[معلومات العضو ثامر البدراني]

السلام عليكم ورحمة الله وبركاتة

مساكم الله بالخير يا أعضاء المنتدى ..

حبيت أشارك معكم بقصيدتي الغزلية هذي ..

ويمكن هذي ثالث قصيدة أشارك بها

وهي قديمة عندي ..

ومعذرة على قلة المشاركات ..

أتمنى تعجبكم

على ذيك القلوب اللي تعرف الصدق والطيبه= كتبت أحلى معاني حب كتبت أبيات مرويـّه
هلا بك يا بعد من لي هلا بك ألف ترحيـبـه=هلا بك يا هلا باللي يغار الضيّ من ضيـّـه
عرفت السعْــد وأيامه عرفت الحب ولواهيبه=عرفته يوم لاقيتك وجت إيديك في إيـديـّـه
كثير اللي تمناني أصير أقرب من قريبـه=ولامن جيت في أحلامه يقول يا يزين هالجيّه !
وياما كثير أغلاني وسمّاني أنا قليـبــه=أجي وأروح في باله ولي هيبه وأحقيّـه
ولكن .. ما سواك ((أنتي)) أرحّب به وأهلّي به=ولا (( غيرك )) يحركني .. ويفز القلب لطـاريّــه
تصدق .. لو أبي أحكي عن اللي بي وأشكي به=أعجّز كل بحور الشعر .. عن وصف الذي بيــّه !!
ولكني بأقول اللي على قلبي بعذاريـبــه=بأقول أهواك وأحبك يا ام خدود ورديـّــه
أبي أوصفك وأتغزّل ابشعري وتراكيبـه=يا أصل الزين يا الشيخة بأبدع فيك قافيـّــه
قافيّه تعبّـر عن وصفك وأعاجيـبــه=يا نبع الحب يا عمري شويّه فيك حوريّه
من ينصاك يا النجلا .. أبد ما يرجع بخيبه=لأنك يا ملاك الزين .. أوصافك خيـاليـّــه
خياليّه . رومنسيّه . أبد ما فيك من عيبه=حوريّه سعوديّه .. أقولها بكل عفويّــه
ملكتي القلب يا عمري .. أبد ما فيه من ريبـه=ملكتيني من الهامه إلى أقصى أقصى رجليّه
يجيك الشعر من حاله ! ولو ما جالك نجيبه=أجيب أحلى معاني الحب وأقدمها لك هديّه
أنا أطْرَب على ذكرك .. وأطْرِب كل طاري به=طَرَب راقص على نغمة ألحان(ن) موسيقيـّــه
أجل وشلون ما أطرب على حبك وأغني به=وأنتي ((شيخة البيضان)) ولك إعيون سحريّه ؟
أجل وشلون ما أطرب على حبك وأهذري به=وأنتي ((شمس هالأكوان)) حشى منتي بإنسيّه !
((ملاك العالم الناعم)) .. لقبك أنتي .. تَغَنَّيْ به=تَغَنَّيْ به أمام الكل .. تَغَنَّيْ بكـــل حريّـــــــه
تعـــالي واسكني قلبي ولا تطرين الغيبه=تعالي واهجري العالم وخلي النيّه ع النيّه
عشان نعيش أحلى اثنين ونْهَجَرْ الشين والريبه=أنا أنتي وأنتي إيّاي ! يا أغلى من سكن فيّه !
وعلى ذيك القلوب اللي تعرف الصدق والطيبه=كتبت أحلى معاني حب كتبت أبيات مــــرويــه

تقبلوا أطيب تحية

ثامر بن عبد الله البدراني