[معلومات العضو عبدالله الحافر الغييثي]

وهذه قصه لاحد فريس الدواسر في فناجيل القهوه وهو يعد فعوله بالفناجيل وهو الشاعر والفارس/ هجاج بن هجاج الخييلي وفي يوم من الأيام ضيف على واحد من العجمان وكان وقتها كبير في السن فقام المقهوي ومد له الفنجال وقاله [ خذ فنجال الشويهات يا عم ] وكان يقصد انه شيخ كبير ما منه فايده ، ولم يكن يعرف ان الرجل اللي امامه هو الفارس المشهور هجاج بن هجاج ... فخذا هجاج وشرب فنجال الشويهات فقاله .. صب فنجال ثاني .. ويوم صب الثاني قال هجاج هذا فنجال [ قحيفان عقيد قومه ] من ال سفران ذبحته في اليوم الفلاني في المكان الفلاني .. ويش تقول ؟؟ قال المقهوي : كفو قال صب فنجال ثالث .. ويوم صب له الثالث قال هجاج هذا فنجال [ السيلماني ] ذبحته في اليوم الفلاني في المكان الفلاني .. ويش تقول ؟؟ قال المقهوي : كفو قال صب فنجال رابع .. ويوم صب له الرابع قال هجاج هذا فنجال [ فلان ] ( ماعرف اسمه لكن من آل شامر ) ذبحته في اليوم الفلاني في المكان الفلاني .. ويش تقول ؟؟ قال المقهوي : كفوو المجلس كان مليان من العجمان فقاموا يبون يذبحونه في المجلس نظير ما قاله في رجال العجمان من فعل ،، فمنعهم صاحب المجلس اللي هو المقهوي وقال والله ماحد يقربه ما دامه في المجلس .. ويوم طلع من المجلس قال صاحب المجلس الحين اللي يبيه يلحقه ، .. وقد توفي الفارس وهو كبير في السن مابين الاعوام التالية 1315هـ إلى 1330هـ تقريباً رحمه الله وغفر له ورحم الله أموات المسلمين