[معلومات العضو حفيد الأمراء]

لاضاق صدري رحت للشيخ مشعان=أبغى اتسلى والسوالف نقيه
له مجلسٍ مليان شيبٍ وشبان=يفرح بملفى الضيف من منشويه
والعود الازرق دائرٍ بين الأخوان=وحيلاً تفطح بالصياني طريه
مهوب يحسب للخسائر اكحيلان=وسعد الرفيق وسعد منه خويه
حلحيل ما ينحال لو كان ما كان=يرسي كما ترسي هضاباً قويه
للصاحب أحلى من لبن كل مسمان=وللعدو رمحٍ وعلةٍ باطنيه
من نسل شيخٍ بالعسر يذبح الضان=ويفك عقب القوم في كل هيه
عجالين معروفين في كل ميدان=أهل الوفاء والطيب وأهل الحميه
دواسرٍ بالهوش ما هم بذلان=عند الشدائد لابةٍ صيرميه
يشهد له التاريخ في قصر عجلان=برفقة أخو نوره زبون الونيه
عبد العزيز معدلٍ كل غلطان=مصبح العدوان والشمس حيه
ياما وطو من المخاطر والأكوان=وكم صبحوا من ديرةٍ جاهليه
لين أصبحت نجدٍ بدينٍ وقرآن=وفي فطرةالإسلامٍ هم بالسويه
أقولها والله بصدقٍ وبرهان=وعقب صبيٍ في جوابه خطيه
وصلاة ربي عدّما هل ودان=على رسولٍ شرّف الله مجيه