مرقبٍ دونه تحن الهواجيس