[معلومات العضو عبدالله الدوسري]

يعني كذا ترحل و لا به معاذير=ما تدري إن لي فيك حاجه و حاجه
ارسل لك الأشواق و تقول تبذير=و أشعل لك الماضي و تطفي سراجه
تصدّ عنّي دونما أيّ تحذير=تِكثر مشاريه العتب و اللّجاجه
يمّك طروشي كلّ يومٍ مداوير=و الحال غلّق ما وراه إنفراجه
أناجي نجوم الفلك و العصافير=و أقول يا الأقدار كيف نتواجه
أمشي على عهدك بأدقّ الحذافير=أشفق عليك من الكلَف و العواجه
يا معرّض قلبي وعور و شناظير=ان رّحت عنّي ضعت لي في عجاجه
لا تحسب إنّي دونك معيّنٍ خير=لا و الله إلاّ عايشٍ بإنزعاجه
متوتّرٍ خُلقي و كلّي تفاكير=و الهمّ لا جاء اللّيل ما أكثر رُواجه
ارحم ضُعف حالي و ذلّي على الغير=واللي يعزّك لا تعقّد حجاجه